郭富城

郭富城榮升爸爸 「開心、微妙、感恩」

熱話

廣告

郭富城同國產網模 方媛 (Moka)嘅小公主出世啦!城城今早喺微博同大家分享喜訊,仲放咗囡囡捉住爸爸媽媽嘅相片低調放閃!不少網民留言祝福,仲叫城城快啲「追多個」,湊夠一個「好」字!

撰文:Sunday Kiss
圖片:郭富城@微博

低調放閃 大手牽小手

郭富城喺微博連發兩張相片宣佈小公主誕生,仲留言話「開心、微妙、感恩!我們仨!成長、家庭、守護!」。恭喜二人終於由二人世界走到一個小家庭的新階段!

另一張相就簡單用粉紅色表達BB係個小公主!

網民紛紛留言祝福,有人叫城城快啲追多個囝囝,亦有人話期待城城參與《爸爸去那兒》拍攝!

4月擺酒 9月做「城爸」

郭富城 今年4月在半島酒店迎娶方媛,今個月又榮升「城爸」,半年內雙喜臨門。Moka懷孕初期大部分時間都喺上海安胎,近月先長駐香港等生,當時有報導指城城已找高人擇定吉日,將會放低工作撲返香港陪產,見證城B出世。

郭富城 今年4月突然結束鑽石王老五生涯,拍拖只有年幾的方媛(Moka)一坐正即食糊升呢做城嫂,有傳當時她已懷有「城種」,但城城一直未有回應,Moka對懷孕一事亦非常低調,近月不時穿大肚婆恩物高腰傘裙來遮掩隆起的肚皮,不過紙包唔住火,預產期在9月的Moka早前被影到返上海探父母,素顏的她已明顯見肚。

近月城城周圍飛趕拍電影及跑宣傳,一攝到時間就返港陪老婆,見他兩眼通紅狀甚疲累。

郭富城 廿四孝 對老婆愛護有加

為搵奶粉錢,城城未能長時間留在Moka身邊陪安胎,不過他早已為Moka做好所有準備,提供最好的坐月所需,除了book定養和頂級私家病房外,據知還請多兩個保母及助手,方便陪住Moka產前產後外出。日前Moka被影到在上海機場現身,有指城城完成手頭上的電影工作後,會飛上海接老婆返香港待產,但其實Moka已靜悄悄返港。

知情者透露:「Moka所有屋企人同朋友都喺上海,佢覺得喺香港好悶,出街又驚畀記者影相,但佢想BB喺香港出世攞香港身份證,所以最後都決定喺香港生,城城已安排好外母嚟香港幫手照顧,仲請咗兩個星級陪月,全天候照顧妻女嘅起居飲食。城城不知幾緊張,早前佢喺加拿大拍緊莊文強套《無 雙》,下個月要開翁子光導演嘅新戲,呢個星期又飛國內做宣傳,真係冇乜時間陪老婆,不過佢已經請定假,Moka擇日開刀嗰日佢一定會掉低所有工作,撲返香港陪產,因為9月撞正農曆七月鬼節,高人話成個舊曆七月都唔適宜生B,所以Moka好大機會8月尾就開刀。」

Moka懷有「城種」後今非昔比,除正式獲賜城嫂名份外,行頭亦愈來愈富貴,早前更拖實城城去置地血拼,拎住袋名牌戰利品不知幾威威。

生完再下一城

做了多年王老五,城城榮升人夫人父,負擔與責任都大了,心態上更有巨大的轉變,知情者透露:「自從Moka有咗,城城意識到自己即將踏入另一個人生階段,生活將會有好多轉變,依家出去做嘢,佢會同其他做咗人父母嘅朋友傾偈取經,之前未知仔定女,佢話仔女都冇所謂,因為佢計劃唔止生一個,最好有仔有女,再加上郭老太有孫抱不知幾開心,佢話想屋企再熱鬧啲!城城咁孝順點會逆阿媽意,Moka亦肯配合。」

一向篤信藏傳佛教的城城,早前更請來高人指點,在其大坑寓所布下追仔陣,除了在室內擺放風水陣外,在天台亦放了九條青龍、四大天王及一對瑞獸,除了可保家宅平安外,更旺丁旺財兼擋煞。有「城爸」負責搵錢養家,「城媽」 負責生完再生,頂樓全層加天台共六千呎的「城堡」,應該都夠晒住!

祝城城快啲「追多個」,組織一個大家庭!