49歲陳豪自爆曾是蒲精一名 零收入用十萬卡數填氹

原文刊於：東方新地

夜場冇收穫 陳豪：講就無敵，做就無力

最近陳豪同黎耀祥接受由伍詠薇、林盛斌主持的邵氏兄弟出品之訪談節目《Tiger’s Talk》時，陳豪直認曾是蒲精一名，佢自爆拍攝電影《晚九朝五》的年代，一星期蒲足五晚，不過有一日突然醒覺，陳豪話：「當時感覺就好似一盞射燈照住你，突然醒覺咁樣好浪費時間，係時候為人生做返啲嘢，於是就180度轉變，自此之後冇再踏足夜場，好努力為人生拼搏。」

伍詠薇追問係咪大把女埋身？陳豪笑笑口話：「諗係咁諗，但真實係永遠都空手而回，講就無敵，做就無力。我係唔會飲到爛醉嘅人，主要落去跳吓舞，自己溝唔到女咪睇人溝女。我相信每個人成長都需要花段時間去認識自己，後來先知其實自己根本唔鍾意呢啲生活，只係想陪朋友，嗰時啲朋友想去就陪埋一齊去。」

呃住父母一年冇工開

被喻為無綫金蛋的陳豪，演藝路看來相當順暢，當模特兒時收入豐厚，又做過電影主角，不過陳豪話都有兜茂時：「我雖然冇祥仔捱得咁耐，但當我有心做演員時，電影圈又唔太吃香，開始冇嘢撈，試過一年都冇工開，完全冇收入，唯有卡數冚卡數，差不多有成十萬卡數，但我唔會問屋企人拎錢。」後生時玩夠蒲過，先有今日愛家庭愛老婆的陳豪。

陳豪：She is my queen

陳豪、陳茵媺自2013年拍攝《心戰》時撻著，二人婚後育有2子1女。陳豪是娛樂圈出名的好老公。當年二人完婚後，陳豪更公開愛的宣言：「好多謝Aimee，自從遇到佢，發生嘅全部事都好開心，寄望日後都係一樣，She is my queen！」老婆Aimee定必甜到入心！

陳豪亦是好爸爸，即使拍劇時間日夜癲倒，但對老婆陳茵媺及三位仔女錫到燶，無論幾忙仍會盡量抽空陪伴家人，即使捱到殘都在所不計！

享受二人世界

二人雖然育有2子1女，但依然會不時出外拍拖！陳豪日前喺Instagram大晒同茵媺嘅甜蜜合照！茵媺雙手搭喺Moses膊頭，小鳥依人仲大晒婚戒，有如一對新婚夫婦！Moses話難得抽到時間同老婆拍吓拖，去咗行街、睇戲、食飯，享受二人世界。

難得兩個人去拍拖，當然要爭取機會影多幾張合照！除咗大晒拖手相，Moses仲分享佢同茵媺撐枱腳時嘅合照，見到佢哋食緊飯都要拖住手，佢哋仲時不時自己兩個單獨去旅行，相信呢對模範夫妻仲好似熱戀期一樣咁甜蜜！

簽包薪經理人約 停工繼續每月出幾十萬糧

早前政府頒下「限聚令」，開有咖啡店的陳豪，生意雖受影響，但絕世好老公兼好爸爸，就得上天眷顧成為逆市奇「爸」，商業演出減少卻繼續有錢落袋，與陳豪同拍《陀槍師姐2020》的一班演員如羅仲謙、宣萱、洪永城及鄧佩儀等，就對繼續有高收入的「疫市奇爸」陳豪表現羨慕。據知情者透露：「拍劇開工時間長，大家停機都會圍埋傾偈，成班工作人員都好羨慕阿Mo（陳豪），因為呢排商業活動停晒，大家冇晒搵外快機會，傾開先知阿Mo係無綫最高薪藝人，就算佢拍咗嘅兩套劇，《殺手》同《愛美麗狂想曲》仲未出街，佢都唔使擔心，因為佢簽嘅係包薪經理人約，就算冇工開，一樣個個月出幾十萬糧，相比要靠外快增加收入嘅藝人，真係同人唔同命，大家又點會唔羨慕佢！」

為家人拒絕向外闖 陳豪獨養一家九口 無難度

2018年底，盛傳古天樂與蕭定一分別向陳豪招手，不過，獨力擔起頭家的他，家庭開支不少，為求穩陣就放棄外闖機會，寧願留在無綫穩紮穩打，有指成功以3,000萬同無綫續約。據知情人士透露：「阿Mo形象好，又畀人時尚有品味感覺，咁多年嚟都係廣告客嘅寵兒，有時一星期都出幾個活動，好多唔同層面嘅廣告又畀佢擸晒，為咗留住呢隻金蛋王，無綫都計晒數，阿Mo喺正黃金時間續約，佢咁搵到，當時經濟又好，薪酬特別高，只係佢續約半年左右，香港就遇上政治風波，加上呢幾個月新冠肺炎肆虐，唔止香港，外地同內地啲工作都停晒，咁嘅時勢，佢冇受影響真係行運。」