幼稚園面試

幼稚園面試大忌 +常見面試問題 + 輕鬆面試分享: Be yourself

育兒

廣告

幼稚園招生開始

唔經唔覺已經進入9月,又係幼稚園招生報名程序開始嘅時候了。幫小朋友報考幼稚園可以話係爸媽的「大 Project」,要預備同做的功夫好似沒完沒了,由揀學校、排隊拎form及交form(依家已經好多幼稚園可以online報名)、幫小朋友面試做預備等等,好似每一個step都要好謹慎小心。作為家長都會四出打聽自己心儀幼稚園的收生情況,如果有面試機會,有啲家長亦可能會嚴陣以待,催谷孩子學習面試技巧,甚至會報讀形形色色面試班。

 

撰文︰荔枝孖媽
部分圖片︰新傳媒資料室

分享面試資訊

荔枝孖媽自問上年N班至今年K都沒有做甚麼預備功夫,上年他們面對人生第一場面試,出發前我只是跟他們說去好好玩,開開心心的做返自己就好了。我們一共報了2家N班,結果一家是備取生,另一家最後收錄了,但由於分派到下午班,所以我們放棄了。不過無所謂啦,就留返出年K先開始正式讀書,再玩多一下無妨呀。雖然我哋面試的經驗其實唔係好豐富,但我都將之前睇過的一些資料,整合成一個簡易版同大家分享,方便大家。

我深信2018年K嘅學額應該係足夠,問題只係大家可否入到心儀的幼稚園,仲有好多家長會放眼睇,為升小學做好準備。

面試宜忌

1. 家長勿搶答︰首先,家長最好可以放鬆心情,因為如果家長出現過分緊張的表現,有機會會影響面試結果。而其中一個面試大忌就係面試個時,家長幫小朋友搶答呀。

2. 不要給小朋友壓力︰相信大家都知道小朋友面試當日的表現其實係學校取錄關鍵,但要咁細個小朋友控制情緒其實唔易,與其要佢哋上面試班背哂所有面試題目的答案,倒不如保持良好心態,比小朋友輕鬆啲,Be Yourself做返自己無壓力,小朋友情緒自然可以比較放鬆啦。

3. 避免哭︰如果由頭喊到落尾,真係好大可能影響表現,喊就可能無法完成指令,老師想評分都難啦。

4. 父母陪同︰仲有聽好多朋友講,最好由父母陪小朋友去面試,雖然可能返工有時真係好難請假,仲要報咁多間in咁多間,時間真係有啲難安排,但聽好多朋友講,老師通常問完陪小朋友去的照顧者(祖父母) ,小朋友的父母點解無一齊來之後,就無再同照顧者傾下去,轉去同其他家長傾,咁好可能呢方面大家都要留意啦。

5. 留意家長跟孩子相處表現︰其實面試唔只係小朋友嘅事,家長亦都係評分對象之一,意思唔係要考家長識啲咩知識,反而好多學校著重家長同孩子相處個陣表現,所以家長記住留意唔好即時搶答,亦盡量唔好不斷咁催逼小朋友要快啲答、快啲同老師講!小心因為咁而可能會失分呀。

6. 家長勿緊張︰因為面試個陣,老師其實係希望睇到小朋友自己的反應,如果家長太緊張,心急咁催逼小朋友作答,甚至幫孩子搶答,會令到老師好難睇到小朋友本身嘅表現,這樣更會有可能扣分。同埋當家長太過緊張個陣,小朋友其實都會feel到,咁只會令小朋友亦一起緊張,甚至怯場。所以我覺得比小朋友保持自然嘅一面,等老師可以觀察到他們嘅表達能力咁就可以好夠了。

10大常見的家長問題

依家有好多幼稚園都會用問卷形式來比家長填,一係就係填寫申請form個時,一併交回;另一種就係面試當日老師派比你即場填。老師亦有機會係面試個時即場再問,所以有啲問題家長都應該自己心中有個大概的標準答案。

仲有呀!家長要記下學校的背景、理念,令自己可以簡單而重點咁回答。最重要就係填問卷就要保持真實、切忌浮誇。如實講出小朋友的學習經驗同能力。

以下幾題都係一啲比較常見家長面試問題,大家可以參考下︰

– 點解會想揀我哋學校

– 你對小朋友有咩期望?

– 你對學校有咩期望?

– 小朋友平時係由邊個照顧?

– 平日會同小朋友去咩地方?

– 假日會同小朋友去咩地方?

– 小朋友係唔係已經戒咗片啦?

– 小朋友有咩優點?

– 小朋友有咩缺點?

– 小朋友性格上有咩特質?

其實大部份都係如實回答就好了,只係缺點就想想盡可能避重就輕,令老師想到呢個缺點都可能同時都係優點。

從玩遊戲中看同輩相處

當然除咗父母之外小朋友當天表現亦都好重要,小朋友可唔可以定定地坐係度,老師同家長傾計時可以靜心等待。仲有係遊戲時小朋友同人的相處,分享,交流等。情緒係點都係老師會睇來評分的。亦有啲可能係玩matching、認顏色,大小、形狀、考下動物名稱、食物、交通工具等。而一般積木、穿珠仔都係幼稚園面試常見的。當然小朋友的眼神動作都係老師會觀察的。

Be Yourself 孩子做回自己

與其話幼稚園面試由入門口一刻已經評緊分(睇小朋友識唔識有禮貌問好︰good morning、稱呼老師等等),不如日常把常規基本的都同小朋友一齊做、一齊玩,同小朋友更親近,到時小朋友有佢最信任嘅人係身邊,自然會發揮得更好啦。

至於一切其他的壓力就交比我地大人啦,溫下學校background,諗定啲答案。小朋友方面就由他們自由發揮,表現出真實自然的一面。唔好咁細個就要佢地死記硬背面試班的所謂嘅model answer啦。

回想一年之前2個小人出門前我跟他們說好好去玩一場,做返你自己。一年之後我亦會同樣跟他們說Be Yourself,做返你們平常的自己,保持禮貌,自自然然對孖媽我來講已經足夠了。

相信大家的小朋友都一樣,好快要面對人生中一些面試,比小朋友開心面對面試,無壓力先係最重要。希望大家的小朋友都可以有好好的表現,做返自己,入到大家心儀嘅幼稚園啦,加油!

 

我和孖寶的Facebook Page:荔枝與孖寶

我和孖寶的 Instagram IG#:laichimama

If there is any question or you looking for me and the boys, please feel free to contact LaiChiMaMa via Email:[email protected]