簽紙結婚了！吳若希：請叫我何師奶！

撰文：Sunday Kiss

圖片來源：新傳媒圖片庫、吳若希IG、big big channel

吳若希 雙十結婚

今日10月10日係吳若希（Jinny）嘅大喜日子，皆因佢同男友Alex正式簽字結婚！Jinny在其社交平台晒相報喜，仲留言話：「10月10日，好日，簽個字，請叫我何師奶～今日我倆一切從簡在唱片公司，在律師同老闆Herman及一些好友見証（證）下，與Alex正式結婚～希望大家可以祝福我倆，像結婚誓詞一樣愛護及包容大家，令這段婚姻得到真正的美滿～💕💕」好sweet！

誓詞唔詳盡？ Jinny：婚後啲財產，錢邊個管？！

簽完字之後，吳若希仲同老闆何哲圖喺big big channel做直播，又接受TVB娛樂新聞台訪問，Jinny說：「比我想像中無咁感動，因為大家都話會感動到讀唔到誓詞，但係我哋完全覺得自己浸淫喺歡樂當中，其實係幾搞笑同幾開心嘅。我哋無乜蝦碌嘢，因為簽字都只係個簡單過程，最蝦碌就係份誓詞寫得唔夠詳盡囉，例如婚後啲財產，錢邊個管呀，但係成個過程係開心嘅。點解要喺唱片公司度搞呢，除咗可以請埋我老闆（何哲圖）見證之外呢，呢個地方係我簽重要合約嘅地方，咁今次呢個都係我人生一個幾重要嘅合約，所以揀呢度。」

閃分閃復合

其實Jinny去年7月高調宣布跟澳門闊少何兆鴻 （Alex ）拍拖，2個半月後在社交平台宣佈「分訊」，但其後又極速復合，隨後更公佈快將成為媽媽，相當戲劇性。

大搞百日宴

24歲吳若希去年11月宣布陀有B女後，正式升格做媽咪喇！今年4月，Jinny經過十多個小時的陣痛，順產生B女，取英文名為Giselle(乳名淼淼)，坐月期間佢都專心湊女，之後偶爾回港工作。而喺淼淼出世100日，兩公婆大搞百日宴，邀請親友為B女慶祝。

瘦過未生

Jinny產後勤力做運動及打拳修身，仲瘦過未生之前！早前佢正式復工，近日再入錄音室錄歌，相信大家好快聽到Jinny嘅新作喇！