我地都見到好多唔同種類嘅蔬果汁都好有興趣，不過小小豬一見到西瓜就想試，但普通嘅西瓜汁又好似冇咁好玩，所以就嚟個西瓜雙重奏，整返一個冰凍嘅西瓜沙冰雪葩啦~
其實我都唔知得唔得，不過既然慢磨榨汁雪葩機可以榨出果汁之外，又可以整雪葩，所以我就一次過用晒佢兩個功能，試下整啦！
材料就只需要一個細西瓜~
將西瓜切成細塊，然後分成兩份。將其中一份西瓜粒放入冰格雪過夜(如果急食的話，最少雪起碼五小時)，另一份就放雪櫃下格普通雪凍~
開始整嘅時候，就將普通雪凍嘅西瓜粒配用黑色榨汁螺芯磨頭，榨出純西瓜汁~
然後就可以放入已換上粉紅色雪葩磨頭，壓出西瓜雪葩~
以三分一杯嘅西瓜汁再加上三分二杯嘅雪葩混合埋一齊，就可以變成西瓜沙冰，之後再加上一球西瓜雪葩，咁就係冰凍嘅西瓜沙冰雪葩~
初時都怕咁整會唔好飲，不過試左又真係唔錯，冰凍得嚟入口又帶有兩份口感，所以小小豬都話好食，仲嚟個密密加食添呀~
由於壓出嚟嘅西瓜雪葩無加任何防腐劑，所以最好就係兩日食晒啦~
唔止小小豬，就連我地兩個大人都好似比平時接觸多左生果，一得嚟就會整果汁/雪葩飲，其實都係一件好事嚟，始終多食生果身體都會好啲，所以依個新玩具我地三口子都大愛呀！
BY小小豬的成長日誌
