值得紀念 與別不同嘅生日會: 生命的慶典 Montessori式生日會分享

article

廣告

謝謝孖寶的家人,陪他們一起度過了他們人生第一次蒙特梭利式生日會,因為聽從醫生的叮囑,孩子今年的生日不宜外出避免接觸病菌,所有簡單在家中同孖寶鍾愛的家人一起過生日,今年比較特別因為孖媽再去學習嘅原故,了解到很多蒙特梭利教學法,我亦有開始慢慢將自己學到嘅,用在兩個小人身上,希望可以同佢地一齊由生活中愉快地學習同成長。亦來跟自己打打氣,加油,比心機讀書呀!

講返今次蒙特梭利式生日會,其實係蒙特梭利教學法入面,賦予比每個人嘅「生日」一個很特別的名稱,叫做「生命的慶典」Celebration of Life。

傳統生日party嘅焦點通常都係禮物,食物同玩樂。蒙特梭利式嘅慶生方法反而係用咗好唔一樣嘅方法去慶生,主要係比小朋友去體會自己嘅成長歷程,以簡單易明嘅象徵儀式,加入一d科學認知,開啟小朋友對大地運轉同生命成長間息息相關嘅初步了解。

首先,用簡單的方法令小朋友明白地球同太陽嘅關係,比小朋友聽有關自己生命嘅故事,父母要幫小朋友預備一d相,由出世到以家。亦可以選擇幫小朋友製作海報,係彩色卡紙上貼上小朋友每個年齡嘅照片,可以加入一d說明文字,令大家可以更加認識生日嘅小朋友唔同年齡階段別具有意義嘅事,大家一齊欣賞。而我地就無製作到海報,因為我地希望孖寶都可以一起做,一起參予,所以我地改咗小小,而係同孩子一齊揀相,比佢地幫手放d相入相架嘅方法,而且相架亦比較方便佢地自己拎住展示比家人睇。

之後父母請準備12個月份的字條/flash card,更有心思嘅亦可以係每月份的字條上,顯示出相應季節,天氣。之後就可以分別將12個月份,字條圍成圓圈,將蠟燭放係中間代表太陽。

不過因為孖寶仲細,基於安全理由就改為由孖媽我製作嘅勞作太陽來代替真正嘅蠟燭。之後可以開始其他朋友圍埋一圈,問過生日嘅小朋友今年幾多歲,之後就將展示數字的字條比小朋友拎住,亦可以令小朋友理解基本數字嘅概念。

簡單咁話比小朋友知放係地上嘅太陽/蠟燭,就好似天空上嘅太陽伯伯,比生日嘅小朋友拎住地球儀,沿著地上嘅生日盤慢慢行。小朋友幾多歲生日就行幾多個圈。孖寶今年2歲行2個圈就可以了。運用易明嘅語句話比小朋友知呢個地球儀代表地球,亦即係我們地居住緊嘅星球,地球繞著太陽公轉運行,地球每一次繞完太陽,一年就會過去了。話比小朋友知地球需要花上一年嘅時間去圍繞太陽一圈,幫助孩子開始意識宇宙大地嘅奧秘,自己係宇宙間嘅位置。

呢個Montessori式生日會到尾聲啦,如果係用蠟燭嘅可以請生日慨小朋友吹熄佢,而我地呢就一齊大聲唱出生日歌作結,為壽星送上生日祝福!請孖寶同大家一起hug hug。

Montessori式生日會慶祝生日,簡單又有意義,雖然可能比唔上一般生日party嘅熱鬧,但係我覺得亦唔錯呀,蛻去其他嘅一切,將生日嘅意義回歸到最原始嘅一份單純,同家人,朋友一起欣賞小朋友嘅成長歷程。用呢個方法慶祝生日嘅重點係小朋友本人,隨著時間嘅推移,小朋友可以開始理解一年係有12個月,當地球繞著太陽公轉12個月,一年就過去了,運用呢種簡單易明嘅形象遊戲,孩子好易就可以明白自己嘅成長同地球,同埋太陽伯伯嘅關係,亦可以同大家一起再次體會小朋友嘅成長足跡。

謝謝你們來到給予孖寶的愛,we love you all!

P.S. 部份圖片節錄自互聯網

我和孖寶的Facebook Page:荔枝與孖寶

我和孖寶的 Instagram IG#:laichimama

If there is any question or you looking for me and the boys, please feel free to contact LaiChiMaMa via Email:[email protected]