產後重達147磅 孫慧雪三管齊下速減27磅影寫真
撰文：K | 圖片：孫慧雪@ig
產後重達147磅 孫慧雪三管齊下速減27磅影寫真
現年36歲的孫慧雪上年榮升新手媽媽，阿雪更為囝囝Riley開咗個專屬Ig同大家分享生活點滴。早前阿雪自爆產後體重飆升至147磅，但為咗拍劇，佢三管齊下，兩個月時間極速減去27磅，重拾纖腰！日前仲話要重出江湖影寫真！日前阿雪於Instagram發佈數張相片，相片中阿雪身形纖瘦，完全睇唔出係一子之母！阿雪透過節制飲食、做運動同紮肚等方法，兩個月成功由147磅減到120磅！果然「世上沒有醜女人，只有懶女人」。
孫慧雪與囝囝表情神同步
早前，孫慧雪帶同可愛囝囝Riley一齊去樂園玩。雪雪為Riley精心準備一套模仿《壞蛋獎門人》裏面「Minions」嘅制服俾囝囝穿著，相當趣致。兩母子影相留念時，仲表現出神同步，幾款表情同動作都一模一樣！
就連雪雪都忍唔住要留言話：「我發現咗BB嘅天賦才能係佢嘅模仿能力，我做咩佢就會跟住做，第一張，我叫佢一齊扮cute呀～佢即係（刻）做！第二、三張變臉前後無（冇）2秒！仲扮埋我單眼，之後同影加映，佢收到電話：『喂！喂！我講電話，你等等先！』都係扮緊我！我真係唔可以亂來😅 #Riley真係好鍾意媽媽」
Riley認真西利，每個表情都可以學足媽咪，咁有學習天份，第日大個一定都係個醒目仔！
就連眼仔碌碌咁望鏡頭都同媽咪勁似樣！
雪雪仲分享咗自己餵啊仔食嘢嘅片上網，見Riley食得津津有味，每食一次都點哂頭表示好好食，認真可愛！
孫慧雪「交足戲」的全家福
早前，孫慧雪與老公Edwin及未滿一歲的囝囝Riley，一家三口暢遊3D美術館。雖然Riley仔未夠一歲，但明顯遺傳了媽媽的演藝細胞，在不同3D場景時竟然可以完全配合爸爸媽媽，做出各種的反應和表情。
難怪雪雪都忍唔住喺社交網留言︰「大家都好有戲！好好！#連Riley都俾（畀）戲 #有其他相我扮俾（畀）蛇咬Riley喊住叫媽媽🤣 #好感動…..BB比爸爸媽媽更有戲♥️ #十個幾月人仔…….Riley,你演譯（繹）得好過媽媽，點算先？😅」
孫慧雪公開紮肚減肥法
近日，孫慧雪決心修身，嘗試以產後紮肚減肥法，一改生完B後嘅微胖身型，並於個人社交網po出多張自拍照，見佢著上非常貼身嘅紮肚帶，紮到連腰位都出番嚟。
曾因產後紮肚發生意外
孫慧雪更留言指自己之前都試過產後紮肚，卻因為過程中發生意外而停止：「我之前生咗3個月時紮過，但可能個人體質問題，或者子宮傷口太大（因為我係剖腹產兼生大碼B），所以產後三個月紮到第3日，就子宮出血，於是無再紮！」，聽到都驚驚。
佢更表示，希望呢個紮肚減肥法可以有助佢紮返細個骨架，更笑指可能因為第一日紮，所以有㧜牙嘅感覺。
而今日係佢第二日紮肚，孫慧雪就喺網上發文透露：「今日幫我再紮緊啲，幫我紥埋胸骨，你哋睇下，著咗條褲上去，都唔擁腫，因為堅緊!!」，真係隔住個mon都感覺到有幾緊！
佢仲話：「今日落咁大雨都照去，即刻覺得自己有為減肥付出！大大減低咗平時貪吃嘅罪咎感。」，照咁睇，佢今次真係好有決心堅持要成功瘦身。
上年宣布懷孕
上年二月，阿雪正式宣布懷孕，而預產期則為八月中。陀B期間阿雪不時喺社交網站分享其懷孕歷程，見到佢個肚一日比一日大，誇張到有成43吋腰，一度令人懷疑係咪佗雙胞胎！
懷孕時的女人最美
所謂懷孕時的女人最美，所以阿雪都拍攝了一輯以花為主題的孕照留念，相片由好友兼名設計師Lilian Kan(簡幗儀) 操刀！阿雪本身就好鍾意花，所以對呢輯寫真十分滿意。即使孕照要性感露肚，老公都冇詐型！
誕8磅10囝囝
剛剛阿雪就喺FB上載與B仔Riley的合照，見到身在產房的阿雪媽媽精神不俗，雙手緊抱着張大開口喊的囝囝，而另外兩張相就係B仔的獨照，面圓圓非常可愛！
可愛B仔好大食
據知，由於B仔體形太大，所以阿雪最後聽從醫生建議改為開刀。另外，佢曾透露B仔同爸爸餅印一樣，身長頭大，而且仲好大食，要成日餵佢搞到冇覺好瞓！
