Coffee林芊妤

Coffee林芊妤眼中 8種最要不得的男人

熱話

廣告

Coffee林芊妤除咗鍾意做瑜珈之外,不時都會喺自己嘅網上平台同網民互動吓,最近佢就自己同朋友嘅經歷,整理咗一個List – 「8種我認為要不得的男人」。Coffee除咗分享自己嘅愛情態度,亦都透露咗一啲過去嘅感情經歷,原來佢曾經畀初戀男友動過粗!睇完Coffee 呢個list,相信佢而家個老公都應該好完美嘅男人啦!

撰文:Joanne 圖片:林芊妤ig +YouTube

1.經常對你外表表示不滿的人

「佢係唔滿意你個人,或者係佢根本覺得你唔夠好,所以佢就會不停諗好多理由出嚟:你好肥!你對腳太粗!你個鼻又唔夠高!你睇吓人哋個面幾尖!幾靚!但係有好多女仔都好傻,因為咁就會質疑自己係咪真係唔夠好,冇晒信心,跟住就為個男人做好多嘢!但係可以老實同你講,一啲都唔值得!如果你識佢嗰陣已經係咁,佢都肯同你一齊,咁點解要嫌棄你呢?其實可能就係對你嘅新鮮感冇咗,或者已經唔再愛你!」

2.嫌棄或看不起你工作的人

「我以前有個男朋友,我唔鍾意你做大台,唔鍾意你拍戲,你唔好做喇!同我一齊去第二度,我養你啦!當時我身邊所有人都同我講,女人只會有兩樣嘢會屬於自己,就係錢同事業,如果呢兩樣嘢都冇,到個男人離開咗你,就乜都冇!當時我冇聽啲朋友講,一意孤行跟佢去闖蕩。最後當然係分開咗,我返到嚟香港,真係一無所有!呢個故事係教訓大家,千祈唔好將愛情睇得太重!」

3.會對你動粗的人

「我細細個成日都畀爸爸打,小小事都打,佢就同我講,我打你係因為我好錫你!我緊張你先打你!所以我好細個已經有一個概念,一個男人打我係因為佢愛我。我第一個男朋友,佢打我啦!然後佢喊住同我講,我因為太緊張你,我覺得嗰個男人想追你,我唔鍾意佢望你啲眼神!所以我打你,係因為我太愛你!當時我真係信佢!但係事實根本唔係,佢根本係個暴力狂!躁狂!佔有慾太強!係佢控制唔到自己情緒同脾氣!所以如果你經歷緊呢啲嘢,而你不斷搵藉口話畀自己聽佢係愛你,係錯㗎!無論點都好,無人可以以任何理由去傷害你嘅身體!」

4.依賴家人或喜歡借錢的人

「有啲人係會有咁嘅嗜好,冇錢就會開口問人借。當然,如果係屋企有人重病,或者有咩急切需要,有生命要脅而去問人借,我覺得係冇問題。但係如果係要買波鞋,因為呢個月手頭緊唔夠錢出去飲酒,而問人攞錢,呢個男人之後對你肯定會愈嚟愈差!如果你男朋友有咁嘅習慣,而你係一心想搵結婚對象的話,呢個就可能唔係一個合適嘅人!」

5.對長輩沒禮貌 或從不見你家人的人

「我爸爸媽媽對我好好,有啲人屋企人可能好難頂,但係我覺得身為後輩都要遷就吓,或者係要有適當嘅禮貌。所以我遇到任何一個男仔,佢係唔識得去尊重我屋企人嘅話,或者係唔錫我屋企人,我係絕對唔會同佢一齊㗎!至於從來唔見屋企人,我覺得呢一點係比較嚴重,證明佢根本冇心去維繫呢段感情,如果只係短期發展,佢當然唔會想見你屋企人。如果佢係認真,反而會好想見你屋企人,因為呢個係對你嘅尊重。」

6.不願意見你朋友或走進你生活的人

「連朋友都唔願見,即係佢根本唔想進入你嘅生活,唔係要佢識晒我啲朋友,又或者同我啲朋友做Friend。我都識得有啲女仔,佢男朋友唔會見佢啲朋友,或者會睇唔起佢啲朋友,認為冇必要去認識,呢啲男人就太自大喇!佢根本冇心同你交往,先會出現咁嘅行為。」

7.突然想改變你原有性格的人

「識你嘅時候覺得你好爽,或者覺得你嘅性格好女仔,但係到後來佢就諸多挑剔,我唔鍾意你咁,我鍾意女仔點點點,好似想幫你打個程式入個腦度咁,想將你變成佢心目中嘅完美女友,去迎合佢,遷就佢。咁佢唔係愛你,佢只係好愛佢自己!」

8.喜歡挑逗其他女生或愛說謊的人

「我最接受唔到呢一種人。唔係話要你部電話刪剩我一個女仔,你都可以有女性朋友,冇問題嘅!但係我最接受唔到嘅係,好多個大話,一個接一個,你原諒得佢一次,佢就總會有下一次,如果你男友係有鋪咁嘅癮,我個人就覺得唔可以接受!

Coffee最後更提醒大家,如果嗰個男人話畀你知,佢係個咁唔要得嘅人,但係你都仲要繼續同佢一齊,呢個就唔係個男人嘅問題,係你嘅問題。所以你要搞清楚自己想要啲乜,唔好搞到自己遍體鱗傷,仲要怨個男人,因為感情係雙方都有責任嘅!