陳自瑤王浩信屢傳婚變 重溫2011年孖老公恩愛度蜜月之旅

文：東方新地 ｜圖：新傳媒圖庫

陳自瑤王浩信結婚後飛峇里島過二人世界

39歲的陳自瑤（YoYo）與37歲的王浩信2011年結婚，當年選擇在6條1結婚以示「生生世世」，不過近年屢傳婚變更拒絕合體現身，每提及對方都變生疏，更甚的是王浩信被問及太太陳自瑤，立即落閘拒回應，令婚變傳聞甚囂塵上！

但其實陳自瑤同老公2011年奉子成婚後，曾經被老公視如女王般寵愛，當年王浩信特登安排飛峇里島過二人世界火辣度蜜月，蜜月之旅重點入住7千元一晚的Banyan Tree臨崖海景別墅，房內有齊king size大床、按摩池、私人泳池，浴室更是無遮無掩，春光無限，伴以壯觀印度洋海景，難怪蜜月之旅多日來足不出戶享受，5日4夜行程中，兩人除入住當晚曾外出晚飯，其餘時間全程留在房間，望海培慾重溫蜜月期。至旅程最後一日，兩人才捨得離開酒店，行沙灘拍拍照，感受一下峇里風情。

陳自瑤陀B蜜月

於峇里期間所見，一向身材不算有睇頭的陳自瑤，穿上低胸吊帶裙，上圍明顯出現谷奶反應脹爆包唔冚，同時間腰肢變粗，腹部明顯變得渾圓。幸而似乎沒有任何「孕吐」現象，精神好，胃口更好，而且紅光滿面，別有懷孕期的女性嫵媚，難怪兩夫婦拍拖多時，蜜月之旅仍糖黐豆，全程對極唔厭！據知情人爆料：「臨結婚前爆出Cammi單嘢令YoYo好唔開心，Vincent唔想老婆懷住呢個心情陀仔，所以大住肚都照搭飛機度蜜月，希望散散心，重溫昔日熱戀甜蜜。」

王浩信：「做蜜月做嘅嘢」

本刊就大肚度蜜月致電剛回港的王浩信，他表示：「佢陀得幾好，冇咩大反應，又冇特別戒口，最主要食得健康，唔飲酒同唔食煎炸嘢，問題唔大。」問到連日足不出戶留守房間，在房內有何消遣，他即遊花園謂：「間房好靚，有泳池又有按摩池，咁住得梗係好好享用吓！」蜜月之旅甜蜜蜜，新婚嬌妻又美艷惹火，血氣方剛的Vincent又是否把持得住，做蜜月夫婦會做的事，他聞言相當尷尬：「嘩！嘩！嘩！呢個真係唔方便講，都係蜜月會做嘅嘢啦，自己私人度蜜月，俾番啲空間我哋啦！」收到！咁甜蜜，三年抱兩唔難！