【鐵探】同姜皓文鬥演技 黃學盈4歲入行已獲最佳女主角
廣告
電視劇《鐵探》不經不覺間已經去到尾聲，劇中有演技出眾嘅藝人坐鎮，包括有三屆金像影后惠英紅、金像獎「最佳男配角」姜皓文等，其實一班小演員都好好戲！當中同姜皓文（飾游秉高Bingo）最多對手戲、飾演養女彤彤嘅童星黃學盈，喺多場喊戲都十分出色！原來黃學盈4歲就已經入行，更曾攞過廣告界嘅「最佳女主角」，其演技絕對不遜於一班大人！
撰文：Kammy｜圖片：黃學盈Facebook，黃學盈Weibo，Youtube截圖
童星黃學盈同姜皓文鬥演技
現年12歲嘅黃學盈喺《鐵探》中飾演性格倔強嘅劉彤彤，由於爸爸被殺，所以由Bingo做佢嘅養父，二人父女情深！Bingo雖然只係做佢嘅養父，但都好耐心咁教黃學盈讀書寫字同防身術。
值得一提嘅係，其中一幕講述由於彤彤有黑幫嘅軍火交易證據，Bingo為咗彤彤嘅安全，決定將佢交由其他人照顧，二人喺道別之時展露對對邊嘅不捨，十分催淚，唔少人都讚黃學盈好戲，更話佢喊得好自然！
被槍指住 不怯場
除咗父女分別戲，更要提彤彤被綁架個場戲！事源彤彤當時被營長（吳廷燁飾演）綁架，營長更派人試圖殺死彤彤，仲用槍指住佢個頭，但個時彤彤一啲都冇怯，仲露出凌厲眼神，更揚言「死都要記住你個樣」，演技超班！
不過，事後黃學盈接受訪問時提起，呢一場戲之所以一啲都唔怯，係因為拍攝前曾被導演話「喊唔出」，話完之後學盈就感情大爆發，令呢一幕拍攝成功。
4歲入行獲廣告界最佳女主角
自《鐵探》出街之後，除咗網民大讚黃學盈嘅演出外，就連戲內養父姜皓文都讚過話一教學盈點做就明，好多時都會畀佢感動到添！
黃學盈其實4歲就已經入行，演出經驗一啲都唔少，早喺2011年就拍過萬寧「宇宙最強爸爸」嘅廣告，當時更因為呢個廣告而獲得《TVB最受歡迎電視廣告大獎》最受歡迎女主角，可見學盈十分有演藝天份！
