拒假手於工人林嘉欣貼地湊女禁兩女做公主

Oct 11 2017

唔少藝人催谷仔女讀名校爭做資優生，視仔女如珠如寶，粗重工夫自然唔使做，平時穿衣食飯沖涼都有工人姐姐侍候。相比林嘉欣的貼地教女，反而變成另類，為慎防囡囡有公主病，自少訓練二人獨立兼有自理能力。日前林嘉欣湊住兩個女兒到淺水灣開餐，雖然有工人姐姐在身邊，6歲大女Kayla自己孭住自己的大袋用品，跌咗嘢亦會自己執，絕不假手於工人，飯後，林嘉欣拖住兩個囡囡去搭小巴返屋企，生活樸素，拒做怪獸家長。

撰文：Sunday Kiss

圖片來源：新傳媒圖片庫、林嘉欣IG

林嘉欣貼地湊女禁兩女做公主

39歲的林嘉欣先後誕下兩名女兒Kayla和Sofie，眨吓眼女兒分別6歲和4歲，一度停工全職湊女的嘉欣，兩年前復工都只係選擇性工作，將大部分時間留給女兒及家庭，為免兩女會被縱壞而有公主病，嘉欣由囡囡讀幼稚園開始，已經有別一般星二代讀爭崩頭的學校，反而選讀平民學校。

細女入讀靈糧堂平民幼稚園，嘉欣每天都會自己接女兒放學，這天老公就陪嘉欣一同湊囡囡！

訓練自理能力

貼地媽媽嘉欣更加教導女兒要有正確價值觀，絕不追求物質享受，兩個女兒出入亦大多乘座公共交通工具，雖然嘉欣自己都有車，除咗返學，平時出街好多時都選擇坐公共交通工具，更加唔畀倚賴工人姐姐，自細特訓女兒由梳洗、著衫以至執書包都係自己做！嘉欣會花心機去自製玩具，又會教個女透過畫畫抒發情緒，周不時帶佢哋逛美術館，培養對藝術有濃烈興趣。