星二代

2017年「星二代」寶寶大集合!

熱話

廣告

2017年係演藝界嘅豐收之年,講梗嘅係「星二代」嘅大豐收!去年演藝界特別多喜事,除咗陸續有藝人拉埋天窗,當然唔少得生番一個雞年寶寶啦!到底去年有邊個雞仔雞女出咗世?即刻嚟一個2017年「星二代」大全,一齊睇下邊個最有潛質做未來之星啦!

撰文:Sunday Kiss
圖片:藝人Facebook,微博,Instagram

1. 胡杏兒 Brendan Lee

胡杏兒同老公李乘德(Phil)嘅心肝寶貝喺去年10月13日出世!一直心大心細諗緊順產定開刀嘅杏兒最終決定自然分娩,誕下8磅B仔,取名Brendan Lee,Phil話呢個名係愛爾蘭名字,意思即是「小王子」。果然,佢哋兩公婆真係當正囝囝王子一樣,集萬千寵愛於一身!

2. 謝安琪 張繼聰 張靖

謝安琪(Kay)同老公張繼聰近年雖然各有各忙,但都冇擱置「造人計劃」,成功追多個女,湊成一個「好」字!

3.黎諾懿Lugus「小春雞」

黎諾懿同港姐老婆李潔瑩(Nicole)於2014年拉埋天窗,上年趁同Nicole結婚2周年紀念,喺社交網站上宣布太太懷孕嘅喜訊,仲幫BB改咗個花名做「小春雞」。去年四月,小春雞終於出世啦!

4. 麥雅緻 張頴康 「小花生」

麥雅緻(Angie)同老公張頴康已育有可愛囡囡小豆,去年10月17日再順利誕下囝囝「小花生」,阿康笑稱取乳名「小花生」,只因為喜歡一粒粒的食物,「我哋屋企鍾意啲嘢一粒粒,所以有小豆之後,就要有粒小花生。」

5. 吳若希Giselle「淼淼」

雖然吳若希(Jinny)喺去年10月先同男友Alex正式結婚,但係囡囡「淼淼」早喺四月已經出世啦!短短一年,Jinny已經經歷咗人生重要嘅兩件大事,正式升呢成為「何師奶」!

6.楊愛瑾Luken

楊愛瑾(Miki)喺3月30日誕下囝囝Luken,B仔比預產期早2星期出世,出世未夠六磅,佢當時話:「生B過程非常順利,冇我想像中咁痛。」佢仲話生完嗰刻同老公可以即刻生多一個啊!

7. 葉翠翠JackChow

葉翠翠4月11日誕下囝囝Jack,囝囝宜家已經半歲大啦!自懷孕後,翠翠積極吸收各方資訊,喜歡分享嘅佢喺網絡頻頻出post教煲湯、燉補品、孕婦飲食、如何打扮做個靚孕婦等等;生B後,翠翠更加教大家點樣產後修身,猶如一本「人肉懷孕天書」,完全唔似一個新手媽媽。

 

 

8. 孫慧雪Riley Lo

宅男女神 孫慧雪 ,喺16年12月由雪雪BB榮升人妻,一個月後極速宣布造人成功!去年8月2日就喺FB宣布誕B,BB重8磅10,係一個巨B!升呢成媽媽之後,雪雪經常喺Instagram大晒囝囝得意相,母愛滿瀉!

 

 

9.林盛斌(Bob)Jaye

藝人Bob(林盛斌)屋企一向熱鬧,與太太Pearl育有三位小公主,今年8月尾太太更誕下孻仔Jaye,成功為林家添丁。囝囝命名林道申(Jaye),中文名意思係喺正確嘅道路上申明堅志,而英文名就同三位姐姐同一系列,只差一個英文字母。

 

 

10.郭富城Chant Kwok

郭富城同國產網模 方媛 (Moka)嘅小公主Chant今年9月出世啦!城城當日喺微博同大家分享喜訊,仲放咗囡囡捉住爸爸媽媽嘅相片低調放閃!不少網民留言祝福,仲叫城城快啲「追多個」,湊夠一個「好」字!

11.蘇永康 Jazz

蘇永康(阿公)自2014年迎娶女友馮翠珊(Anita)後﹐經近兩年時間的努力終於造人成功,Anita 3月20日正式誕下囝囝Jazz,二人正式升呢做爸爸媽媽!

12.鄺文珣小麵粉Chesney

今年已經42歲嘅鄺文珣(May)喺今年10月2日晚上宣布已經誕下6.3磅B女小Chesney!同老公應德榮(Andrew)已育有9歲兒子家澄(Cadence)和7歲兒子家柏(Casper)嘅May第三度做媽咪,但一樣難掩興奮心情!

13.張達倫勁秋雞Zachary

張達倫(Max)同老婆Kimmy於2016年結婚,今年一索得子,囝囝喺10月12日出咗世啦!阿Max喺IG宣布喜訊,話太太Kimmy順產誕下囝囝勁秋雞,重七磅幾,仲話自己有親手剪臍帶𠻹!

 

14.車婉婉Justus(BBQ)

車婉婉喺今年三月誕下混血囝囝Justus Quinlan(BBQ),囝囝啱啱已經踏入七個月大啦!婉婉錫到囝囝BBQ燶,社交網站上幾乎都係囝囝嘅寫真,又經常同大家分享囝囝嘅成長歷程!身為高齡產婦,佢都特別感恩同珍惜同囝囝嘅一分一秒!

 

15.楊采妮 Ignatius&Aloysius

楊采妮(Charlie)喺今年3月誕下雙胞胎兒子Ignatius同Aloysius,一步組成四人大家庭!

16.張名雅Mario

張名雅(Carat)今年三月誕下七磅重仔仔Mario,正式榮升媽媽!身為順產媽媽,佢表示陣痛嘅時候真係好痛好痛:「嗰種痛係冇法形容,我佗B時都冇嘔過,估唔到生嘅時候會痛到嘔咗兩次。」並指BB出世第一次喊,她同老公都忍唔住一齊喊,真的好感動!

 

2017年仲有兩個月就完結,唔知仲有冇其他「星二代」嘅誕生呢?

下一頁:回顧2016年出生的 萌爆星二代