鍾嘉欣 貼相報喜 宣布屋企有新成員

宣佈屋企有新成員

鍾嘉欣同老公拍拖9個月便結婚，婚後不久便宣佈當媽媽。嘉欣每次一提到寶貝女，就非常開心，成副慈母樣出晒嚟，又曾謂自己與老公都希望將來可以有多一個小朋友。今日，嘉欣就喺社交網站上分享了一張抱住初生BB嘅相片，唔通咁快就追多個陪Kelly？原來唔係！嘉欣指自己係Auntie，而BB叫Keagan，係佢屋企嘅新成員。仲話好開心見到BB好健康，自己已經唔記得咗囡囡曾經都係咁細粒。唔少網民都留言恭喜嘉欣同大讚BB好可愛！

為女兒老虎都可打死幾隻

嘉欣曾謂當媽媽後成長了不少，從前她比較自私，不會為人設想。但有了女兒後，她變得有責任感，不再只顧自己，會為屋企人著想。「我覺得係一個快速嘅成長，因為我結完婚即刻有小朋友，所以突然成長得好快，以前廿幾歲，我比較盲舂舂唔識諗，結婚之後，唔再淨係為自己，要為屋企人諗，成熟咗好多，真真正正明白到母愛係乜嘢，以前我以為我知，同埋我演戲，以為我可以想像做媽媽係點，直至自己親身生BB、湊BB，我先明白到嗰種母愛係大到用言語係形容唔到。」

生BB沒有想像般辛苦

又表示生BB過程沒想像中辛苦，當初她擔心順產會唔會十級痛，但到要進入產房、陣痛的時候已經開到十度快要生，卻覺得時間過得很快：「我十幾個鐘陣痛、生個半鐘，但成個過程感覺似三個鐘，眨下眼就完咗，同埋我發覺好得意，神就係創造女人生BB，所以入到產房唔會驚，只會諗要個女健康、安全生出嚟，嗰種母愛同勇敢已經蓋過咗痛。」嘉欣坦言與老公都希望將來可以有多一個小朋友，不過就要等Kelly大個啲先： 「我哋有計劃嘅，希望將來可以有多一個小朋友。唔知幾時，但希望Kelly起碼一歲半後先開始試。」

與老公Coffee Shop邂逅

嘉欣和老公在香港一間coffee shop認識，Jeremy認識嘉欣家姐，剛巧來港旅行探親，便認識了Linda：「我去見佢都唔係諗拍拖，係諗住識下新朋友，見到面，佢滿口英文、加拿大人，我見咗佢半個鐘，好舒服，傾傾傾，傾到停唔到，之後我夠鐘要走，行出coffee shop，佢問我地鐵站點去，我突然醒起：『死嘞，呢度中環嚟㗎，好多記者㗎！』嗰排我好多新聞，費事影到相會被炒作，就跑走咗，冇教到佢點搭地鐵，因為咁我覺得自己好衰，專登搵佢say sorry，之後開始聯絡。」其後他們拍拖9個月便結婚了。

嘉欣認為自己不是閃婚，因為她和老公年紀都是適婚年齡，大家都比較成熟，而且大家的性格好配合，所以都認定了彼此，加上已認識了一段時間認識才結婚：「傾偈傾咗幾日，已經有感覺，當然冇同佢講『我覺得你係我將來老公』，但心裏面已經keep住呢個感覺。」

喜劇形式的求婚過程

嘉欣表示求婚過程不浪漫，但她已經感動到喊了：「因為佢唔係浪漫嘅人，佢用誠意，中間有好多蝦碌嘅嘢，佢又好緊張，又跪地，跟住有人嚟，驚有人影到，起番身，好多蝦碌、好好笑，反而我覺得呢個求婚嘅片段係喜劇形式。」

讚老公靚仔穩重

嘉欣表示欣賞老公整個人，而且是她心目中最靚仔的：「佢喺我心目中係最靚仔，佢唔係情緒型，我係情緒化啲，佢係好穩重，穩到令到我都穩埋一份，佢永遠無論發生咩突發事件或者開心唔開心嘅事，佢唔會俾佢嘅情緒帶動到，佢會好清晰地解決或者做事，呢方面嘅淡定我覺得係好吸引。」