陸永

陸永︰猴年搵Do姐拜年

育兒

廣告

嚴冬過後迎接猴年,外形高高瘦瘦似靈猴的陸永,今次帶同兩隻「小馬騮」一穎和一心與大家拜個早年,祝未拍拖人士有大量異性「猴」住,想賺錢有大水「猴」射住,「猴」嚨有問題的都立即好番晒!恭喜恭喜!

陸永指兩個女雖似馬騮般活潑,但不算太曳,只是經常投訴對方,自己就像法官上身為家事審判!在家做法官,但出去一見到Do姐(鄭裕玲)即恭恭敬敬,驚被Do姐鬧,其實Do姐好關心他兩個女,每星期都問候,經常叫他send相再分享給其他姊妹。一直不敢帶兩女親自見Do姐的陸永,覺得猴年是合適時候,正籌備約Do姐拜年。

 

Do姐每周問個女幾大

陸永在《Do姐去shopping》節目中一句do did done紅爆網絡,Do姐變Did Did姐,翻睇十次都咁好笑,觀眾希望節目有續集,不過陸永話暫未有添食計劃,「Do姐好忙㗎嘛!」私底下陸永與Do姐都好friend,非常關心他兩個女,「Do姐每個禮拜都問我個女幾大,可能佢覺得小朋友真係大得咁快。」
一穎和一心已分別4歲和近3歲,陸永至今仍未敢帶去見有潔癖的Do姐,「好細個Do姐都話想見面嘅,但細個好怕帶佢哋出去,好多屎尿㗎嘛,Do姐最怕呢啲,平時都係send相俾佢睇多,佢會同啲好姊妹一齊睇。」兩女大個已識去廁所,陸永覺得是時候帶她們拜會Do姐,或者向Do姐拜年,「Do姐嘅級數唔係派利是㗎喇,應該派樓契!」

祝C君「過到今年」

新一年,陸永將與農夫的好拍檔C君(鄭詩君)聯同張達明搞棟篤唱,農曆年忙於綵排無假放,雖然好掛住兩個女,但盡量都不會讓囡囡探班,不想她們18歲前接觸C君。「唔想佢哋太快學到一啲人世間太醜惡嘅嘢,所以盡量都唔好見佢。我兩個女係好熱情嘅,都會同人拖手玩,費事C君叔叔以為佢哋特別鍾意佢啦,唔想佢有誤會。」
行開行埋總有機會碰面,如果農曆年期間撞到C君,陸永都會教定個女講指定恭賀說話:「萬一唔小心喺街撞到C君叔叔,會教佢哋祝佢『過到今年』!其實佢個人冇咩太大要求同目標,只但求過到每一年,咁諗都係一件好事嚟嘅。」

認錯「6號」做爸爸

陸永肩負養家責任,歌影視talk show瓣瓣開,努力搵錢讓老婆專心湊女,可能囡囡見爸爸比較少,現在睇電視《暖DD.食平D》竟然認錯老竇!「佢哋一見到6號就叫爸爸、爸爸!一來個名似啦,大家又係戴眼鏡,高高瘦瘦,搵勻成個娛樂圈都無,所以我唔會介意大家叫錯,因為連我個女都認唔出。」
兩個女平日都好支持爸爸演出,電視有爸爸都會捕實電視,《Do姐去shopping》當然都有捧場,聽到爸爸老師上身do did done都很好奇,陸永返到家就沒再解釋,一向都不會刻意培育囡囡英文,只會專一講廣東話。「英文佢哋會漸漸識㗎喇,大個就會發現識英文對做嘢有幫助,仲會多好多娛樂,可以睇美劇啦,聽英文歌啦,佢哋依家都開始自己培養英文娛樂㗎喇。」

最佩服楊張新悅

雖然陸永外表古靈精怪,但他的商台節目《兒童適宜》好拍檔朱薰大讚他是落手落腳湊女的好爸爸。節目會請好多專家、醫生及星級家長分享育兒經, 聽完一些育兒方法後,兩人都會返家嘗試,陸永最佩服的一集嘉賓楊張新悅,自己能獨力帶三個女去主題公園玩。「唔夠時間,冇人幫都唔係藉口,但我自己一拖二都做唔到,喺屋企湊都踢晒腳,帶佢哋行出條街都唔想,佢仲要一拖三去主題公園,真係好佩服佢。」
大女一穎已經上幼稚園,陸永為她選了一間好特別的學校,以中文傳授國際學校教育觀,完全符合其要求,「我一直都好欣賞華德福教學,卒之俾我搵到一間有齊華德福、蒙特梭利兼廣東話教學嘅國際學校。我都有擔心過銜接問題,但最緊要開好個頭,希望喺幼稚園讀得開心,等佢大個啲先面對local式,盡量將快樂延後啲。」小朋友教育那麼重要,陸永都立即認真mode,不敢亂來。

細女亂派利是

兩個女一穎和一心年紀只差年半,非常好姊妹,但偶爾都會爭執,互相投訴對方,陸永要法官上身判刑,「又原告又被告,我告佢今日打我呀、今日佢畫我塊面呀,一係就開始唔關自己事喇,佢畫梳化呀,佢唔肯着褲呀,好多呢啲投訴,所以我成日要做法官,不過佢哋唔係好曳嘅,即我判刑時,佢哋都樂於接受,會聽候法落,叫佢罰企都肯罰企嘅,都算係咁,只不過會一犯再犯。」
兩個女都像男仔頭般活躍,但大女的性格比較慢熱,喜歡個人活動,例如自己畫畫、閱讀;細女則像個PR,喜歡拿別人的東西派街坊,慷他人之慨。「例如去到一個地方,見到人哋好多散銀就攞走晒,再派番俾主人家。」

正因細女太慷慨,去年農曆年試過將爸爸的利是重複派給親友,陸永覺得好危險,「唔需要教講恭賀說話,但細女太好客,一陣搵到我啲利是就係咁派俾人,上年佢都將自己收咗嘅利是,不停向親戚派番出去,呢個危險嘅,蝕㗎嘛。」陸永覺得囡囡年紀尚輕,收到利是應該交由爸爸保管,那怎樣處理利是錢呢?「儲呀?唔儲!使咗佢啦!成日都諗要點樣使,幫佢哋買嘢定係點呢?但其實我使嘅所有錢都係幫佢哋使㗎啦,所以俾我使咪得囉,冇分別㗎喇。」
今年一家四口都會留港拜年,參加派對或招呼親朋為主,陸永笑言身邊經常有好多人,兩個女早已習慣,培養出不怕陌生人的性格。「佢哋習慣咗屋企好多唔識嘅人,識唔識都好啦,佢哋習慣咗同好多人一齊過,我諗我哋培養到佢哋最大嘅一樣嘢,就係唔怕陌生人!」

派幾多位數字利是?
陸永提到細女最鍾意慷他人之慨,好怕細女見到他的利是亂派街坊,蝕到入肉,問到今年會派幾多位數字,他謂準備了天文數字!所以絕對要教好細女,如何正正常常?利是而不會亂派,想知陸永派幾多利是?你估都估唔到!

●撰文:Ling
●攝影:溫俊鏘(部分相片由受訪者提供)

 

※如欲率先接收資訊,請讚好我們的FB專頁並於「已讚好/Liked」選單設定「搶先看/See First」,多謝支持。