林海峰與彭羚補位教女
彭羚每周做義工
自細女林清於2004年出世後，彭羚決定退出樂壇專心湊女，外界紛指Jan大男人禁止太太拋頭露面，其實退下來是彭羚的決定，Jan一直支持她做喜歡的事，但她覺得做全職媽媽才對孩子的成長最好，沒有復出的打算。不過女大女世界，她開始有時間做喜歡的事，現全心投入做善事，每周都會做義工，偶爾會帶女兒同行。
一家經濟支柱Jan，沒因為要出外搵食，就少關心女兒成長，一有時間都會分擔湊女工作，盡量抽時間陪伴家人，一家四口經常被影到外出食飯、行街。談到與太太在家中的角色，Jan覺得兩人是互相補位，只要全心支持對方，就能互補不足，「我哋冇話一個做晒，因為每個人都唔係完美，都會有缺憾，如果互相支持對方嘅話，無論咩形式嘅支持，其實都係互相補位，當你自己有咩做得唔好，對方就可以填補，所以冇一定嘅角色，係不斷走位。」
亂作故事氹女瞓
與女兒的溝通，相信是兩人要互補的地方。女兒小時候，Jan有如大部分父母講bedtime story，口才了得的他當然不是照書講，而是天馬行空作故事與女兒溝通，並非為教育而講。「我唔係教育佢哋，唔好咁講，係佢哋教緊我啫，我每日都被教緊。我都會講吓一般嘅書，而另一類型每個屋企都有，就係冇類型，意思就係個老竇亂kel咁講，見乜講乜，作啲古仔以為好好笑，最後自己瞓着咗嗰啲，正所謂真係亂kel咁講，唔可以用第二個字形容，好多老竇都係瞓喺度同細蚊仔亂作古仔，都係創作嚟嘅，創作一啲天馬行空嘅古仔，無無聊聊，好得意咁，都係為咗氹細蚊仔笑啫，不過第一個瞓先永遠係父親。」
女兒長大少溝通
Jan日頭要開工，夜晚的bedtime story時間都留給他，太太就少講，「太太就用另外一啲時間溝通，我哋會分布唔同崗位，大家互相補位，因為張床好窄，冇理由三四個人迫埋一堆，你迫埋去，我就搞第二啲嘢；我走咗之後，佢咪上位囉，我又去做第二啲嘢，哈哈！」
兩個女逐漸成長，已經沒再聽爸爸亂作的bedtime story，如大部分青少年一樣，轉投電子世界，與爸爸的溝通日漸減少，Jan也無可奈何：「以往家長可能為搵食造成問題，再遠啲講緊打仗冇飯食，依家唔擔心冇飯食啦，不過唔知啲飯邊度嚟啫，依家只係擔心呢樣嘢（電子產品）咋嘛，屋企成員多咗呢個先係最大問題。」
全家靜做低頭族
面對電子產品入侵每個家庭，詭計多端的他也沒辦法，沒因此起家庭衝突已經算好彩，「我諗呢個係整體地球趨勢，唔關佢係咪大個咗事，係手機同電腦進步得好犀利，係我哋嘅強敵，你冇辦法擊敗佢㗎，呢樣嘢太龐大，基本上每日都要面對，總之唔好搞到有家庭慘劇，已經算過到一日。幾多人為咗叫仔女『好擺低喇！』然後擘面擘成日，或者好耐冇偈傾，都係因為呢部機。」林家沒有因此鬧交，不知是好事或壞事，「我哋屋企好靜，一返到去大家都係對住部機，冇機會鬧交。」咁咪好少溝通？「唔係呀，依家全世界都溝通得好密吖！」
話雖如此，Jan與外界緊密溝通，但與女兒的說話十隻手指數得晒，「我哋差唔多可以記低每個月大家對話嘅字數，如果我問佢嘢，答超過五個字已經係突破極限，無反應係正常；點頭我已經覺得，都幾尊重你爸爸媽媽喎；答一個字呢，嘩！皇帝呀！」可能誇張化了一點，但現今父母確實面對同樣問題，仔女與電腦電話的關係，還親密過父母，「地球根本係咁樣，一係就搬去外星住。」
女拔轉讀國際學校
現今想遠離多媒體是不可能，連學校都用電腦做功課、做research，做學生都要與時並進。林泳和林清皆讀拔萃女小學，但家姐已轉讀至漢基國際學校，始終傳統名校讀書壓力大， 林海峰 及彭羚希望女兒讀得輕鬆點，即使學費由女拔的每年38,000元，暴增至超過20萬，也在所不計，召開家庭會議後決定轉校，性格開朗的林泳好快就適應新學校。
國際學校風氣自由，衣着都開始西化，長得高大的林泳都愛短褲出街，Jan覺得女兒高大，但對長腿有保留，「望佢要抬高少少頭，遲啲要用尊敬眼光。長腿唔知係唔係，但褲好短。」
Jan即使想阿女多穿長褲，阿女都唔會聽佢支笛，已決定放手由她們自由發展，「我已經開始唔諗佢哋啲嘢，真係好鬼死煩，屋企除咗工人我叫得郁做嘢之外，其他都叫唔到，你叫佢坐佢就企，你叫佢企佢就坐，所以你問我親子嘢我真係答唔到你，有啲家長連工人都叫唔到，所以我點分享？見步行步㗎咋，所以你問我係一個點樣嘅爸爸，就係見一步行一步。」
對上一個問題，就是請Jan形容自己是一個怎樣的爸爸，他想了良久，都答不到，「好難答……其實每日遇到一啲事，我哋都係盡量做好佢，我哋都唔知自己係咪做到最好，但只要抱着呢個態度嘅話，我想總會做到一件事，令自己覺得今日冇白過。所以點樣做一個好爸爸，有時未必你想做就做得到，通常想嘅時候係做唔到，所以我覺得唔好想太多，呢一秒個小朋友肯聽你講故事你就講，呢一秒佢唔聽，你就唔好講囉。」
林海峰 的屋企英雄
林海峰 百足多爪，讀設計出身的他將踩入繪本界，為「青少年及兒童繪本比賽2016」擔任評審，明年會推出親自撰畫的繪本，義賣收益將捐助黑暗中對話（香港）基金會，支持殘疾人士成為人才。比賽主題為「超能英雄」，以殘疾人士為主角，鼓勵青少年及兒童透過畫繪本，了解社會上殘疾人士的生活及需要，10月15日截止報名。每人心目中都有英雄，林海峰屋企幾個女人，誰是他的英雄？你萬萬都想不到，他的屋企英雄竟然是……
●撰文：Ling
●攝影：黃大立
