【小朋友返工學理財】未來事業所@奧海城

[avrviframe id=”https://www.youtube.com/embed/kMgQwSHwBOQ”] 「未來事業所」應該可以話係今個暑假最多小朋友期待嘅活動頭幾位~

當然啦…有得學大人返工之餘，返工之後又可以有人工賺錢，之後又可以揀儲錢落銀行賺利息，或者買糖買餅，又或者可以捐俾有需要嘅人，仲唔係既玩樂又學到理財智識~

小小豬都唔理咁多，佢最開心就係話可以去返工，所以快快手就去返工~

第一份工就係去做小郵差啦~

小郵差嘅工作就係幫手分信同派信，當中姐姐們都有教小朋友一些郵局小知識，小小豬一放工就即話我知寄信一定要貼足夠郵票呀~

第二份工就係去做小警察，著上制服嘅小小豬又幾型仔哦~

小警察就係幫手捉小偷，幫忙從幾個疑犯嘅手指模..腳印..唇印搵返個小偷呀~

依份工都要幾細心觀察，好在小小豬都完成到，成功捉到小偷~

第三份工就係去做小護士，幫手照顧BB呀~

不過唔知係唔係小小豬都好驚細個嘅BB，所以佢初時真係完全唔敢抱，好在最後佢到放膽去完成所有任務，最後仲有點唔捨得佢個BB添~

之後就係去做小空中服務員，依一環節我地家長都可以有份參與，齊齊扮做乘客呀~

可能係之前我地係其他活動都扮過空中服務員，再加上早前又搭過飛機，所以小小豬都不知幾投入，仲做得唔錯添~

接住就係去做小建築工人，小小豬都係第一次接觸依個職業，所以一開始時就不停問題少年上身，好在場內哥哥都好詳細又耐心咁同佢講解~

小朋友們要合力砌水管同起磚僑，仲有砌返啲安全標誌添~

最後就係去餐廳做小服務員~

依個小小豬平日都係屋企扮待應，所以工作對佢嚟講都真係完全冇難度呀~

平日係屋企叫佢幫手掃地都冇咁落力，今次就出盡佢所有力氣去掃，睇見佢都唔知好嬲定好笑呀~

返左大半日工，小小豬就賺到人工買嘢食，佢仲好乖咁買多支檸檬茶俾我，話多謝我帶佢嚟玩，嗰一刻都真係有點感動添~

另外，小小豬仲將佢人工嘅$70捐出去，佢話可以幫助有需要嘅人(Ummmmm……真係佢自願捐出，我冇迫佢呀….哈哈哈)~

真心覺得依個活動係好好玩，既可以俾小朋友體驗一下返工，又可以等小朋友學下自己管理財產，所以都真係幾有意思。不過…活動真係太受歡迎，所以好多職業名額都好快冇晒，所以我地家長都要早少少去排隊先拎到遊戲籌啦！
More Information :
錢家有道 X 奧海城
未來事業所
日期丨7月17日- 8月31日
時間丨12pm – 8pm (平日) 12pm – 9pm (週末)
地點丨奧海城2期地下主題中庭
年齡丨4-10歲 (建議)
詳情丨http://futureme.hk/
– 憑奧海城消費：憑奧海城最多2間唔同商戶即日電子貨幣消費滿港幣$300之發票，可換領體驗劵1張

– 或 奧海城Olympian Kids會員：憑500 Kids Points即可換領體驗劵1張
BY小小豬的成長日誌