飛躍進步女藝員｜姜麗文自爆未夠一歲母親拋夫棄女 父親秦沛為爭撫養權捱窮

撰文：東方新地 圖片：《1圈圈 星光背後》影片截圖、IG@lesleychianglove、東方新地圖片庫

飛躍進步女藝員｜姜麗文爆父親為爭撫養權變窮

姜麗文與父親秦沛感情深厚，日前在商台節目《1圈圈 星光背後》，姜麗文首度公開講親生母親

「我親生媽咪喺我1歲前已經走咗，我真係冇乜feeling，亦唔係嬲，爸爸為咗可以keep我同哥哥可以喺埋一齊，佢乜嘢都畀晒佢(生母)，我非常之感恩，覺得爸爸好偉大。嗰陣86年，啱啱贏咗《 癲佬正傳 》金像獎最佳男配角 ，佢再變番窮喎！嗰時阿爸為養家咩都接咩都做，我哋喺片場見證住佢拍戲好辛苦，覺得佢真係無得頂！」

重溫得獎場面｜萬千星輝頒獎典禮2021｜ 飛躍進步女藝員｜姜麗文

姜麗文喺眾多對手中脫穎而出，勇奪呢個獎項！姜麗文17年加入TVB，從唱作歌手轉型為演員，喺《愛回家之開心速遞》飾演外傭姐姐Liza為人熟知；而喺《星空下的仁醫》飾演嘅病童媽媽更令觀眾共情，首次入圍馬上飛躍，得獎實至名歸！姜麗文能夠攞獎，全有賴各位投票支持，大家一齊恭喜佢啦！

秦沛是「Long D爸爸」

在片場長大的姜麗文，看過秦沛在高溫40度下拍戲，兩兄妹深深感到父親的偉大，所以無論兒時讀書或出來工作，他們都會更加努力做好自己。由於年幼時已在加拿大生活，談到以前經常與秦沛分隔兩地，姜麗文說：「其實佢係『Long D爸爸』，成日工作飛來飛去，不過佢成日都寫嘢同畫嘢，又會送禮物畀我哋，等我哋覺得佢成日都陪住我哋。」

自資出碟 從來冇買過名牌

姜麗文曾與哥哥姜文杰自資出碟，以歌手身份在香港出道，錢賺唔到生活拮据，他們都從來不向父親伸手：「爸爸實在太勤力喇，佢已經76歲，我憑乜嘢用佢多年嚟儲嘅錢呢？佢係咪應該用呢啲錢同我媽咪(指繼母)享受生活過二人世界呢？我到依家都未買過名牌，自己生存到就冇問題。」即使秦沛曾提議出錢畀姜麗文買樓做首期，她都拒絕。

60蚊盒士多啤梨都買唔起

當姜麗文回憶與哥哥姜文杰耗盡20萬積蓄，製作三首歌的EP，就更加點滴在心頭：「我咃除咗租錄音室，仲要請樂手，攝影師同拍MV……好快已經使咗20萬。第一年做新人，我哋只賺咗萬幾蚊，試過窮到去超巿，想買一盒好想食嘅士多啤梨，60蚊我都買唔起，最後喊住走，好彩阿爸唔知呢件事，嗰陣時真係好辛苦！」

重提最傷心的一次

對於主持重提患抑鬱症，姜麗文承認是因為失戀導致：「我嗰時都唔知自己患抑鬱症，覺得失戀唔開心好合理吖！不過嗰個係人生最大嘅失戀，OH MY GOD！嗰個痛苦係到依家都…..所以我拍《星空下的仁醫》隨時都可以喊得出，因為當時嗰個Hurt好大！(當中係咪包括對方出軌？)OH！好老實講，我到依家都真係唔知！唉！唔好講呢啲……我試過三次想死，就係有呢個病，我依家先識得更愛、更錫自己！」眾所周知，姜麗文患抑鬱症前曾與鄭俊弘拍拖多年，因為這次情傷，她試過4年冇拍拖，17年終於覺得自己準備好，在朋友介紹下認識現在的未婚夫Pakho，二人一拍即合，至今都未曾鬧過交。

姜麗文訂製父親「顏爺」造型耳機外殼 網友神回：「你大我呀！」

秦沛女兒姜麗文（Lesley）在無綫電視劇《星空下的仁醫》中，演技脫胎換骨備受觀眾讚賞。Lesley近日在IG分享新搞作，竟然自製父親秦沛的經典電影角色「顏爺」耳機外殼，結果獲網友極速神回：「你大我呀」！

自製「顏爺」耳機外殼

秦沛女兒姜麗文（Lesley）至今已入行近10年，雖然星途一直浮浮沉沉，不過她因為早前在無綫電視劇《星空下的仁醫》中的一場喊戲，獲網民大讚演技大躍進，更人氣急升。Lesley近日就在IG分享新搞作，竟然搞笑地將父親秦沛在電影《五億探長雷洛傳》的經典角色「顏爺」相片，放在新耳機的外殻上，並留言道：「各位觀眾我的新耳機！！！依家唱歌永遠都會聽到阿爸同我講「你大～聲啲！」，獲網友大讚有創意，紛紛留言：「你大我呀」、「你沛得起」、「聽爸爸的話」等等。

姜麗文演技備受肯定

姜麗文在無綫電視劇《星空下的仁醫》中「喊出彩虹」！話說其中一場鄭嘉穎向姜麗文剖白其在手術室的女兒返魂乏術的戲碼中，不顧形象七情上面流下兩行熱淚，同樣大受觀眾讚賞，無不表示被姜麗文的眼淚感動而喊埋一份，事後姜麗文亦有在 IG限時動態中分享多則「表揚文」。

當喊包感動喊包

姜麗文演技受肯定固然值得開心，但她亦不忘發文感激同場的鍾嘉欣，表示與她一起工作時感覺很好，又大讚對方很溫柔，亦很尊重自己，令姜麗文在容易受影響的環境下感到舒適和安全。繼而又將自己與嘉欣的對話截圖在社交網站上分享，原來嘉欣亦被姜麗文的演出感動到，仲話睇到喊添！