【夫妻關係】研究：男人原來都有月經周期 另一半情緒隨時響警號
撰文：Kammy｜編輯：YCL｜圖片來源：Instagram、新傳媒圖片庫及劇照
研究：男人月經影響夫妻關係
相信唔少女士都會明白，每個月都總有幾日係會心情突然煩燥。不過，近日就有英國研究指出，原來男人都會同女人一樣有「月經周期」，一樣會無啦啦覺得疲倦同燥底！
研究指出，有25％嘅英國男性都覺得自己有「男人月經」，每個月總有某幾天會情緒失調，如急躁、疲勞、情緒低潮等，影響夫妻關係。
58%女性認同男性有以上問題
除咗男性覺得自己有「男人月經」外，研究指原來有58%女性都認同呢個現象！研究就解釋，因為大家都係受荷爾蒙影響，所以帶嚟負面嘅情緒。
不過，由於男人由細到大都被教育為要堅強同冷靜咁處事，就好似女仔一定係溫柔體貼咁，所以好多時男人都會壓抑住自己嘅情緒同疲勞等，以免影響夫妻關係。
延伸閱讀：婚姻的愛是：想殺但是沒有殺了他，想走卻還是跟他過日子
男性「月經周期」時易感飢餓
另外，除咗情緒問題之外，原來男人嘅「月經周期」都會覺得攰同容易有水腫問題，而且會同女人一樣，易感到飢餓同好想食甜嘢，好似朱古力、雪糕、甜品等。研究指出，男人喺「月經周期」時，花費喺零食方面嘅錢比平時多63.69英鎊。
應多關心對方 促進夫妻關係
每個女人喺月經周期時都會希望有人關心同體諒，其實男人都一樣，好多時男人為咗唔畀人話「唔成熟」、「成個女人咁」，所以好多時都會忍氣呑聲。不過，研究指出，如果過份無視真實情緒嘅話，好容易會有更嚴重嘅情緒問題，好似係抑鬱症、暴力傾向等，對夫妻關係百害而無一利。
因此，女士們記得要畀安慰同支持對方，記得要喺呢幾日多多包容另一半，皆因一段好嘅夫妻關係要互相遷就！
