朱智賢復出無期轉做山系KOL 寸嘴回覆網民指控
廣告
34歲朱智賢4月時斷正同人夫黎振燁上山食蛋糕後，立即被無綫放入雪櫃，潛水多月，依然未獲解凍，為自挽人氣，近日在YouTube開設頻道製作行山郊遊片，片中朱智賢刻意收起以往性感，幾乎素顏，更以行山比喻人生，大晒健康又正面的訊息，圖洗走負面形象。
文：東方新地 ｜ 圖：朱智賢IG及YouTube截圖
朱智賢自偷食人夫斷正後，一直潛水，近日突然密密更新社交網試水溫，不過IG留言功能卻轉為不公開。
朱智賢偷食人夫獲男友謝東閔盲撐
朱智賢近年備受力捧，拍劇戲份漸重，為了事業一直唔認同謝東閔的戀情，不過4月卻被爆背住男友謝東閔，因拍劇集《食腦喪B》戲假情真而搭上人夫黎振燁，雖然事後獲男友原諒兼喊住陪開記招，不過朱智賢形象已插水，全面停工立即放入雪櫃，被雪藏多月，曾傳復出主持《東張西望》，不過卻只聞樓梯響，一直未有確實日子。
朱智賢化身山系KOL自救
朱智賢潛水多時，近來重返社交網，密密出po，晒愛犬晒郊遊等健康生活，最近更在YouTube開設頻道上載行山郊遊片，最新一條片是以「香港三尖之一 青山 海拔581米 行山如人生 關關難過 關關過」做主題，以行山比喻人生，不過網民似乎唔多buy，更留言重提她做小三的負面新聞，又問「係咪教我哋上山食蛋糕？」、「不如改叫偷食記」，有網民問：「點解要做人小三呀？明明自己都有男朋友」，朱智賢終於忍唔住回覆：「點解要留言呀？明明自己乜都唔知」，死性不改，繼續寸嘴，網民繼續挑機，不過朱智賢沒有再回覆。
朱智賢開頻道訂閲人數不足四百
朱智賢被網民留言問點解做小三，寸嘴回覆後卻刪除了留言，不過網民繼續咬住唔放，質問朱智賢為何刪除留言，又將朱智賢的寸嘴留言再留一次，讓其他未見到的網民都睇到。朱智賢呢次試水溫，似乎唔多成功，嚟緊有份演出的劇集《踩過界II》即將播出，會在其中一個單元演出，不過據知無綫並無刪減她的戲份照樣播出。除了《踩過界II》之外，朱智賢還未播出的劇包括《愛美麗狂想曲》和《食腦喪B》。
