【澳門親子之旅】南灣湖畔暢玩天鵝水上單車

由於我地今次就係住氹仔酒店，所以安排活動方面就會第一日係澳門市玩，第二日先留係氹仔。我真係期待嚟南灣湖玩天鵝水上單車，所以一落船就即刻拎埋晒啲行李就去玩啦！

坦白講，澳門啲路真係唔識分，佢地啲名又古古怪怪咁，所以我都真係唔多識路。好在有澳門返工嘅舅父仔，我想去邊度玩就一早SEND俾佢，佢幫我搵定搭咩車，之後再加埋GOOGLE MAP，就可以識得去玩啦！

原來去南灣湖都好簡單，係港澳碼頭搭32號巴士(往旅遊塔)，係區華行前地站落車(有一間麥當奴，對面就係前澳門督府)，車程都係大約15分鐘就到啦~

一見到個湖，真係好靚呀，小小豬都急不及待加快步，要快快腳去玩啦~

嚟澳門玩水上單車我地都唔係第一次，上次同黑沙郊野公園都玩過一次(按此重溫)，嚟澳門玩就真係有一個好處，就係真係好抵玩，二十蚊就可以玩半個鐘啦~

好在有舅父仔提一提，由於係澳門政府所舉辨，所以活動就只可以俾澳門幣，所以平日唔會唱澳門幣嘅我地，今次都唱左少少為左依個水上單車~

我地買左飛之後，就向小碼頭出發~

小碼頭已經有好多上水單車等緊我地，當然我係為天鵝而來，緊係玩$20半小時嘅天鵝先啦~

大小朋友著上安全救生衣就可以去玩啦~

YEAH….我地出發去玩啦~

玩水上單車就要五歲以上嘅小朋友先可以玩，小小豬就夠歲數，不過佢腳仔都未夠長，基本上全程咪又係我一個人踏，佢就負責控制左右~

坦白講，一個人踩真係攰到冇朋友，不過周圍環境咁靚，小小豬又玩得好開心，所以攰少少都係值得呀~

超級鐘意依個天鵝水上單車，外型靚靚絕對係呃LIKE首選，加埋周圍咁靚又有FEEL，雖然就真係攰左少少，不過真係好舒服，話咁快就過左半個鐘，要職員哥哥開咪叫我地返小碼頭交船呀~

原本小小豬都想再玩多一轉，不過我對腳又真係冇咩力，所以就去行一陣休息下先。原來南灣湖除左有水上單車之外，仲有藝墟市集，不過因為大部分都係星期六日先會開，所以今日就只有幾間睇下~

行到攰就係時候休息一下，原本我地就打算行返去麥當當食，不過行過見到有間CAFE，所以就嚟試下啦~

依間CAFE仲係旅遊學院學行嘅實習單位，所以都應該要多多支持呀~

食物種類都幾多呀~

小小豬仲諗緊食咩蛋糕~

我地ORFER左食物之後，就可以到外面嘅茶座搵靚位FEEL下啦~

除左蛋糕之外，全部都係即叫即制，不過等都唔係太耐，大約十分鐘左右就送到啦~

雖然係學生實習嘅店，不過食物質素都一啲都唔錯，尤其係個三文治同埋杯南瓜橙果汁，老公仲高度評價呀~

休息過後，小小豬想玩多一轉水上單車，既然佢鐘意加上又唔貴，山長水又遠嚟到，就當然要玩盡佢啦！

原本今次只係由DADDY陪小小豬玩天鵝，不過依個小小豬話我地係一家人，緊係要一齊玩大嘅水上單車。就係佢依一句說話，我地就坐$40半小時嘅水上單車啦~

其實都真係唔多抵，$40可以玩天鵝兩次啦，不過小小豬既然有一個咁好理由，加上又可以三個齊齊親子一返，所以都係值得嘅~

今次我醒目，全程交由佢兩父子負責，一個負責踩，另一個就負責控制方向~

我就專心欣賞周圍風景，享受舒服嘅一刻~

可能有左第一次玩天鵝嘅經驗，加上又有DADDY同行，依一次明顯小小豬係更加投入，全程講不停口，真係更加興奮呀~

老公都對我依一個行程點非常滿意，佢話依啲文青地方先係啱佢嚟，不過我人覺得依個地方又真係唔錯，好啱一家大細嚟親子玩樂一返，有得玩水上單車(記得五歲以上小朋友先可以玩水上單車呀)，又可以行下特式市集小店，仲有可以去CAFE食吓嘢FREE下，舒舒服服就可以玩一個下午。

一個咁好嘅地方老公都已經話下次嚟澳門要再嚟多一次，感受下文青氣息哦(佢依啲係偽文青…哈哈哈)！

BY 小小豬的成長日誌