【狂歡泡泡池…大水桶】海洋公園夏水禮

為左爭取時間，所以放左學之後就即刻出發去玩(好在…依家返學唔洗帶大書包，咁去玩都方便好多….哈哈哈)~

[avrviframe id=”https://www.youtube.com/embed/m8J6AIXoYIA”]

話個小秘密俾大家知，小小豬每次浸浴洗白白都會同佢啲鴨仔朋友一齊玩，所以我地第一個目的地就係去兒童王國探小小豬嘅鴨仔呀~

搖控船換上左鴨仔做駕駛員，可愛度爆登呀~

今個夏水禮其中一個重點，就係依個鴨仔池，睇住啲四千幾隻鴨仔係度游游游，都真係幾治癮。點解係四千幾？宣傳又話6500隻？職員哥哥話如果放晒6500隻鴨仔入池，就游唔到水，所以就只有四千幾隻。
依度都有一個考眼力小遊戲，因為係咁多大大細細鴨仔中，其中一隻條尾唔同嘅，不過掛住心急去玩嘅小男孩就冇心機搵啦…哈哈哈~

玩左一陣我地就去海龍王餐廳吃個午餐先~

小小豬都係第一次嚟海龍王餐廳，我地仲安排坐係玻璃窗前，可以邊食邊睇咁多魚係枱前游來游去，未食都已經覺得好興奮，個環境真係勁正呀~

小朋友就緊係食兒童餐~

但其實我地嘅目的就係……..「冰凍芭菲鴨」…哈哈哈~

開開心心又食左一個午餐~

食飽飽就到左去玩時間，第一站就係去玩「勁爆夏日障礙賽」，不過….小小豬因為未可夠1.2米，所以只可以睇住SY哥哥玩呀~

換好泳裝，就向「激FUN玩沙大派對」出發啦~

趁唔多人小朋友們就先去玩「泡泡狂熱」~

原本以為三小朋友可以齊齊係泡泡池激戰一返，不過原來係有高度限制，SY哥哥屬於大哥哥組別，所以佢只可以自己玩，幸好小小豬同子子可以同場，大家都有個伴~

小朋友們一見泡泡就發狂，小小豬仲成日將啲泡泡放上頭，佢話係洗頭哦….真係俾佢激C~

泡泡柱又嚟啦，唔好話小朋友，我地旁邊睇嘅家長都好興奮。小小豬直頭企定定係泡泡位，要令全身都係泡泡呀~

不得不讚在場工作人員，佢見小小豬全身係泡泡，就主動叫行過去，用水幫佢即時沖走啲泡泡呀~

之後就轉戰「童樂水隧道」，小朋友由左跑到右，又係個噴水圈不停跑，佢地就玩得開心，難為了我地家長，因為佢地跑跑下就衝埋嚟我地度，就係咁…..我地都濕晒啦~

終於嚟到重頭環節「超級巨沖」，上年要我捉小小豬去佢先肯玩，原本以為今年有SY哥哥陪佢就安心玩，但依個越大越細膽嘅小小豬始終唔肯，無論SY哥哥點叫，佢都唔肯玩依個”兜頭淋”~

係又想玩但又驚情況下，小小豬只好企係兩旁嘅菇柱下靜待傾盆一刻。大膽嘅SY哥哥玩左總共23次，仲帶點意猶未盡添~

今年除左玩水之外，另一主題就玩沙。在場有一位大師即場為我地展示沙雕塑，唔知佢依家雕緊咩動物呢~

「奇趣沙灘創作區」可以有工作人員教小朋友玩沙雕塑，不過兩個大小男孩都鐘情於玩水，所以就交俾子子同魚子媽努力堆沙啦~

當然唔少得兩幅6米高嘅奇趣沙雕，每一隻動物都雕得好仔細，像真度都真係勁高，健力士世界紀錄雕塑大師團隊真係好利害呀~

小朋友們玩得極度盡興，估唔到夏水禮都玩足兩個幾鐘，如果唔係六點海洋公園要關門，我估仲可以繼續玩呀！
我地走嘅時候先聽到工作人員話原來山上仲有一場「水戰大激鬥」，可以齊齊玩掟水彈大戰，仲有大批「動感水兵團」用特製水槍係地上畫出得意圖案。
唉呀….原來MISS左兩個遊戲，好似蝕左啲啲添。不過唔緊要夏水禮至八月廿七日，等我生日時，到時只買一張兒童票，就可以兩母子入嚟再玩過，抵呀….哈哈哈(師奶仔又嚟啦)！
 

BY 小小豬的成長日誌