結婚6周年 陸永 高呼：老婆我愛你

撰文：Fiona Fong
相片：陸永IG、

結婚5周年再求婚

陸永上年就趁住佢同Rainah結婚五周年紀念，同老婆再求婚氹下佢開心！當日Rainah就在IG上載兩張相並留言︰「突然一束花，突然一首歌，突然一隻鑽戒，突然一大班人，突然被求婚。」

第一張相見到一大束紅色玫瑰，而另一張相就見到陸永跪地攬實Rainah，四周有一班朋友影相拍片，Rainah仲似乎感動到眼濕濕！有禮物有驚喜，相信陸太上年的紀念日相當難忘！

結婚6周年高呼我愛你

上年搞到咁大，今年無理由唔做返啲嘢㗎喎！今年陸永繼續出動送花攻勢，仲話想準備驚喜冧老婆，點知就俾Rainah識穿咗，無晒驚喜啦！佢喺社交網站發文話：「如果有個人好中意驚喜，而佢同時又會千方百計去識破你製造嘅驚喜，咁應該俾一個點樣嘅驚喜佢先至最驚喜？」雖然好似有啲怨言咁，但陸永最後都補多句「我愛你」，Rainah收貨啦！

另一邊廂，Rainah就發文表示多謝老公送嘅禮物。「聰明嘅女人識破所有驚喜實在太唔聰明喇… 多謝老公送嘅禮物，仲有呢紮花！六週年快樂！」雖然驚喜被識破，但睇嚟呢個係呢兩夫妻嘅樂趣？

教女變嚴父

陸永同老婆Rainah 2011年奉女成婚，第二年大女一穎出世，陸永曾話過：「反正有一個BB要照顧，咁就拿拿淋生多個，怕隔太耐唔記得咗點湊囡！」所以隔咗年半，細囡就出世啦！雖然陸永成日俾人感覺好似好唔正經咁，但其實教起女上嚟，都係嚴父上身o架！

一穎同sim sim年紀只差年半，非常好姊妹，但有時都會爭執，互相投訴對方，陸永要法官上身判刑，「又原告又被告，我告佢今日打我呀、今日佢畫我塊面呀， 一係就開始唔關自己事喇，佢畫梳化呀，佢唔肯着褲呀，好多呢啲投訴，所以我成日要做法官，不過佢哋唔係好曳嘅，即我判刑時，佢哋都樂於接受，會聽候法落， 叫佢罰企都肯罰企嘅，都算係咁，只不過會一犯再犯。」