《Do姐再shopping》笑足全集！10大笑料放送
撰文：Sunday Kiss
圖片：節目截圖
《Do姐再shopping》笑足全集！10大笑料
1.「舊？佢自己都舊啦」
節目首集Do姐就帶觀眾去到秋葉原大玩高卡車，但翠如就似乎稍有微言，因為高卡車已經係舊玩意。
一向十分「民主」嘅Do姐又點會因為翠如一句而罷休，仲話自己有一個充分理由。
原來萬能Key理由就係Do姐嘅一句：「我鍾意！」
農夫一向經常一邊向Do姐擦鞋，一邊暗串Do姐。今次，C君就即刻回應話：「咪就係囉！鍾意最緊要！」仲話遲啲Do姐要返去明朝拉人力車！
陸永緊接話：「舊？飯唔舊呀，你又食？」，C君則同翠如講：「舊？佢自己都舊啦，我哋都仲未放棄自己呀！」，翠如即刻作勢要打C君，暗串Do姐係死罪啊！
2.農夫變藝術家
話明係《Do姐再Shopping》，當然要帶大家去銀座掃貨。佢哋去到一個最新最大嘅購物商場，當中特色就係會喺商場唔同角落放置唔同藝術家嘅展品。陸永同C君即刻擺起一副認真樣話：「我知道今日好重要，有兩位藝術家遠道嚟到⋯⋯」
心水清嘅Do姐同翠如當然唔會再浪費時間喺無聊笑話上，一於走為上策！
3.氹Do姐買樓變買褸
陸永大玩食字，指之前佢讚Do姐係最佳主持，Do姐應承送層「樓」俾佢，但宜家就連送一件「褸」都唔肯。
4.「其實我哋都行好多Show」
農夫喺牛仔時裝店入面大玩Catwalk，俾Do姐劣評話：「好肉酸」，C君就回應話：「其實我哋都行好多Show，不過主要係Gag Show同Talk Show」
5.「360度」
農夫為大家示範店舖單品，Do姐就叫佢地「360度」俾佢睇下，陸永邊轉圈邊話360度需要反身倒立至滿足到Do姐！
Do姐就反擊話靚衫著喺農夫身上係浪費咗！
6.「佢多過我地好多次架啦」
翠如指自己就快生日，想Do姐幫佢埋單買牛仔外套，不過最後當然得個桔！農夫事後喺旁邊加鹽加醋，唔止話Do姐「唔尊重人生日」，仲話Do姐「佢自己都有生日啦 佢多過我地好多次架啦 可能佢覺得唔重要呢！」，再次暗串Do姐年紀大，好大膽啊！
7.「呢件靚呀！」
陸永同C君雖然成日暗串Do姐，但偶爾都會口花花賣下口乖。Do姐帶佢哋去二手市場搵平貨，仲喺二手和服店試日本傳統服飾。Do姐著住和服問農夫：「呢件靚唔靚先？」，農夫即係異口同聲指住Do姐話：「呢件靚呀！」
8.「你估你好多鈣質咩？」
下一站，Do姐同農夫、翠如去咗玩攀石！唔好睇攀石好似好簡單，見翠如玩起上嚟都雞手鴨腳，要Do姐喺旁邊傍住，逐步俾指令佢。C君見翠如咁「牙煙」，當然叫Do姐行開啲以保安全。不過，Do姐一於無有怕，繼續堅持要扶住翠如驚佢跌。C君口直心快話：「你估你好多鈣質咩？」，即刻令Do姐笑場，大喝：「唔好嘈啦！」
9.「果種生命力真係好似曱甴！」
陸永講述Do姐玩攀石時從高空跌落，當時全場都好擔心，不過Do姐好快就自己起返身，佢形容：「果種生命力真係好似曱甴！」。睇怕都只有農夫敢將Do姐同曱甴相題並論！
10.鄭裕鈴鈴
Do姐一行人去到露營用品店閒逛，Do姐隨手拎起一個鈴鐺正打算考大家對求生用品嘅認識，C君就話：「呢個鈴鈴呀！鄭裕鈴鈴呀！」，繼「Did Did姐」又再幫Do姐改咗個新花名！
