PolyU小強 – 周程宇
廣告
Vitas( 周程宇 )除咗係PolyU嘅學生，仲係一個田徑運動員，主項係三級跳，唔止身形夠鋼條，個人都一樣咁硬淨，佢甚至形容自己係「曱甴」，因為生命力強，有咩風雨都面對到，仲好豪咁話：「90後有咩多？時間最多！衰咗咪再嚟過囉！」所以叫佢做「小強」，真係一啲貶義都冇架！
細細個Vitas就俾老師話佢喺田徑方面好有天份，中一入咗天主教伍華中學，短短3年間，伍華田徑隊由D3砌到上D1，去到學界最高舞台，Vitas話最遺憾就係中六嗰年破唔到學界紀錄，不過喺同年嘅另一場公開賽，佢以打破塵封十幾年嘅青年紀錄完成賽事，總算爭番口氣！
Vitas今年21歲，係田徑運動員既高峰期，幾年前佢因為腰傷，影響咗訓練，雖然有好多人叫佢放棄，不過Vitas一早就認定田徑係生命中不可或缺既一部分，嚟緊佢會加緊訓練，希望成績可以更進一步，只要成為全港第一，佢就可以重投港隊。
做得運動員，四肢發達就梗架啦！但係Vitas絕對唔係頭腦簡單架喎！而且佢小學就已經好有生意頭腦架喇，識得打邊打機一邊搵錢，而家仲喺網上做耳機生意tim都做得唔錯架！咁俾心機搵錢，係因為Vitas覺得做生意係香港地唯一脫貧、向上游嘅方法，雖然而家搵得唔多，叫夠自己食啦，但都想第時可以養到屋企人之餘，又唔駛慳住慳住咁去旅行！
雖然Vitas而家仲讀緊Year 1，但係佢已經好有計劃，希望學業、運動同生意可以同步進行，平衡發展，如果真係要揀，就一定會以運動行先，因為運動員嘅生命好短暫，到三十歲就好難同啲後生仔競爭喇，所以會把握時間，搏到盡先！
[youtube id=”GwDPV0zA1N0″]「學界男女神」唔止要睇盡中學界靚人，仲要殺入大專界！
所以無論你係讀緊中學定大專，只要你認為自己或者身邊嘅同學仔有呢個資格，都可以自薦或推薦俾我哋!
參加方法好簡單，只要將參加者及提名人嘅姓名、年齡、就讀學校、個人專長、聯絡電話，仲有一個月內影嘅近照兩張(全身及正面)，喺學界男女神facebook專頁 inbox或電郵到[email protected]俾我哋；如果成功通過編輯部審核，就有機會成為「學界男女神」!
「學界男女神」，等緊你嚟挑戰!
撰文: Joanne
攝影:Clay Lam
拍攝: Anthony Leong
剪接:Candy
美術:C.Ming
Hair+Makeup: EM Makeup
