【網民熱話】15個大個先知係寶嘅食物 | 蔬菜類佔一半！

撰文：TSY｜圖片：PEXELS |編輯：KM

【 網民熱話】15個大個先知係寶嘅食物

好多人大個咗會突然對某樣以前討厭嘅食物產生興趣！今次網民票選15個大個先知係寶嘅食物名單，即刻睇下你有冇中！

第十五位「住家飯」

細個成日食屋企嘅住家飯可能食到悶，所以鐘意出街食，寧願掃街都唔想返屋企食。大個先開始鐘意食返屋企飯，除咗「無添加」對身體好之外，可能仲有嗰份「家的感覺」。

第十四位 「青椒」

唔知大家對青椒有冇咩陰影？雖然煎釀三寶成日有佢嘅蹤影，但細個成日驚會辣就唔敢食，大個先發現冇咁可怕。

第十三位 「沙律菜」

身邊總有一兩個朋友完全唔食沙律菜，尤其細個會覺得沙律菜好苦⋯ 大個好多人為咗減肥開始咗食，仲普遍到M記都出過沙律餐。

第十二位 「冬菇」

冬菇有種令人難以言喻嘅「香味」，但唔食嘅人就會形容為係「酸臭味」。細個聞到少少特別啲嘅味就會避之則吉，大個可能勇敢啲就會開始食以前唔敢食嘅嘢。

第十一位 「蔥」

「唔該走蔥」可能係好多人出去食飯時嘅台詞，但亦都有人無蔥不歡。不過越大接受能力越高大概係真，所以味道突出嘅蔥都榜上有名喇～

第十位 「榴槤」

榴槤作為「水果之王」，嗰陣獨特嘅香味一直令人「又愛又恨」。有人鐘意有人唔鐘意，所以基本上好多食物類嘅排行榜都會見到佢，有成190票都不意外。

第九位 「番茄」

相信好多人細個都會好鐘意食一切「蕃茄味」嘅嘢，例如蕃茄醬、蕃茄味薯片、蕃茄炒蛋⋯但就係唔食蕃茄本身！反而大個先會覺得蕃茄酸酸甜甜幾好食。

第八位 「茄子」

茄子煮熟後軟淋淋嘅口感其實可能都有啲似榴槤，想當年小學自己都唔食，係中學時有個朋友超級沉迷食茄子之後先被傳染到，後來筆者都成為魚香茄子嘅FANS。

第七位 「煎釀三寶」

周街都有嘅煎釀三寶竟然有成302票！不過綜合返上面排行榜，佢有齊第十四位嘅青椒同第八位嘅茄子，咁會成為第七位的確唔意外。

第六位 「牛奶」

有冇人細個都係一飲牛奶就會肚痛肚痾嘅類型？不過有啲人飲多咗牛奶之後身體就冇再出現不良反應，所以都可能係大個之後反而多咗人飲嘅原因。

第五位 「蔬菜」

大家都知蔬菜對身體有益，但偏偏最多小朋友唔食菜，令好多家長都好頭痕。好彩大個嘅我哋慢慢認識到蔬菜嘅好處，就冇咁抗拒喇。

第四位 「三文魚」

三文魚長期列作港人最鐘意食嘅刺身第一名，其營養價值亦都廣受認可，即使屢傳易有寄生蟲都無阻大家對佢嘅熱情⋯

第三位 「芫荽」

芫荽可謂近年討論度最高嘅食物！仲要紅到出現一堆芫荽醬油、芫荽薯片甚至芫荽可樂⋯潛力不容忽視。

第二位 「生蠔」

鐘意生蠔嘅人會發咗癲咁喪食，但都有啲人一食就肚痾甚至腸胃炎，大概成人時抵抗力好啲所以先會欣賞到生蠔的魅力吧。

第一位 「苦瓜」

問到人有咩唔食，苦瓜絕對係大部份人嘅第一名！！！細個食苦瓜仲慘過食藥咁，係大個先會發現苦瓜特別嘅甘味。