張國強

反派綠葉 張國強 戲外絕世好爸爸

熱話

廣告

張國強 (KK)在《致命復活》中的反骨角色關士杰演得入型入格,令大家都以為關士杰係綁架Vincent的幕後黑手,但點知噚日嗰集,關士杰卻喺醫院話因為當日Vincent忘恩負義,所以先呃咗Vincent去越南,但真正策劃綁架的兇手並唔係佢!令人更加想知道幕後黑手到底係邊個!

原來KK已經入行40年,拍過的電視劇集多不勝數,不過最令人留下深刻印象的相信是曾與譚玉瑛姐姐擔任兒童節目《430穿梭機》主持!幕前的KK大家應該都很熟悉,現實中的KK大家又知幾多呢?

 

編輯:Fiona Fong
相片:新傳媒資料室、mytv截圖

現實中 張國強 除咗係一個好老公,仲係好爸爸!KK在1988年與太太Melinda結婚,至今已將近30年,育有一子兩女,包括27歲大仔寶軒(Timothy)、25歲二女寶洋(Katy),以及19歲細女寶藏(Holly)。現年60歲的KK本身為職業足球員,1976年加入無綫電視成為全職演員。雖然KK拍戲時經常與當紅花旦合作,但他從沒傳出過緋聞。

張國強1982成為兒童節目《430穿梭機》的機長「KK哥哥」,身為機長,自然要負責維持「穿梭機」的秩序啦!以前參與《430穿梭機》的小朋友很多,對於比較好動的小朋友,他自有一套調教心得!「我會捉住最好動的小朋友當組長,要佢負起照顧其他小朋友的負責,當自己身負重任,自然就不會搗蛋,反而叫其他小朋友安靜!」

堅持一家人晚飯

KK 有七兄弟姐妹,他排行第五,習慣大家族生活,經常一起飲茶,他覺得現今年青人「太宅」,令親情疏離,故他堅持一齊食早餐,親自送返學,子女長大後,他亦堅持一家人晚飯,全靠太太Melinda的拿手小菜,令各人很黐家,愛食住家飯,「食飯係最佳親子溝通時間,有時會邊食邊開家庭會議,了解佢哋返學返工有咩困難,一齊諗辦法解決。」

為仔女讀書環境 移民加拿大

1991年,KK舉家移民加拿大。「為咗仔女有較好嘅讀書環境移民咗去加拿大溫哥華,我為事業要做『太空人』,加港兩邊飛,03年沙士襲港,每次返加拿大都喺屋企自我隔離10日,佢哋送飯入我房,好似坐監咁,後來為咗事業同照顧我媽媽,開咗個家庭會議,決定全家搬返嚟香港。」

三兄妹均在外國出世,大仔Tim在美國,二女Katy及三女Holly則在加拿大,自小接受西方教育,Tim曾報考本地傳統幼稚園,但性格文靜,全程不做聲,沒有學校錄取,結果轉讀國際幼稚園,其後到加拿大升學,返港後入讀英基沙田學院,兩位妹妹隨哥哥入讀,沙田英基每年學費超過$95,000,KK認為絶對值得,最重要學習壓力小。「香港充滿填鴨式教育,學習氣氛好沉悶,放學又要補習,小朋友讀得好辛苦。直資學校都要幾萬蚊學費,雖然喇沙免費,但補習費用龐大,科科都要補習,又要參加幾個興趣班,計番同讀國際學校差唔多,而且英基有政府資助平少少,出路都唔錯,容易銜接外國大學,每年都有班人考到劍橋,牛津呢啲一流學府,又可以留喺香港升讀本地大學。」

三個仔女 三種性格

長子Tim最受爸爸影響,愛電影、愛踢波,早前更入行做電影幕後,從事燈光、收音等不同崗位,之前鍾欣潼主演的《前度》,Tim便是副導演。二女Katy性格獨立,但亦最教KK擔心,「佢個人有野心,驚佢行得太快會跌低,但佢大個女唔可以成日話佢,要退後一步,好似行樓梯佢唔鍾意俾人扶,我就墮後觀察,佢跌落嚟我先糾正佢。」而細女Holly長得高大,曾是學校籃球隊健將,跟足球健將爸爸一樣,都熱愛運動!