扶手電梯上被行人撞親 湊B港媽長文抱怨惹網民爭論

撰文：Clara｜資料來源：「生仔要考牌」FACEBOOK專頁｜圖片：shutterstock

港媽出街定必一袋二袋

近日一名港媽於Facebook專頁「生仔要考牌系列」發文，講述搭扶手電梯的不快經歷。港媽表示平時只有自己一個湊B，沒有其他人幫忙，為了空出雙手拎餸，她每次出門都會用孭帶孭BB。雖然不用抱BB，但港媽雙手依然拿著很多東西。由於現時新冠肺炎疫情未止，她每次出去都會預先買好三、四日餸，減少外出次數，降低染病風險。有時，她會一次過把BB用品買回家，例如奶粉、尿片等，最後一隻手拎餸，另一隻手拎BB用品，兩隻手一袋二袋。

次次搭電梯捱撞

買完餸，港媽就會行去藍田地鐵站，再搭三條長電梯去小巴站，搭小巴回到村屋。但每次搭電梯，她都會被趕時間行落電梯的人撞到：「我知香港人做嘢係趕，有時你哋趕住要行落條電梯都可以講番聲，因為你哋唔開聲，我唔知你哋要過，你哋又夾硬撞開我。」港媽認為問題嚴重，決定寫文抱怨：「其實我孭住個BB，仲要兩隻手都拎住嘢，（你哋）咁做係好危險。」

提醒大家要小心安全

她提醒大家，如果真的想於電梯上行走，又見到前面有人，應該主動開口通知一聲，拜託對方讓出空間，避免碰撞：「希望咁多位，有時想人借開畀你哋行電梯落去，可以試吓講聲，等其他人都有個心理準備，知道後面有人要行。講聲『唔該借借』，我就會知你哋要行落條電梯，我會讓。但係唔講，就咁撞開係真心危險，尤其是我孭住個BB喺身。其實要我讓一讓，開吓聲唔係好麻煩啫？至少我唔會搭一條電梯都可以被四至五個人咁撞開先啦。」

最後港媽思前想後，認為於電梯上行走還是太危險，她覺得大家即使趕時間，都應該「握扶手，企定定」：「有時啲公公婆婆未必企得穩，真係無需要為咗趕嗰少少時間就咁樣行落去，始終都有個危險性喺度。」

網民對港媽言論意見不一

帖文引來不少網民爭論，有部分批評港媽，指她一袋二袋阻住人：「我咁大件都未試過孭住bb，再左右孭兩大袋野會被人撞，夠位過㗎喎⋯⋯你都有責任將啲嘢放係自己前面啦，如果唔係咁大袋嘢會阻住人」、「你企喺正中間？」、「大家唔好怪樓主，佢可能成三百磅，好大隻呢」、「孭住小朋友再拎住一袋二袋，其實真係會佔好多位」

亦有網民提議港媽為了BB安全，應該搭升降機或網購：「出街買慳得少少錢，但咁多人撞到你」、「BB愈來愈大，你冇得用孭帶，你點樣同佢一齊出去買三四日餸返屋企？」、「為小朋友安全著想，重、大件嘅嘢可以上網買，自己唔使拎得咁辛苦」、「建議9點後先好出門，唔怕阻人返工返學，另外盡量網上訂購，始終出出入入大風險」、「你既然知道好多人唔會讓，你就唔好揾個BB冒險⋯⋯」、「你兩隻手拎嘢，無手捉實扶手好危險，有緊急事停電梯，兩母子一齊跌死，尿片、奶粉叫人送貨啦」

另一方面有網民力撐港媽，認為大家不應在電梯上行走：「世上無嘢可以阻止香港人趕住去投胎，惟有自己小心啲，好驚被人撞一撞手踭，成個小朋友飛咗落街，次次搭電梯都企喺個女後面護住佢」、「點解啲人唔可以拎啲同理心岀嚟，幾時變到電梯企定定係錯，行電梯係啱？」有媽媽網民就話試過同樣情況，兒子差點出事，非常危險：「之前我同我仔搭電梯，我扶實，我仔企我前一格，又怕企得太埋會攝腳入電梯 ，所以企岀少少。點知有人好趕咁衝撞到我仔，我仔成個人向前，好彩我隻手係放喺佢膊頭，嗰刻我心真係嚇一嚇」