如何幫助幼兒學說話
撰文︰Kenix
助幼兒學說話6要點
1. 佢有一個成日同佢講嘢嘅媽媽
由佢一舊飯嘅時候已經不斷同佢講嘢，介紹每一樣事物俾佢聽，由花草樹木、飛機雀仔、風聲浪聲……咩都講得一餐。
2. 少講BB話，講多啲大人話
我相信小朋友模仿力同領悟力都好高，佢哋講BB話係因為生理上未ready，講得多BB話，未必可以幫到佢理解，所以盡量講多啲大人話，佢聽多啲完整嘅說話對佢哋講嘢幫助會大啲。
3. 食物盡量不碎上
口肌發展對小朋友說話有絕對直接影響，如果平日準備食物都會切到好碎，連咀嚼機會都唔夠，會影響佢哋口肌發展，而影響佢哋說話表現。所以唔同階段，我哋慢慢放手，俾多啲心機耐性去準備唔同質感嘅食物，咀嚼多啲，對說話絕對有幫助。
4. 多親子按摩
唔係hard sell，對按摩有認識或者有上過我堂都知道，按摩時會刺激腦部發展，而按摩過程係同BB溝通好時機，呢個時候同BB講嘢，佢都會特別專注，而且有研究顯示，按摩可以幫助小朋友學習更專心，所以細至BB大至成人，按摩都係非常有益嘅活動。不過記住按摩要父母親手做，先會得到最大嘅好處呀！
5. 從不強迫
我教小朋友比較隨意輕鬆，通常見到咩就講咩，好少會用我一句你一句嘅方法去教NUNU講嘢。因為詞彙對小朋友嚟講係抽象，不斷重覆我哋想小朋友講嘅嘢，佢哋係有能力去重覆我哋講嘅說話，但係小朋友未必係真係明我哋講咩（佢要focus喺聽我哋講咩同埋重覆我哋指令，可能已經miss咗用眼睛去觀察同感受，我哋呢啲動作反而影響咗佢主動學習嘅動機！）學習過程中，佢哋覺得唔有趣的話， 我相信，小朋友未必會好願意繼續同我哋講落去。
其實喺Nunu細細個未識講嘢嘅時候，我同佢落街見到有公公婆婆喺樓下坐，我都會同公公婆婆打招呼。 之後就同佢講，媽媽又見到嗰個公公或者婆婆或者姐姐喇。 婆婆同你同媽媽講早晨呀！ 慢慢佢就識分婆婆公公姐姐或者哥哥等等，亦會從我身上學識基本嘅社交，比較唔會怕醜，自然講多啲嘢。
6. 天生的
意思係每個人嘅發展同性格都天生不同，所以如果做哂所有方法，都覺得小朋友說話唔多，首先唔洗驚住，因為成長環境、父母遺傳同性格都會影響佢哋說話嘅意慾，有時未必係能力問題，而係意慾同性格問題。（大莫生口水多過茶，點都過到少少基因俾NUNU嘅）
給孩子信心
快講嘢或者慢講嘢都係大人去衡量，只要俾多啲信心小朋友，用適合自己子女嘅方式去教小朋友，我相信唔會有太大問題。以上係我作為媽媽身份嘅分享，希望幫到有疑問嘅你。
如果對子女嘅發展有唔放心，就最好搵專業醫護做專業評估，盡快搵出原因先可以對症下藥呀。
