椰子螺片豬骨湯

滋潤開胃 椰子螺片豬骨湯

親子好去處

廣告

表妹嚟食飯,我就緊係要煲返個靚湯俾佢飲,見屋企仲有一份螺片,所以就嚟煲返個 椰子螺片豬骨湯 ,清熱之餘仲可以滋潤 養肺 一下先~

撰文:小小豬KINSEY
圖片:小小豬KINSEY

養肺 又開胃 椰子螺片豬骨湯
依個湯都係賣椰子姨姨教,我去問佢有咩材料可以配螺片一齊煲而又啱依家節氣,佢就介紹我煲依個湯,因為可以生津止渴、清熱利尿、潤膚養血同埋潤喉 養肺 化痰,最重要就係話對小朋友開胃都有幫助。

一聽到飲完會開胃,就當然即刻買齊材料煲,因為小小豬飲多啲就會開胃啲,咁就可以肥啲啲啦!a(嗱…澄清先….我平日都冇刻扣小小豬食糧,只係唔知點解佢食極都咁瘦…唉)

材料:

椰子一個、粟米一條、馬蹄約十粒、螺片四片、南北杏一湯匙、豬骨$40~

今次用嘅係馬來西亞椰子,老闆娘話喺椰子類嚟講係最有益嘅一種,對止咳化痰、脾胃倦怠同埋食欲不振都有功效。唔識開椰子唔使驚,因為老闆娘都好樂意幫你開,仲會俾埋椰子内嘅椰子汁加以加埋落去一齊煲湯。(如果買唔到馬來西亞椰子的話,用普通椰子都可以呀)

做法:

椰子洗淨切條,佢嘅質地同印度椰子差唔多,所以都好容易難切成條嘅~

螺片浸至軟身;豬骨洗淨汆水~

南北杏洗淨;馬蹄去皮~

粟米洗淨切段~

煲內放約3L水,待煲滾後加入所有材料(椰子水除外)~

待再次滾起後,繼續先用大火加蓋煲約15分鐘~

再轉慢火加蓋煲1.5小時~

然後加入椰子水再煲多15分鐘~

最後加鹽調味就可以飲得~


因為唔需要加任何蜜棗..無花果依啲調味材料,所以初時都有少少擔心啖湯會唔夠味,不過飲落就真係嘩一聲,可能加左螺片關係,啖湯真係超甜,又帶有少少椰子香味,老公飲完一碗又一碗(其實我自己都飲左三碗..呵呵),仲勁讚好飲,成煲湯轉眼就清晒,唔係我叫住留返一碗俾我影相,我諗都出唔到文呀…哈哈哈!

身水身汗煲湯都係為左有人欣賞同九秒九被清晒,依個亦都係我鐘意煲湯其中一個原因!

溫馨提示:
– 由於個別人仕體質不同,所以大家記得煲之前了解下自己,如有疑問,請先向註冊中醫查詢!
BY小小豬的成長日誌