陳敏之 : 湊B簡直係學問！

編輯：Sunday Kiss
圖片：新傳媒資料室
(內容節錄自1001期東方新地)

生B緊張到腳震

問到Sharon生B辛唔辛苦，「生B就唔辛苦嘅，因為我係開刀，不過就真係好緊張，我好記得我臨生嗰晚，全晚喺醫院都瞓唔着，一路喺度幻想會唔會好似拍電視劇喺手術室咁，好多盞燈射落嚟，會唔會麻醉得唔好？到真正入產房，我係緊張到腳震，因為入面都幾凍，打麻醉針嘅時候，知道真係要就嚟生，有少少唔捨得個肚，因為個BB喺入面咁耐，陪住我，人點解可以塞個BB入去，我覺得係好奇妙嘅，當然佢出嚟有另外一種興奮，又開心、又感動、又期待聽到佢嘅喊聲，百感交集，直至佢出嚟，佢第一聲喊聲我都錄低咗，我就已經喊到不得了，好感動，呢樣真係同做戲兩回事，真實做媽咪係完全唔同，係好開心。」

修身過程順唔順利？

見到Sharon身形同之前都真係差唔多，「可能俾晒成副精神個仔，要湊佢，有人同我講餵人奶會瘦，我相信都真係，其實喺不停製造奶嘅時候都已經好攰，又唔夠瞓，你見我身形同之前都唔係爭好遠，可能仲有少少要再減，但基本上我覺得同我之前未懷孕嘅磅數都唔係爭太遠。」

B仔易唔易湊？

初為人母嘅Sharon話湊B簡直係學問！「唔容易，對我嚟講，係好高學問㖭，尤其是初生嬰兒，我覺得我個仔算ok、唔係太難湊，但係因為佢好軟腍腍，條頸好軟、好似棉花糖咁，基本上BB得三樣嘢，就係肚餓、扭眼瞓同瀨咗，呢幾樣嘢佢會喊得好激動，你又要知佢脾性，唔係就咁俾嘢佢食佢就會停，可能佢有咩唔舒服，都要慢慢去了解，好似重新認識一個人咁，由一張白紙，我點陪佢度過佢嘅人生呢？」

BB較聽爸爸話

BB中文名叫雷子樂，但都有好多花名㗎！「叫雷冬至、小雷球，好多、好搞笑！全部都係朋友幫BB改。」至於老公有冇幫手湊B，佢就話：「老公有呀，佢係比我想像中鎮定，同埋佢湊BB幾有耐性，同BB幾夾，我覺得阿仔聽佢講多啲，佢氹BB，BB就會望住佢、聽住佢，夜更佢都會有幫手。」Sharon話大部分人話仔仔似老公，「激死我！我搵咗我自己細個啱啱出世個零月嘅相，我就覺得同阿仔好似，但嗰張相唔似我依家，所以BB似我嘅童年，但係又似爸爸嘅成年。佢唯一似我就係手腳，好長，好彩佢識似，哈哈！」

坐月期間有冇食啲咩補品同做咩運動？

人稱索腿天后嘅Sharon話依家要靠做機keep，同埋依家主力落手落腳湊，相信好快會瘦咁話。「坐月有食好多營養嘅嘢，開頭嗰個月陪月姐姐煮比較清淡啲嘅，因為我開刀，到第二個月，開始進補嘞，可能食吓啲花膠、海參，一啲湯水好緊要，每一日都有充足嘅湯水，屋企人照顧得好好。做運動我都有伸展下，但因為依家有傷口，唔可以做太多，係頸部運動會多啲，因為餵奶成日都耷低個頭望住佢，會比較攰，腰骨都會比較攰，有時用按摩椅按下，我諗之後等傷口復原，我會做番啲運動修身。」

今年生日特別開心

Sharon上個月生日，佢就話無點慶祝，因為仲坐緊月！「今年同老公、媽咪、囝囝切蛋糕，湊住佢，好簡單咁過。但我覺得今年係特別開心，因為多咗BB，幅相以後唔係得我哋幾個嘞，多咗佢，買咩俾我都唔夠佢珍貴。」另外，老公都買咗好大束花俾Sharon，佢話唔好話獎勵，其實係一個支持。「我覺得佢心靈上嘅支持係最緊要，因為生完都幾攰，好多嘢要處理，爹哋嘅責任都好大，媽咪、奶奶都好好，送好多金鈪仔俾BB，我家姐伍姑娘(伍詠薇)就送玉鈪俾BB定驚，我覺得佢哋好錫BB，人哋錫佢我已經好開心。」

唔做怪獸家長　唔係惡媽咪

香港讀書競爭咁大，Sharon有無開始搵學校呢？佢就話未，「但我自己都有啲心儀嘅學校，我其實唔想自己做怪獸家長，盡量將壓力減低，因為我有時湊佢壓力都幾大，驚湊得佢唔好，俾自己好大壓力，如果我再諗埋學校，我諗真係唔使瞓，我都係一步一步，隨緣啦，差唔多到搵學校，你會見到我排緊隊、報緊名。」

就算佢扭計 都覺得好得意

「我開頭覺得我係一個惡嘅媽咪，但係當我生咗佢出嚟之後，我發覺佢係俘虜咗我個心，佢笑、做任何嘢，就算佢扭計，我都覺得佢好得意。之前啲人話唔好一喊就抱，我全部犯晒規，幾秒都忍唔住，我會盡量惡番啲，我發覺我依家俾阿仔恰緊我，我太錫佢嘞，又可能係爸爸做惡啦！」

想生多個！

剛坐完月嘅Sharon 2月就要開《溏心風暴3》，佢直言開工會唔捨得個BB，「盡量唔做咁長時間先，到拍劇真係要長時間嘅時候，我喺TVB咁多年，相信我都好快適應，同埋好彩屋企有姐姐(家傭)同陪月姐姐take care，我都會安心少少。」

問到有冇諗住趁後生，即刻追多個，Sharon就話「依家諗住做番嘢先，做下嘢，同埋等我handle到湊佢先，因為第一次做媽咪，未熟練，我都希望俾多個妹妹或者弟弟佢，將來有機會我想生多個嘅！」