親子好去處

親子好去處 電車主題酒店 家庭親子客房@黃金海岸酒店

熱話

廣告

去過黃金海岸咁多次!諗番起對上一次在黃金海岸酒店玩已經是6年前了,嗰陣Hysan只係得一歲唔夠,今次再嚟已經帶咗一件芊芊,得知上年12月新增設主題客房,我哋就訂咗呢間以電車為主題的客房玩番個週末!


我哋太約3點到達然後Check-in,上去5樓房間先放低行李,上到去俾個任務佢哋兩個鬥快搵到517房間。

一入去兩個見到間房成架叮叮咁,就超級興奮!第一時跑去自己張床度瞓,哥哥仲爬咗去上格,原來上格放咗咁多個公仔喺度,驟眼睇真係好似真實情景!

仲記得芊芊1歲嘅時侯在嫲嫲屋企住咗一排,每一晚食完晚飯我就會同芊芊搭叮叮去到筲箕灣總站再搭番轉頭遊個電車河,所以芊芊特別鍾意叮叮

小朋友床的上格係模擬叮叮上層坐位擺設,配合埋牆上佈景真係幾寫實喎!

呢間房真係設計得好精緻,每一個地方都可以見到傳統電車既特色,睇吓個廁所連扇門都好似上落電車的摺門,仲有塊鏡同燈,真係咩回憶都番哂嚟!


另外衣帽間位置,一望上去個設計,又真係幾似個電車站喎



房間裡面兩邊牆都有電車內外的大特寫


兩個坐喺呢張木櫈上面真係好似置身於電車內。

呢個係媽咪要求佢哋擺的粗魯Style(但係唔該喺真電車上面唔好咁呀!)

大床以報攤為設計,床頭軟墊由好多本雜誌堆砌而成,十足十中環街頭報紙攤檔

地上面仲有幾個坑渠蓋設計的咕o臣好過癮好得意!

小電車頭前仲有張馬路造型嘅地墊,兩個即刻拎佢哋帶嚟嘅玩具 車仔出嚟喺上面玩



在小枱椅上面放咗幾本以香港特色為主題的圖書,等爸爸媽媽可以夜晚臨瞓前同小朋友睇書。

本本圖書我都超鍾意,好似呢本講述香港小朋友的兒時玩意,有幾多種你又玩過呢?我最有共鳴係呢幾個!

 

 

仲有兩張「寶藏獵人」遊戲咭,如果答啱哂仲可以去換番份小禮物!


最後最後唔講唔得嘅呢個超大露台,望出去龍珠島同埋黃金海岸商場同遊艇會





參觀到唔捨得走,但係主題客房包了一個特色下午茶,所以放低好行李我哋就急急腳落去嘆個High Tea先!


對住下面的泳池景,食起上嚟都真係寫意D!


在酒店大堂的特色主題下午茶,會跟據你訂的主題客房為您預備精緻的Tea Set!


嘩!真係好大陣仗嘅電車下午茶,兩架電車沿住路軌一路行,兩個玩多過食!


除咗Cake之外,連砵仔糕都有,真係好有本土Feel



食飽飽後我哋就出發去玩玩酒店內的玩樂設施,沿住樓梯行落LG層,就見到鯊魚冒險島遊樂場,見到外面仲有一大片空地,於是八卦出去望望睇吓有乜玩。

最開心佢哋見到有個沙池同埋”筆”沙神器,如果唔係有個小朋友排隊又想玩我諗佢哋真係玩到唔捨得走!






另外一邊大空地放咗幾個遊戲設施,一個吹氣迷宮、巨型保齡球、巨型象棋,全部只要同鯊魚冒險島職員講聲就可以開放俾大家免費玩。仲有呢個車軚圍住的區域原來係個單車遊戲區,每15分鐘一節,只要就可以向職員租借單車喺度踩!


最奇妙喺呢個唔知係乜東東,問過職員後先知原來呢個係泳池的嬉水遊樂區,水會從這些巨型裝置灑出,只係遇著冬天暫停開放,不過三月中就會同埋泳池一齊開放番!嚟緊夏天大家可以考慮吓嚟玩吓!

之後打算入去鯊魚冒險島玩,見到外面有部足球機同氣墊球,於是又向職員登記玩咗陣,遲遲都未入去遊樂場玩! 哈~


唔該哂計分小姐幫我哋計分!



呢個鯊魚造型的登記處真係打卡好位!

鯊魚冒險島收費為50分鐘一節,酒店住客$100/ 非酒店住客$150(以上收費為一位成人及一位小童),至於訂了主題客房的我哋就獲免費玩一節50分鐘

就連換鞋區都設計得特別靚!

芊芊「哥哥,等埋我呀!」

我最深印象係呢段入口的一小段路,用了投射裝置將海底影像射在地上,佢係一條Animation,真係見到D小金魚喺度游來游去!

兒童洗手間就在入口旁邊! 十分乾淨舒適


以鯊魚為題的Playhouse唔多,相信除咗恐龍之外,鯊魚就係小朋友另一至愛 。

場內設計到好似海底一樣,小朋友一入去就經已好開心周圍跑,裡面有個好大嘅海盗船同鯊魚造型的裝置。

呢條透明瀡滑梯好刺激,而且仲發現有個好處,就係當有D BB仲細個,佢哋唔敢瀡落去,呢個透明位可以俾媽咪好放心咁睇佢小朋友喺裡面情況

呢個鯊魚口簡直係打卡位!小朋友爬到最頂瀡過旋轉瀡滑梯,由呢個大大鯊魚口瀡出嚟! 佢哋兩個扮俾鯊魚咬,妹妹直情演得入型入格!

適合較細的小朋友遊戲區


另一邊仲有攀石牆,小朋友玩嗰陣要小心D,唔係驚佢跌落嚟,係驚佢跌落嚟壓親其他人,哈~

兩個嘢好似放監咁! 講飲講食冇興趣,但係講玩就幾攰都即刻醒哂!

唷噓~~



彈床係妹妹第二最愛啦(打韆鞦係第一!),屋企張床都就嚟俾佢跳爛!唔該你喺度跳飽佢



如果驚太細小朋友唔啱玩,呢度都有個BB小天地,裡面有齊所有訓練大小肌肉嘅玩具,如果拖住個細又唔知大個件出邊玩成點,呢個潛水艇造型嘅BB空間有大大個窗口可以俾你見到出面小朋友一舉一動,十分放心!




玩到咁上下我哋就去參加手工藝工作坊,這個工作坊係主題房間包埋,配合房間主題做出兩件小作品(當然Walkin或者普通房間住客也可參加,不過就會係做其他手作)

酒店客人需要$100/其他客人則$120,這個主題客房並不包括在內,需要額外付費

看看小朋友的製成品幾靚! 大家可以選擇自己鍾意既手作去完成

隔離仲有張迷你乒乓波枱可以俾小朋友玩

至於電車主題房間的我哋會做兩件小手作,一件係木製電車模型,另一個係設計環保袋 。

多謝酒店預先為我兩個小朋友預備的小禮物!


兩個都好有心機跟住姐姐一個一個步驟咁完成,估唔到雞手鴨腳的芊芊,人仔細細都可以唔駛媽咪幫手自己砌好架木電車!我哋讚佢嗰陣仲陰陰咀笑咗出嚟





跟住再設計電車主題環保袋,哥哥真係畫得超美!我覺得定番個價都有人會買(至少仲有我呢個顧客)


 



芊芊畫完就急急腳再跑番去玩,無限次瀡滑梯同跳彈床,因為呢個時侯六點幾,大家都去咗食Buffet,我哋好似包咗場咁!之後哥哥完成埋個手作再加入,剛好另有一家人喺度玩,哥哥同芊芊都有個對手一齊喺度玩伏匿匿!真係玩到癲哂…


臨走先發現呢個影相位,有兩支雨竿公仔喺度可以坐喺石堆上面扮釣魚

多謝黃金海岸酒店送我哋飯後甜品!


我哋拎住換領卡到餐廳換取雪糕,有Haagen-Dazs同Movenpick呀,換完芊芊就第一時間衝上房慢慢嘆杯雪糕

番入房發現原來酒店預備埋個生果盤,等大家晚飯番到房間都可以食番少少水果,超細心超體貼!

剛才工作坊兩個小朋友的製成品,真係節目豐富又食又拎!


 

夜晚我哋行過去商場那邊食個晚餐,再去超巿Shopping吓就番房休息,剛好開電視見到「狼人」於是成晚佢哋就攤喺床上面好開心咁睇,我哋都睇埋一份(其實係為咗驚有恐佈色情場面要Standby轉台)
全部人瞓哂之後我就一個走出露台欣賞下夜景,真係好靚好舒服!!

到咗第二朝起身落去食個早餐Buffet(酒店房間已包),對住泳池景嘆住早餐真係爽!蝦餃點心夾餅奄列乜都有,仲有Meiji Yogart,好開心呀!

食完早餐我哋就去玩小火車(本來昨天打算玩,但係因為有毛毛雨就取消咗),呢架小火車得兩卡,每卡坐到兩個小朋友,起初以為有得坐車頭(諗唔起架火車要有司機,哈~)佢哋兩個坐車尾,我哋就一路跟住火車轟𠾐轟𠾐!

呢架小火車會圍繞海旁行一圈,我同媽咪就梗係冇得上去只可以喺側邊跟住兩位少爺小姐行

話咁快就環繞海旁一個圈,我哋沿住海旁行一直行到篤





行到去「戶外至Kids遊樂園」,起初以為係一般普普通通公園設施,原來大部份都係新式公園設施,剩係睇吓呢個繩網陣,同埋呢個無邊瀡滑梯,真係見到都驚心,但係玩落又原來好安全,連芊芊都玩到唔駛扶!



第一次見呢種無邊滑梯! 睇上去又好似幾危險,但係原來小朋友係Handle到!

就連呀芊起初有少少驚,但係瀡下瀡下就越玩越起勁



男同女瀡滑梯的分別

呢個哥哥震震震攪到呀芊好驚跌! 但係睇住佢哋咁又好攪笑

玩咗成大半個鐘差唔多到Check-out時間,我哋就番去執嘢離開lu….

但係大家仲記唔記得我開頭介紹話主題客房裡面有兩張遊戲咭,原來答啱哂然後去鯊魚冒險島可以換到兩份咁堅的玩具! 「媽呀,這不是夢吧」

真係估唔到喺香港酒店都玩得咁開心,樣樣設施都咁齊備,其實如果近近哋喺度過番兩日一夜真係唔錯,夏天嚟仲可以去埋沙灘游水!同埋成個行程見到外國人仲多過香港人(甚至唔見大媽),感覺真係幾似去咗外地㗎,哈~(連自己都呃埋)

Photo byCANON 5D Mark III,Len|EF 24-70mm f/2.8L USM

呀劍評分:10分

呀劍評語:夠本土夠懷舊,而且係我小朋友至愛的電車”叮叮”主題房間,所有佈置設計都十分有誠意及製作認真,如果有埋個”叮叮”腳踏仲神似。房間包括的下午茶同埋工作坊都超有心思,食得開心又玩得開心!酒店其他配套都超正,鯊魚冒險島設施齊全,最緊要夠新夠乾淨,家長絕對可以俾小朋友玩得放心,我已經諗唔到有咩可以挑剔。

香港電車主題客房連海景露台簡介

叮叮! 以電車、繁華街景、特色書報攤等交織而成的場景,洋溢著濃厚的香港情懷。房間內更有設計栩栩如生的香港電車造型小睡床,為小朋友營造私人空間,既可於床上玩耍,亦可抱著卡通人型攬枕入睡。

地址

屯門青山公路青山灣段 1 號


鯊魚冒險島遊樂場(每節50分鐘)

開放時間:星期一至五 10am至8pm / 星期六、日及公眾假期 10am至10pm

收費:酒店住客$100/ 非酒店住客$150(主題客房住客免費玩一節時段)

內設特色主題手工藝工作坊(每節50分鐘)

收費:酒店住客$100/ 非酒店住客$120

兒童小火車

開放時間:9am至12nn 及 2pm至6pm(來回大約10分鐘)

收費:酒店住客每次$40/ 非酒店住客每次$60

至Kids遊樂園

開放時間:9am至6pm

免費

*詳情請參閱主題客房計劃內容或遊覽以下網址:

https://www.sino-hotels.com/hk/gold-coast/tc/facilities/

使用設施前,需向職員預先登記

電話

2452 8888

網址

https://www.sino-hotels.com/hk/gold-coast/

(以上資料更新至文章當日)