應采兒

【出哂事!】陳小春應采兒 第一次拍拖係去⋯⋯

熱話

廣告

陳小春和小小春父子檔參加拍攝嘅《爸爸去那兒6》要延期播映,但係應采兒有份拍攝嘅另一個節目《妻子的浪漫旅行》,就已經上檔!先行片段係要兩公婆重回佢哋第一次拍拖約會嘅地方,估唔到陳小春第一次約應采兒去嘅,竟然係呢度!?

撰文:Sunday Kiss 圖片:YouTube截圖

九記牛腩搭枱食光速餐

應采兒回憶第一次同陳小春約會嘅地方,就係喺中環嘅九記牛腩,而且仲要同人搭枱,根本就傾唔到偈,最後兩個人只係食咗15分鐘就閃人,應采兒話,嗰陣以為陳小春好孤寒,但係後來至知,原來佢根本唔識搵好嘢食,佢個世界就只有茶餐廳同打邊爐!

咁陳小春就梗係自我感覺良好啦!仲話香港Style就係食呢啲! 應采兒就話,當時其實心都涼咗半截!

采兒仲要不斷笑老公,明明唔鍾意畀人望,但係又要同人搭枱,同枱食客問想同佢影相攞簽名,就態度超衰!

再食番呢碗定情牛腩,陳小春話味道一啲都冇變!應采兒即打蛇隨棍上問:「咁我有冇變呀?」、「你有冇後悔娶我呀?」雖然陳小春答得敷衍,但係兩句簡單直接秒回:「冇!」,已經係最最肯定嘅答案。

陳小春喺節目中剖白,其實自結婚以嚟,都係由得應采兒想點就點,因為佢唔想同老婆起任何衝突,因為一有衝突,輸嘅一定係佢,所以只要老婆開心,佢就咩都冇所謂!

應采兒就慶幸佢哋嘅婚姻係可以互補不足,佢鍾意控制人,咁啱又搵到一個老公又鍾意畀人控制⋯⋯ 嗯!咁你哋真係天生一對喇!