Family Car 必備音樂專輯

專欄

廣告

今次想同大家介紹電影《完美巨聲幫》(Pitch Perfect 2) 嘅原聲大碟,因為裡面嘅歌曲都係好開心,大人細路都啱聽,又唔會太卡通或者偏向細路仔感覺。

最啱聽呢張專輯嘅時間就係朝早開車出發嗰陣,因為 a cappella 好聽之餘,感覺好輕鬆,人都開心啲,令人精神晒,聽到音樂會好想郁,好想快啲出發,成個旅程都會充滿精力同活力,而小朋友仲會喺車度一齊跟住音樂打拍子,身體揈嚟揈去,好似想跳舞咁,忍唔住 move your body!^^

專輯內有一首歌叫 “Flashlight”,主唱係 Jessie J,呢首歌好好聽,好多小朋友聽一次就識得唱,洗腦程度拍得住 “Let It Go”!聽聞而家有兒童合唱團都教緊呢首歌呀!Keicy 聽到呢首歌一直咁哼,揈晒手咁樣添!

另外發現有好多首以前好熟悉嘅歌,包括 ”Low”、”Shake Your Booty”、”Jump”等等好 hyper 嘅歌,而家新嘅 remix 版本延續開心感覺。

呢張專輯係家庭車必備,有小朋友乘客嘅車一定要有一隻,大家都會聽得好開心。知道有家長朋友嘅座駕長期播 ABCDE 歌或者播相關影碟,會聽到好攰,有時都想聽輕鬆啲嘅歌,而呢張專輯就夠晒 fresh,大人細路聽都一樣咁開心!

連咬住奶咀嘅 Par Par 都聽到好 high 呀!:)

FB: KeicyKK