10大基層出身藝人靠自己捱出頭：鄧麗欣公屋大 朱晨麗內地來港勁辛酸

原文刊於：東方新地

10個基層出身藝人

鄧麗欣屯門大興邨長大

鄧麗欣（Stephy）自細於屯門大興邨長大，讀書時做過兼職模特兒，後來入娛樂圈發展。Stephy以組合Cookies成員身份出道、做過歌手，又拍過劇集同電影，樂壇同影壇產量亦有一定數量。早前憑《空手道》於第24屆香港電影評論學會大獎，更憑《空手道》於金像獎提名最佳女主角，可惜不敵毛舜筠，失落獎項。雖然出身屋邨，但她出道打拼多年後，終於升呢入住貝沙灣大屋，之後亦轉戰內地賺人仔，令自己身家更加豐厚，事實證明一分耕耘一分收穫！

李佳芯柴灣興民邨長大

現為大台一線花旦的李佳芯(Ali)，其實出身於基層家庭，自小就與家人居住在柴灣興民邨，以前試過同朋友夾份開髮型屋，斟茶遞水咩都做齊！Ali完成副學士學位後，就因做模特兒而入行，做過有線節目主持，於2012年加入TVB，憑《學是學非》入屋，再加上於不同劇集如《潮流教主》、《誇世代》、《BB來了》有亮眼表現， 升呢做視后。

文詠珊梨木樹邨公屋長大

Janice Man當年𡃁模出身，與Angelababy同為𡃁模始祖，近年轉戰影圈，獲提名過香港金像獎最佳女配角！話說JM一家人因受97年金融風暴影響，一家人由私人屋苑搬到梨木樹邨公屋居住，14歲就已經入行！

Janice Man近年𡃁模味漸褪，於2007年起接拍不少電影，至近年更憑電影《赤道》及《寒戰II》入圍第35及36屆香港電影金像獎最佳女配角，努力有目共睹！除咗拍電影，近年她亦有番內地搵銀，仲有不時出席不同地方時裝騷，成日要四圍飛。

王敏奕柴灣漁灣邨公屋長大

王敏奕於單身家庭長大，自小家境麻麻，以前與媽咪及兩個細佬住在柴灣漁灣邨百呎公屋。

王敏奕14歲時已經半工讀，做兼職平面模特兒養家，搵錢幫補家計，但剛出道時工作不多，她自己亦曾自爆當時收入少到「試過戶口一百蚊都冇！」。而有「氣質女神」之稱的她終與曾志偉兒子曾國祥拉埋天窗，不時會在個人社交網放閃光彈，升呢進駐三千萬貝沙灣豪宅。

朱晨麗住劏房

朱晨麗16歲時以優才身份從內地來港，曾為儲學費而節衣縮食，更與同學夾錢住劏房。

2011年因成為港姐冠軍而入行，成為TVB花旦之一，曾表示為講好廣東話，而下了不少苦功！入行已11年 的她，17年在《萬千星輝頒獎典禮2017》成功獲得「最佳女配角」一獎，講得獎感言時提到：「希望我哋喺內地成長嘅小朋友，嚟到香港之後依然可以打出一片天，一齊支持我哋！」。

黎諾懿公屋出身

人地話成功需要父幹，但就算沒有父幹，有後天努力一樣可以打出個名堂。公屋出身嘅黎諾懿，細個時爸爸因病離世，媽媽獨力養大兄弟三人。

因12年處境劇《愛·回家》中擔正男主角之一，飾演馬壯一角大獲好評。自此，一講「神之子」，就係人都知邊個。

2014年，他與家族資產近5億嘅李潔瑩結婚，育有兩子，現在相信黎諾懿都是有仔萬事足，為做個好爸爸同好老公而努力不懈！

王祖藍沙田恆安村長大

屋村出身的王祖藍，細個全家住在沙田恆安村。祖藍因與阮兆祥、李思捷做《荃加福祿壽》開始走紅，一路以嚟靠自己密密工作，賺到盤滿缽滿。

現在祖藍於內地工作不斷飛撲埋身，賺錢能力高企，同時亦不忘對家人多加照顧。侍母至孝嘅佢就以3700萬，買入自己寓所同屋苑連花園特色戶畀阿媽住。2015年，祖藍同李亞男結婚，「愛妻號」的他就買下過億逸瓏灣連天台複式單位給老婆李亞男，這個老公真是無得頂！

楊思琦大坑西邨長大

有慳妹之稱的楊思琦以前住在大坑西邨，據知她慳家的目的是為了可以儲錢置業。香港小姐冠軍的思琦妹曾為TVB花旦之一，可惜其後離巢，結束13年賓主關係。其後她誕下一女楊卓穎（Krystal）與一子Kody Yeung，獨力湊大仔女，對小朋友疼愛有加。

李幸倪住北角劏房

歌手李幸倪（Gin Lee）2010年由馬來西亞來香港發展，當時她窮到住北角劏房外，仲要無錢交租，需要靠好友接濟。好彩，Gin Lee沒有因窮到冇錢交租而放棄唱歌理想，2015年就因參加內地節目《中國好聲音》而成功翻身，近年不時上台攞獎。

劉德華於新界農村長大

貴為天王的華仔可以講是由基層出身而不斷努力的典範，他出身於新界農村，6歲時搬到鑽石山嘅木屋區，但於11歲時家園卻被大火燒毀，遷住寮屋，1年後再搬到藍田邨。

當年中六預科肄業的華仔，因加入TVB藝員訓練班，結果就成為咗佢入行之路，至今一共參演了多部電視劇和超過140部電影，作品數量驚人。

現時華仔歌、影、視均見其影，多年嚟對香港電影及音樂貢獻良多，在工作上的熱誠同認真，一定無可置疑。所以，今日華仔的成就，全憑個人驚人毅力同努力爭取番嚟！父幹？咩嚟㗎？