謝安琪 做全職奶媽 張繼聰為女減產
廣告
謝安琪 為老公張繼聰成功追女，加埋大仔張瞻湊成「好」字。日前，二人為囡囡張靖 （Karina）喺迪士尼豪搞百日宴，Kay揚言要做全職奶媽，實行無了期停工湊女：「希望可以餵足一年人奶！真係擺低工作，以家庭為先，囡囡都係得幾個月，雖然囝囝10歲，但都係要傾偈嘅階段，只要睇住小朋友開心就乜都值得！」
撰文：Sunday Kiss
圖片：謝安琪、張繼聰Instagram、新傳媒資料庫
Kay推job有錢都唔賺，而張繼聰就緊張到要玩人釘人政策，又話要減產畀多啲時間睇實個女，仲癲到已開始盤算個女讀書時點安排，張繼聰瞪大眼話：「佢將來嘅男友一定好大鑊，因為有我守住，我已經picture緊個女讀中學、大學，哥哥第一日接放學，第二日就係我！」睇嚟Karina都幾難逃出呢個黐身爹哋嘅魔掌！
Kay表示有做運動收身，包括舉重及舉啞鈴等，Kay坦言全因老公影響：「身邊有人鞭策，自己唔可以太遲起步！(想操馬甲線？)呢條線離我頗遠，哈哈！」
問到囝囝張瞻有冇呷妹妹醋？Kay擰頭話冇：「反而佢成日都錫妹妹，可能同妹妹年紀差好遠啦！我同妹妹換尿片時佢會主動幫手，餵人奶時又幫手冚住。」
當日有唔少藝人朋友都有到場賀B女百日，大家紛紛送上祝福。
鄭欣宜與許廷鏗話有同Karina合照，大讚對方又乖又淡定，欣宜透露已送咗衫仔俾BB：「我見到小朋友啲衫褲就忍唔住買，唔捨得買畀自己，都捨得買畀小朋友！」
