Bob 林盛斌︰一屋女人係波士！
Bob出外拼搏，太太Pearl做好賢內助角色，負責照顧三個女霏霏、熹熹和機機，已分別近9歲、5歲半和2歲半，並經常為囡囡拍片影相，send給工作中的老公，幫老公叉足電！Bob坦言自己負責玩，教養工作全賴太太，他們正努力追多個仔，不過無論追唔追到， Pearl話生夠四個一定會封肚，四個已經好完美。
撰文: Ling
攝影: Jacy（部分相片由受訪者提供及facebook專頁）
麻甩BB詭計多
即將於復活節上畫的電影《波士BB》，找來Bob為主角波士BB配音，Bob曾為一些小角色如企鵝仔配音，今次升呢做主角。「今次角色外表係BB，內心係個好man嘅大人，好開心有機會配呢個角色，個故仔好得意，好正！」早前Bob亮相《Sunday Kiss》的facebook live，已獲大批網友大讚Bob與戲中BB餅印一樣，似足卡通版阿Bob！
Bob在工作上做波士，返回家中老婆才是大波士，管理家庭，自己只是做o靚，要聽晒屋企班女人話。
Bob透露今次配音最困難是BB個嘴好細，要特別留意嘴形配音及咬字方面。「好多謝配音領班去教我點配得好啲，同埋我要聽番外國原聲，原聲配得好好，好彩自己聲線嘅厚度、感覺同原聲相近，亦唔使扮BB聲，所以唔算太難配。」
波士BB與Bob除了外表相似，聲音麻甩，Bob覺得自己性格與他一樣詭計多端、招招積積，「甚至有啲對白都似我日常生活會講嘅嘢。」
大女有司儀天分
聲線與爸爸同樣帶點沙啞的霏霏，曾看過爸爸配音的電影後，提出想學配音，Bob希望有朝一日，一家人可為一套電影配音不同角色，相信會好好玩。不過，配音工作要等將來機會，Bob在家中先與三個女大玩角色扮演遊戲，「我做過好多次巫婆、王子，有時客串做公主、家姐，仲有怪獸、警察、消防員……我咩都做勻㗎喇，所有角色扮演難我唔到嘅！」
三個女之中，Bob發現霏霏對演藝最感興趣，尤其似他愛做司儀，「佢喺學校或出面啲團體都獲邀請做司儀，可能人哋知佢爸爸係邊個，咁我都睇過佢幾次現場做司儀，OK喎，佢識搞氣氛，例如人哋講嘢唔好笑，佢會哈哈哈扮好笑，唔喺稿入面㗎喎。」
熹熹和機機對鏡頭亦敏感，Bob閒時喜歡為她們拍下短片留念，一舉手機她們就會整古做怪；之前又帶過一家人拍廣告，囡囡都交足戲。Bob覺得三個女都有演藝天分，或許將來有機會入行，「希望咁多位老闆多多關照啦！」
做「貼地家長」盡力就好
Bob是DJ出身，經常踏上司儀舞台，對咬字及中文表達能力尤其看重，所以囡囡由細到大，Bob都有訓練她們的中文表達能力。「無論咬字、夠唔夠字正腔圓、語氣表達、說話長度、幾時抖氣等等，我都有教佢哋，尤其係咬字，好似一盞燈個燈、坐張凳個凳，冇懶音講得好好。」
Bob除了對囡囡的中文程度較嚴謹之外，便沒有其他要求，與太太從沒有催谷囡囡的學業，最多參加一些以玩為主的興趣班，例如兒童體操、溜冰、鋼琴等，大前提一定要囡囡喜歡才參加。「好似學琴係大家姐話想學，先搵個老師教；佢又話想學功夫，咪搵啲班俾佢上，佢玩完一輪發覺唔啱自己，覺得游水啱啲，咪轉去玩游水，我哋從來唔會迫佢。」
霏霏現就讀大角嘴一間津貼學校，下年度熹熹會跟隨入讀，Bob選擇做「貼地家長」，無諗過每月花過萬元學費讀私校、國際學校，甚至拉攏人事讀名校。「爸爸媽媽都係咁長大㗎啦，喺屋企樓下轉彎嗰間學校讀。只要佢哋完成功課，考試盡力，分數正常合格，我哋已經覺得好好。」
教女做個普通人
Bob忙於賺錢養家，照顧三個女的重任落在太太Pearl身上，Pearl教女心得是凡事從女兒的角度去想，並教她們做個普通人，能做一個普通人已經合格。「比普通人做得更好就喜出望外啦，就算佢只係做到普通人，我都唔會氣餒。」
Pearl覺得三個女各方面已做得很好。做人有愛心、有禮貌、 懂得尊師重道，性格仲幾精叻，她逐一點評道：「大家姐似蠱惑仔，夠聰明，做嘢好快但唔精，二家姐似將軍，有大將之風，佢可以做得好好，視乎佢做唔做，佢係比較懶；細細妹則算係智者，喺軍隊佢就係軍師，佢係精人出口笨人出手嘅精人。」
三個女人一個墟，三個聰明女相處時偶有爭風呷醋，但Pearl自小告訴她們是同一父母所出，同樣是父母的禮物。「呢個世上只有你哋幾姊妹係同一爸爸媽媽，就算好朋友都係唔同父母，所以無論你哋點嗌交都好，最後你哋都要愛錫對方。」
養六個女人要過億
N年前「風之后」李麗珊話生一個要400萬，現在連通脹計算就不止此數目，Bob要養三個，更積極製造第四個B，還租住加多利山大屋，Bob的開支十分巨大，坦言要再努力搵錢養家。「仔都話求其俾啲嘢佢食、俾啲嘢佢玩，但女唔得，女仔啲嘢精緻啲，又貴啲、巴閉啲，你諗吓一個女朋友使你幾多錢？我依家屋企有三個女朋友，加埋我老婆，仲有兩個工人，佢兩個都要氹㗎喎，唔止千幾萬，億幾先啱呀！」
Bob是出名的工作狂，密密接job做司儀、拍廣告，更開騷做棟篤笑、開製作公司做波士，一切全為家中四條Queen。「希望屋企人有個舒適生活，唔需要太多顧慮，可以做自己想做嘅事。我自己使嘅錢唔多，物質需要亦唔多，好多時只係為日後老咗同太太積穀防饑。依家幾個女嘅生活費、學費、興趣班、玩樂費、旅行費等等，都係我嘅使費，所以我要好努力一蚊一蚊搵返嚟。」Bob早兩年曾因過勞入院，現在經中醫調理後，身體狀況改善不少，惟工作之餘，要多爭取時間休息。
拒絕送樓做嫁妝
養大三個女可以帶來三個仔，有六個人愛錫自己夠幸福，Bob憶起有次與細細妹機機玩結婚遊戲，都泛起一絲感動。「希望啲仔對佢哋好好啦，起碼似佢哋爸爸咁靚仔先啦，唔使好有錢，戶口求其有幾千萬，有十層樓揸手就OK㗎喇！」講笑啫，揀女婿講心唔講金，「唔使一定要有樓啦，只要對我個女好就得，你對佢好就自然會努力工作，提供一個好嘅生活質素俾佢，到佢哋建立家庭生小朋友，即係我個孫啦，你都會好好照顧佢哋。」簡單而言，做Bob女婿的條件只要是負責任的男人，有擔當，願意好好照顧他的女兒就合格。
有報道指Bob買樓送女做嫁妝，Bob斷言絕不會發生，自己又不是富豪，最多送龍鳳鐲。「我唔係大劉可以送紅寶石之星、用兩億送鑽石俾個女呀！我唔係孤寒個女，我係唔想佢哋攤大手板，爸爸就會送層樓，你要自己努力搵錢買。如果佢哋真係需要借錢，爸爸亦有能力嘅話係可以，但記住有借有還，只係低息啲，要寫借據，因為啲錢係爸爸搵返嚟㗎。」
