愛妻號

【是咁的,3大愛妻號】關禮傑 黃智賢 黎振燁 都有一個可共患難的好老婆

娛樂

廣告

大台劇《是咁的,法官閣下》,雖然卡士唔算十分強勁,但係成個演員陣容,有新有舊,加埋一齊好有化學作用!巧合之處係,兩大男主角關禮傑、黃智賢,加上港男黎振燁,喺劇中都係飾演大狀,亦都係同太太識於微時,共過患難嘅「愛妻號」代表!

撰文:Joanne 圖片:新傳媒資料室、東方新地

劇中失婚 現實都係「愛妻號」

關禮傑、黃智賢同黎振燁喺《是咁的》都係飾演大狀,而且喺劇中三個人都曾失意於婚姻,不過喺現實中,佢哋都係對太太始於如一嘅好男人。

黎振燁:我成份糧畀晒老婆!

黎振燁喺劇中飾演嘅鄧大志,本身係喺政府做官,期後放棄鐵飯碗,再攻讀法律學位,跟黃智賢學師,再成為大狀。

同劇中老婆張名雅育有一子,不過兩人已經分咗居。

現實中黎振燁同太太喺中學時代已經開始拍拖,一直都夢想要做演員嘅佢,都得到太太支持,曾經入過訓練班,但係都係做啲唔起眼嘅小角色,到後來入咗港視,以為會有出路,點知港視又因為牌照問題,開台不成。

雖然事業失意,但係2015年向太太求婚,一開口太太就應承。冇婚照,冇擺酒,一切從簡,太太依然對佢默默支持,但係Jackson自己覺得對太太始終有所虧欠。

2016年,參選港男自爆已婚,憑「好老公」形象成為大熱,喺拉票環節中表示參選港男係人生奇迹嘅開始,喺台上對老婆發表「愛的宣言」,成功打動觀眾!

Jackson喺台上話:「佢仲辛苦過我,參加比賽之後,每晚都等我返屋企,第二日仲要早起煮早餐畀我食。」「只係想用一生中最重要嘅兩分鐘去感謝生命中最重要嘅人」。搞到太太喺現場聽到眼濕濕,場面感人!

贏咗港男,事業同人生都有個新開始,但係Jackson眼中依然只有太太,仲話而家每個月出糧,成份糧都係直接入落老婆戶口。

太太為佢捱咗咁多年,唔會白捱,Jackson話會為太太製造更多難忘嘅回憶,至於仲欠老婆一輯婚照,Jackson話一定會還,或者等到有小朋友之後,再一齊影。

黃智賢:冇咗老婆我會死!

黃智賢喺劇中飾演嘅范小宇,係個不善交際,但係會堅守原則嘅大狀。

同飾演劇中太太嘅王君馨,感情關係糾纏不清。

 

現實中,阿Ben有一個相愛27年,互相扶持嘅好太太。阿Ben更加講過,如果冇咗呢個老婆,佢一定會死。

阿Ben一直都好保護老婆,太太早年被傳媒追訪時,佢曾經表示:「佢係圈外人,冇心理準備,我老婆好細膽又怕醜,過往好少同佢出席首映同飯局。我作為老公要保護老婆,佢係OL唔想引起太多話題,要搞就搞我!(點𠱁番老婆?)將佢嘅相影得靚啲,唔影都影咗,可以點?」

阿Ben話同老婆結婚三年後已經傾過,諗好咗唔會生BB:「大家都知對方性格唔啱做爸爸媽媽,覺得責任好大,我哋冇呢個耐性,而且香港嘅教育制度或者社會,都令我冇安全感,唔覺得適合有小朋友,當然意外有咗又係另一樣嘢,個天畀你又唔同。我哋決定咗之後都冇再諗小朋友嘅嘢,反而會諗冇小朋友嘅好處,我覺得『無憾』就係唔好反反覆覆去後悔。」

 

家中養咗兩隻可愛狗仔,分別係摩天使女Cream Cream同T-cup貴婦女Pepper,依家已經六歲,冇生B計劃嘅黃智賢夫婦都當正佢哋係自己仔女咁錫到燶,不過原來黃智賢當初想養嘅係大狗,會養細狗全因遷就太太:「太太驚大狗,而且細狗易啲打理,就算唔得閒放狗,佢哋都可以自己喺屋企玩。至於揀狗女亦都係太太嘅意思,因為狗女嗲啲,又得意!」

關禮傑:要一攜手過度到金婚!

關禮傑喺劇中飾演嘅饒力宏James,成日都有唔同嘅女伴喺身邊,結過婚,又離過婚,同王君馨又會有感情線。

同范小宇嘅關係複雜,既係師兄弟,自細又係競爭對手,公司同住所,都喺正隔離。

關禮傑喺82年入行,可惜80年代係屬於「五虎」嘅年代,劉德華、梁朝年、黃日萃、苗喬偉、湯鎮業套套都係主角,所以捱咗6-7關禮傑都未擔得正,後來認識咗做空姐嘅太太,為當時事業未見起色嘅關禮傑不斷支持打氣。1990年,佢哋就結婚組成幸福小家庭。

曾經講過:結婚之後就不希望離婚。關禮傑結婚28年,同太太都係咁恩愛,到咗而家都成日會抴機機會同太太拍拖,燭光晚餐。特別日子仲會送花,畀個驚喜對方!

太太為關禮傑生咗兩個女,作鷹丈夫嘅佢,無時無刻都好體恤太太嘅辛苦,以前當佢出去拍戲,兩個女就得太太一個去湊,要一個人去面對所有壓力,所以關禮傑盡量每日都會同太太通電話,等太太有機會呻吓。

而家兩個女都大喇,兩公婆一得閒就會同兩個女一齊去旅行,愛家愛到不得了!

兩年前,佢哋結婚26周年,就請咗一大班親友一齊開Party慶祝,關禮傑公開同太太承諾,要同佢一齊攜手過度金婚!一個男人義無反顧咁對一個女人愛足30年,真係好難得呀!