陳奕迅演唱會｜現場直擊7大重點 相隔9年再開紅館騷 打頭陣唱呢首歌！

重點1) 紀念品T恤、帆布Tote Bag最搶手

大會於場外設有紀念品專賣區，開騷前見現場約有80人排隊，大會安排歌迷並沒有特別安排手機下單，所以打算買紀念品的歌迷們，都要預留額外時間排隊。

紀念品包括由日本著名插畫家操刀的T恤、紀念版長袖衛衣、日本製造的背包、帆布Tote Bag、香薰蠟燭、貼紙、襟章等，售價由港幣$30至$4,100不等。最多歌迷買T恤和帆布Tote Bag，亦有不少操國語的歌迷上前買正版碟。

重點2) 徐濠縈母女坐鎮 + 甘比與女兒睇騷 四大天王都送上花籃 黎明爆金句

睽遺9年的首場紅館騷，當然吸引不少城中名人前來捧場，除有「臣嫂」徐濠縈母女坐鎮，還有甘比母女、馮德倫舒淇兩夫妻、馮允謙和林奕匡等捧場！

送花籃的包括成龍加房祖明、向華強、丁子高與楊千嬅、吳君如加陳可辛、任賢齊、劉德華、張學友、黎明、郭富城與小美、林嘉欣、林家棟、李克勤與盧淑儀、謝霆鋒、容祖兒、張敬軒、泳兒、陳曉東、王祖藍等。眾星的花籃都寫「Good Show」，唯獨黎明寫：「 一切順利 Good Luck…」果然是金句王。

重點3）三面台設計建下紅館史上最巨電子屏幕

對上在紅館開騷的鄭伊健採用3面台的設計，今次陳奕迅亦繼續源用3面台的設計，自從MIRROR演唱會意外後，紅館舞台機關設計更為嚴謹，一切安全至上。陳奕迅今次於場館之中，建下紅館史上最巨電子屏幕，橫71米高14.5米，屏幕由紅館頂一直伸延到台面，及兩邊山頂，帶給入場觀眾視覺上的巨大震憾，同步也展現了不吊大形物體，單是視象畫面與歌聲，也足夠令歌迷嘆為觀止。

重點4）陳奕迅太空衣上陣 打頭陣唱出《2001太空漫遊》！

頭場演唱會於晚上8點35分開場，演唱會以陳奕迅睡於床上發噩夢的影像作序幕，點題Fear and Dreams。陳奕迅身穿太空衣上台，打頭陣唱出《2001太空漫遊》、《人神鬥》、《當這地球沒有花》三首大熱歌曲為演唱會揭開序幕。

重點5) 首場心情極好 向老婆愛女派心

首場心情極好的陳奕迅，喺唱到《任我行》嘅時候，突然向觀眾拍心心，一開頭係向住太太徐濠縈和愛女陳康堤方向派心，之後再向全場派！唱到尾聲又特登擺Pose俾粉絲影相，仲話：「好想錫曬你哋呀！」

重點6) 剖白內心世界 怕自己「瞓咗唔識醒」

出名「吹神」的陳奕迅，今次演唱會為了讓自己能夠集中唱好每一首歌，所以都忍口忍到最後一首歌先開始一連串講足8分鐘。陳奕迅感性地感激在場每一位歌迷：「我都唔係好習慣講啲好Heavy嘅嘢，其實我係最開心可以花時間同大家一齊。年紀大咗就好容易喊添。其實我以前一路都keep住做，冇停過，所以就冇乜時間去思考。呢個Show等咗三年，等嘅時候又唔知下次幾時，諗嚟諗去就越驚，我咩都唔想做，我只係想做個show。」

提及疫情期間的忐忑，Eason甚至說，試過「驚瞓咗唔識醒」 ：

「我甚至驚到一個地步係瞓覺之前，係驚第二日起唔到身，係到諗如果真係起唔到身咁點算呢，我有咩要交代呢，我電話password洗唔洗話俾邊個聽呢，我銀行啲錢點算呢，要捐咗佢阿定點呢？我冇乜錢㗎咋！唯一一個辦法我諗到，就係唔諗，因為好多嘢我啲都控制唔到，我都只係唱歌就得。」

重點7) 演唱會理念 呼籲「活在當下」

陳奕迅今次演唱會全場貫徹著一個大理念，就是希望觀眾聽演唱會作樂之外，可以從演唱會中思考自己可以為世界做些什麼；人又應如何擁抱恐懼和夢想？過去已過去，未來仍未來，只有「當下」才是最重要。

重點 7)時隔9年再登紅館 完整歌單曝光！

現年48歲的陳奕迅，時隔9年的演唱會，一啲都冇兒戲了事。除了演唱會每一部分都好有故事，好有連貫性之外，陳奕迅更落力唱足39首，再Encore《遊離份子》。雖然一開始聲沙沙未開聲，但越唱越勇，唱足40首、總共換咗5套衫先散場，一班歌迷都非常滿足，表示值得等9年！

重點 8)有乜蝦碌位？

每次演唱會或演出都一定會甩嘴的陳奕迅，今次個場首場狀態大勇，上半場都沒有出現甩嘴、忘詞嘅情況。直到唱到最尾三首《致明日的舞》、《七百年後》同《我們萬歲》先開始甩嘴。但Eason都好識做，甩嘴之後都會擺pose俾粉絲影相，補番數！

演唱會歌單 歌迷溫定書

時隔9年開騷的Eason，準備了一連串的經典金曲！我們整理了Eason今次演唱會的歌單，一眾歌迷可以在看演唱會前溫定書！

1. 2001太空漫遊
2.人神鬥
3.當這地球沒有花
4.謊言
5.時代巨輪
6.想聽
7.黑洞
8.龍舌蘭
9.異夢
10.如果這一秒鐘你跟我講你不愛我
11.黑夜不再來
12.開心不了
13.告別婆娑
14.完
15.今日+垃圾
16.夢的可能
17.一個靈魂的獨白
18.任我行
19.人生馬拉松
20.請相信我
21. 四季
22.與我常在
23.忘記歌詞
24.Life Go On

25.大人
26.致明日的舞
27.七百年後
28.幸福摩天輪
29.我們萬歲
30. Party Medley : 閃、滑鐵盧車站、美麗有罪、隨意門、第五個現代化、放、笑死朕、打得火熱、重口味。

31. Encore《遊離份子》