BB食譜

大肚陳倩揚 轉行出BB食譜

育兒

廣告

2008年港姐亞軍陳倩揚(Skye)宣布懷第二胎,再陀男B!現已八個月大,暫時未改名,預產期一月,Skye笑言今次陀B時間剛剛好,「坐完月就可以逗利是,可以出關去玩喇!」雖然第二次陀B有經驗,不太緊張,但她同時要照顧3歲大仔羲廷,睇功課、教畫畫、培養興趣等等,身心較第一次疲憊,懷孕初期更適逢工人姐姐辭職返家鄉,煮飯湊仔做家務一腳踢!最近有傳Skye被調離《東張西望》,她日前亦在微博宣布提早放產假,但她不愁寂寞,最近有新project,撰寫首本BB飲食書籍,收錄多款自家食譜,每天烹調愛心飯給羲廷,由他負責試食,再改良,成為她懷孕期最大寄託,預計明年出版。

學做哥哥重分享
上次訪問陳倩揚一家,羲廷仍是半歲大的手抱BB,如今已是3歲人仔,更即將榮升哥哥!Skye正慢慢灌輸哥哥的概念給羲廷,「佢始終仲細,冇強迫佢接受多咗個細佬,逐少逐少講,好似個肚初初未大,我就話佢聽有個小生命喺裏面,佢就好疑惑,我就俾佢聽吓肚裏咕嚕咕嚕聲,就算未聽到都等佢習慣吓。又好彩我細佬個BB一歲,成日嚟我哋屋企玩,我就趁呢個機會教佢,第時細佬都好似表弟咁㗎,佢就慢慢理解到兩兄弟係咁樣,佢識行識走,大個啲自己食飯,但細佬仲爬緊,要人餵。」

羲廷已準備做哥哥的責任,正學習與弟弟分享,「依家個肚大咗,佢問媽咪點解你個肚咁大?屋企仲有大肚相,我話你之前都喺媽咪肚中游水,所以依家你問佢細佬住邊度,佢識答你住喺媽咪肚皮度。同埋佢開始學識分享,食嘢、玩玩具,佢都話留番俾細佬,或者擺落個肚度,好似餵公仔咁,哈哈!見到佢真係好得意,佢一日比一日唔同,一日比一日學識哥哥嘅概念。」

每朝踢醒阿媽
邊湊仔邊懷孕固然辛苦,Skye頭三個月仍有少少嘔,有時為了照顧羲廷,忘記了自己身懷六甲,但她以忙碌為懷孕動力,不做「癱己」,希望BB感受到她的正能量,「我心情一向樂觀,陀羲廷嗰時都一樣。我有keep住做嘢,每日做嘢都要有power,BB會感受到。」

Skye沒刻意胎教,反而着重彼此交流,從胎教就開始與囝囝溝通,「有時揸車、瞓覺,佢踢得好勁就會同佢傾偈,每日一有時間就傾,佢知㗎,佢肚餓會踢我,食飽就瞓覺;我返工見人,佢又好興奮踢我,我開會佢又好似一齊參與,好得意好過癮㗎,佢同我係一齊經歷每一日。」弟弟未出世,已急不及待與哥哥玩,Skye笑說:「哥哥一玩佢又好開心踢我;哥哥每朝瞓醒會過嚟我度,我仲瞓緊,佢已經要踢醒我。」

主食十穀米
現懷孕八個月的Skye,密謀生多個,說的是她首本個人食譜,主打BB飲食,她一向.重健康飲食,烹調.菜少鹽少糖,米飯主要食十穀米,少食白米,十穀米成分包括糙米、黑糯米、小米、小麥、蕎麥、芡實、燕麥、蓮子、麥片及紅薏仁等,希望囝囝跟隨健康飲食,所以她.手鑽研BB食譜,部分菜式亦以十穀米和糙米等製成。「呢類米飯高纖有營養,反而白米糖分好高,唔係話要計咩卡路里,但小朋友吸收高纖維,對腸胃同皮膚都好。不過佢細個對呢類米消化冇咁好,或者咬唔到,就先俾少少佢試,撈埋白米,比例大約三比一,老公一半一半,我就比例最高。」

Skye喜歡烹飪,常上載自創菜式到社交平台,很多朋友網友請求食譜,讚揚配搭新穎,簡單易煮,「煮俾小朋友好傷腦筋,唔可以用太多調味料、太肥膩,平時我會買新鮮食材自己醃,但好多媽咪都忙,要簡單健康又要醃得好味,好難喎!所以我研究方法,例如自己浸鹽麴用來醃肉;顏色亦要吸引,配搭新鮮冇咁悶。」

愛吃彩虹飯
丈夫陳浩然和羲廷成了試食專員,新書針對小朋友口味,凡是羲廷喜歡的菜式,都盡量輯錄新書中,Skye說:「佢食嘢好嚴謹,唔係乜都食,老公都係咁,擺入口前會問咩嚟㗎?又望又試,鍾意先繼續食,如果今次呢個菜式佢唔鍾意,就諗辦法改良,例如黑木耳好有益,就咁炒菜佢見黑色一條條就唔食,但切粒擺入餃子,佢咪食囉!」

羲廷最喜歡媽媽煮rainbow rice,即一大堆食材切粒炒飯,如雜菜粒松子仁三文魚粒炒飯,有三文魚、青豆、粟米、松子仁、蘿蔔、提子乾,加上糙米,一碗飯五顏六色,「平時俾粒松子仁佢未必食,但撈埋一齊佢就食,而且呢個飯嘅菜比較高,一次過食到好多菜,唔怕偏食。」

畫畫最投入
學業方面,羲廷剛升讀九龍塘一所熱門幼稚園K1,每朝鬧鐘一響即刻彈起身,放學返家又好好唱口,但數到最愛竟是搭校巴,Skye笑稱:「之前N班我接佢放學,佢話要上人哋校巴,今年就應承俾佢坐,佢每日返學放學都好開心,九月第一日返學,第一次上校巴即刻同我拜拜,好開心頭也不回,對我完全冇依依不捨,反而係我囉。」

眾多興趣中,羲廷最喜歡畫畫,父母也特意為他另外報讀繪畫興趣班,爸爸陳浩然指看着兒子每天畫畫的進步,都好感動,「佢一開始咩都唔識畫,之後慢慢睇到佢有紋有路,今朝仲畫咗個扶手、畫架船,雖然唔係好似,但佢有呢個概念,開始識畫線、圓圈、曲線,之前佢會叫我幫佢畫架車,依家慢慢都識畫喇。」

身教要有禮
老師對他的評語是識性、熱愛學習,尤其是畫畫、唱歌最投入,做得好好,Skye聞言也放鬆不少,「每星期有閱讀分享,好簡單講一句,老師話佢描述得幾好,唔怕醜,呢方面都似我,唔係好怕生保,哈哈!佢整體.學校OK,學得開心冇壓力,佢有主動答問題同唱歌,最緊要有禮貌。」

羲廷的確斯文有禮,訪問當日一見到我們一行工作人員,有禮地打招呼;玩坐車時,地下有些路軌圖案地毯,他更下車整理地毯,非常有規矩!Skye指很重視身教,自己和丈夫無時無刻做好榜樣,「小朋友係父母一塊鏡,小朋友出嚟係點,人哋就睇到父母係點,小朋友呢個階段,父母係佢嘅全世界,佢眼中只有你,你教咩佢就學咩。依家返學會多咗老師、同學,但其餘時間都係對住你,所以父母身教係最重要。」

撰文:Ling 攝影:溫俊鏘(部分相片由受訪者提供)
化妝:Onki Lau 髮型:Match@HAiR
服裝:Something Blue(Skye)、Toonsland( Auryn)
場地:Mills International Preschool(tel: 2717 6336)