呂慧儀

長腳蟹 呂慧儀 生日 老公劇組齊齊慶祝

熱話

廣告

人稱長腳蟹嘅呂慧儀 日前踏入35歲,生日當日佢就同一班《開心速遞》演員及老公黃文迪慶祝,大家仲準備咗個造型特別嘅跳跳虎蛋糕俾佢,令阿蟹冧爆!阿蟹亦喺社交平台share咗啲靚相同粉絲分享,睇佢幾幸福!同場加映阿蟹嘅養兒心得,一齊講吓「媽媽經」!

撰文:Sunday Kiss
相片:Instagram @konniecrab、Instagram@crabie_anton、新傳媒資料庫

呂慧儀 35歲 老公好友齊慶生

呂慧儀 同老公黃文迪 (Dickson) 呢日撇甩囝囝黃柏翹,兩口子合照時攬到實一實,笑容帶著滿滿幸福,羨煞旁人!

 

 

大家仲準備咗一個「豆豉眼嘅跳跳虎蛋糕」俾長腳蟹,氹得佢好開心!似乎阿蟹仲好有童心。佢喺社交平台分享話覺得今次安排好窩心,仲話個蛋糕靚到佢唔捨得食呀!

 

 

當日除咗老公Dickson,仲有一班《開心速遞》嘅演員出席食生日飯,包括滕麗名、單立文等等,睇嚟有大笑姑婆之稱嘅阿蟹喺圈中人緣不錯,同劇組感情亦好好!

 

 

第二日入廠拍攝,劇組再次同長腳蟹慶祝生日,連環兩炮慶祝,就好似一家人咁,錫到佢燶呀!

呂慧儀 同老公Dickson育有三歲囝囝「蟹籽」黃柏翹(Anton)。自從做咗媽咪後, 長腳蟹 在工作以外,都將所有時間都留給蟹籽,更不時一家三口游水和郊遊,談到育兒心態, 長腳蟹 揚言希望兒子從生活中學習,拒當怪獸家長!

演技大躍進 呂慧儀演活女強人

呂慧儀 於《愛・回家之開心速遞》中飾演的熊若水,是一個看似強悍但實際上口硬心軟的事業型女性,同時亦不擅於表達自己的情感。劇中雖然極度恨拍拖,但係眼角極高嘅佢,就一直嫌棄追求者嘅身高及學歷等方面。而 長腳蟹 的戲份愈來愈多,網民留意到佢嘅演技比以前進步好多。

呂慧儀 近期忙於拍攝無綫處境劇《愛.回家之開心速遞》,雖然十分忙碌,但都不忘在社交網站上載拍攝時點滴。

 

突然宣佈婚訊 老公扮跳跳虎

劇中雖然仲係單身,現實中嘅 呂慧儀 其實早喺2011年11月已經結婚!當年呂慧儀 突然喺微博上載婚紗照宣佈婚訊,並留言:「我要結婚了!」但係婚紗照就只得背影,新郎哥身份神秘。其後,她再解釋未婚夫其實是拍拖多年的男朋友黃文迪,結婚當日Dickson為搏老婆一笑,更放棄傳統禮服,化身跳跳虎,令呂慧儀 大為感動,笑說終於見到老公可愛的一面。

 

 

有籽萬事足 湊仔令生活變得充實

結婚數年後,呂慧儀 於2014年誕下愛兒「蟹籽」黃柏翹(Anton),囝囝出生之後, 長腳蟹 將大部分的時間和心機都花在他身上,每當講起囝囝佢都會顯得非常雀躍:「以前唔使開工嘅時候,有時都會喺屋企hea,但囝囝出世後,生活變得好充實,完全冇hea嘅時間。大家都說囝囝個樣子同老公比較相似,但性格方面,佢應該比較似我,係個開心嘅孩子。照顧佢其實也不太辛苦,因為佢好乖,早喺一個月大嘅時候已經戒咗夜奶,比起以前要挨更抵夜工作,呢種辛苦反而感覺更幸福,兒子就好像成為咗我嘅『叉電器 』。」談起兒子, 長腳蟹 都表現出有仔萬事足的樣子!

蟹籽目前讀學前班,學識古靈精怪,仲用國語同呂慧儀講「我愛你」,冧到暈!

 

拒做怪獸家長 帶兒子多遊歷

呂慧儀在今年初無綫劇《親親我好媽》中,飾演有公主病的惡妻兼怪獸家長,被讚演得入型入格,但現實中,長腳蟹 拒當怪獸家長,也不會催谷孩子學有十項全能:「我覺得依家所謂嘅怪獸家長現象,係因爲好多人都只係生一個小朋友,父母兩邊嘅家庭成員都將注意力放喺小朋友身上,呢種溺愛成爲咗壓力,過分保護小朋友,令佢哋冇太多嘅發展空間。所以我覺得囝囝在上學之前嘅時間應該盡情去玩!我比較希望自己花時間去教佢,也可見證佢嘅每個階段。有時汲取知識都可以從生活中學習,例如帶小朋友去旅行、郊遊、去動物園,總比用生字卡來得生活化。」

自從當媽媽後,呂慧儀不用工作的日子都抽時間陪伴兒子,不時帶他作戶外活動如游水,增加親子機會!

 

育兒心態轉變 身教最重要

成爲媽媽之後, 長腳蟹 不只是看着「蟹籽」一天一天地成長,連自己亦跟着兒子一起成長,而且心態上有重大的轉變。 長腳蟹 話:「兒子出世前,我連打針都怕痛,而且很多事情在未實行前又左思右想,有很多嘅顧慮。我完全冇諗過自己可以克服順産嗰種痛楚,所以依家自己心態上都有改變,做事前少咗太多無謂嘅顧慮,比較放膽去嘗試,仲將呢種態度帶到工作上。我希望可以平衡工作同家庭,工作令我覺得好實在,我唔想放棄自己嘅工作,因爲現在嘅工作係我喜歡嘅,都唔想喺屋企全職照顧兒子,否則好易同時代脫節。所以我要好好努力工作,向兒子身教!」

要同時兼顧工作和家庭,實在不容易, 長腳蟹 覺得做好時間分配很重要!

全文完