名模媽媽 Ana R. 搞 親子app 玩盡香港

撰文：Ling
攝影：Simpson Chiu（部分相片由受訪者提供）
場地：Butcher and Baker Café（tel：2591 0328）

名模齊齊變模媽

一班在港發展的混血名模如Lisa S.、Cara G.、Jessica C.等已陸續成為人母，Ana與這班好姊妹由講工作和扮靚，變成湊B經、餵母乳。「我哋嘅背景同經歷差唔多，做咗媽媽之後我哋有更多共同話題，好似餵母乳、餵BB食飯、去邊度玩等等。」

不少港人因為政治氣候、房價高昂、地小人多、教育壓迫等問題考慮移民，但一班在外國長大的模特兒，覺得香港才是理想的家，Ana覺得香港安全、交通方便，地方小但充滿樂趣。「我覺得美國仲比香港危險少少，因為美國容許民眾持有槍械，對於小朋友成長我覺得唔係咁安全。我嚟咗香港超過15年，10年前仲創辦咗model公司，我哋已經紮根喺香港。」

嘆香港讀書好貴

不過Ana對於香港的教育制度也有微言，最頭痛是學費問題，為了幫女兒搵好學校徹夜難眠，作為外籍人士，讀本地傳統學校未必融合到，讀私校或國際學校又太貴。「搵間適合Maya嘅學校唔容易，因為唔同學校有唔同教法。最困擾係香港學校嘅學費有啲失控，全世界得香港係咁。」

Ana強調作所有決定都以女兒為大前提，找學校也一樣，最緊要女兒喜歡。自誕下女兒之後，Ana笑言已經好少理會老公，「啱啱結婚你會成日諗住老公，同人介紹老公會稱呼佢做baby；但當你有小朋友之後，小朋友先係你baby。你做所有嘢都係為咗baby，包括搵學校、搵餐廳、搵地方玩等等。我好耐冇為自己shopping，我買所有嘢都係俾個女，我已經唔記得對上一次買衫俾自己係幾時。

社會一路變 谷小朋友無用

Ana錫女錫到燶，但斷言絕不做虎媽，她覺得家長對小朋友必須平衡讀書與玩樂，而且世界變得那麼快，用今天的社會狀況去谷小朋友，將來可能不合時宜，所以應該培養小朋友多元發展，以適應將來的社會變化。「好似我哋依家做緊嘅工作，將來都未必存在，甚至有新嘅工種取代。即係你依家想小朋友做呢份工，可能將來根本冇得做。小朋友正面對急速轉變嘅社會，所以我哋要幫小朋友平衡發展，從多角度學習，但最重要係俾小朋友過一個開心嘅童年，因為一生人只有一次童年。」

Ana形容女兒的性格似足她，為人隨和、開心，尤其雙眼最似她，女兒亦喜歡跳舞、音樂和畫畫，是個活躍的小朋友，Ana經常要找地方讓女兒放電。「我去邊都帶埋Maya一齊，俾佢出去睇多啲，我會盡量揀適合小朋友嘅地方去，會留意有冇育嬰室、餐廳有冇high chair、玩樂設施等等，Maya好鍾意食嘢，我成日搵新餐廳俾佢試。」

囡囡玩盡全新界

16個月大的Maya已曉行曉走，Ana亦放手讓女兒自由摸索，她笑指女兒學識走路之後，常放開媽媽的手自己走開。「小朋友識行之後，就需要俾佢哋多啲向外探索，雖然香港地方細，但充滿親子玩樂好地方，我哋住喺新界，成個新界都係Maya嘅至愛。」一家人玩盡新界，最常去西貢和馬鞍山一帶，最喜歡翻新過的馬鞍山公園，「嗰度好正！隔籬有圖書館同兒童遊戲室，幼兒都啱玩，重點係免費！」

她另推介去大埔海濱公園踏單車，風景怡人、空氣清新，假日亦會聯同一班朋友去西貢BBQ，走走西貢郊野公園。郊外好去處還有獅子山公園，內有兒童遊樂場及社區園圃，讓小朋友感受農耕樂。

搞app集合全面玩樂資訊

因為女兒的出現，令Ana認識香港更多有趣地方。一開始Ana對搜索玩樂之地感到束手無策，經常一手抱着Maya，一手上網搵零散資訊。她發覺坊間沒有一個全面提供玩樂、親子餐廳的資訊平台，她決定挑戰自己，與另一位媽咪級拍檔Cleo一齊搞親子app「Playdays」，為廣大家長打開方便之門。

資訊科技絕對不是兩位媽咪的強項，她們花了很多時間去理解箇中程式，進行無數次用家測試。介面雖看來簡約，其實一個掣可花上20小時製作和解難。「每一日都係課堂，從沒有停止學習過。」在開發過程中，Ana也驚覺香港原來有那麼多免費好玩的地方，令一家人的生活十分豐富，「我以前都唔知道原來香港有瀑布！」

在Playdays中，用家可按活動及地區作分類選擇，活動類別包括運動、景點、海灘、文化、緩步徑、圖書館、博物館、公園、室內遊樂場、泳池、餐廳及購物商場等，每個地方詳列介紹，更有顯示泊車、育嬰室、嬰兒護理間、適合嬰兒車行走、可搞派對等資訊，十分體貼媽咪需要。另設Events專頁提供特別活動資訊，如音樂會、展覽及工作坊等，連免費、收費、年齡限制等資訊亦一目了然。

Playdays上架後得到正面評價，有家長更表示為何不早一點開發，連Ana的老公也從app中尋找遠足及放狗地點。得到家長的支持，推動Ana與拍檔Cleo將來開發更多功能，例如提示你的所在位置附近有甚麼好玩地方等。該app暫時只有英文版本，Ana表示下一步正是提供中文版，希望暑假推出，令更多本地家長受用。

親子好去處推介

大埔海濱公園
佔地約22公頃，是康文署轄下最大公園，內有兒童遊樂場、海濱長廊、香港回歸紀念塔、昆蟲屋及單車徑等多元化設施，來個單車親子樂最理想不過。

馬鞍山公園
位於馬鞍山市中心，遠眺八仙嶺群峰，風景優美。設施包括迷宮式設計的花園、兒童遊樂場及緩跑徑等，旁邊更設有圖書館、體育館和兒童遊戲室，小朋友可放足一日電。

獅子山公園
鄰近黃大仙市中心，除了設有兒童遊樂場外，更設面積達700平方米的社區園圃，讓小朋友感受農耕樂。玩完去埋附近的燒烤場BBQ，玩完有得食！