父母減壓

父母減壓 情緒舒導遊戲工作坊

育兒

廣告

你有壓力,我有壓力,現今社會,就算工作又好,冇返工又好,都一樣有壓力,有壓力就難免有脾氣,講真,有時幾忍得都好,始終都會有爆嘅一日。既然大人都易發脾氣,更莫講話小朋友啦,佢地咁細,又點識收斂?佢地梗係開心就大聲笑,唔開心就發脾氣架啦!但作為父母,都冇理由由得佢,但鬧佢又會有反效果,可以點做?

父母減壓 情緒舒導遊戲工作坊

嶠媽前陣子參加左由 同行教育 x BABiBOO 舉辦嘅「情緒舒導遊戲工作坊」,只要係 BABiBOO 會員就可免費報名參加,嶠媽我就因為新年離港旅遊,所以選左最後一場,工作坊合共有4場。

工作坊一開始,就有野要爸媽注意,就係《只有正面溝通、只有欣賞》當然其實要做到好難,但都唯有盡力啦!正面溝通類似係唔好講「不要點點點,可以改做不如咁咁咁」,欣賞就係係另一角度,去看看自己嘅小孩,唔好佢一做唔啱自己心水嘅,就覺得係錯!但講就容易,做好難!其實 Miss May May 從來冇講過你一定要做到,盡力就可以!透過 Miss May May 設計嘅遊戲,過程中爸媽可以更了解自己嘅仔女,同時了解自己;明白小朋友嘅感受,從而知道點處理小朋友嘅情緒。

遊戲開始,就先係熱身活動,小朋友同家長互相幫對方嘅鼻鼻搽上一層 cream,之後再將棉花球貼在鼻上,再同其他家庭比賽,鬥快將自己同爸媽鼻上嘅棉花球吹落地。其實玩嘅過程爸媽同小朋都係學習緊,例如嶠爸知道芊嶠唔夠力吹,就幫手一齊吹,其實係好 sweet 嘅一件事!

之後就係比較靜態少少嘅活動,首先嘅20分鐘,大家就要先用泥膠製作一個代表自己嘅雕塑。

完成後就要同隔離嘅家人換位置,望住家人嘅雕塑,你可以再加一啲野,係一樣你欣賞個位家人嘅野。例如:媽媽煮得一手好餸,咁就加碟餸落去,代表你欣賞媽媽煮得一手好餸,約有10分鐘時間去添加。完成後,如果好似爸媽都有去玩,就再換位置,好似剛剛咁,將你欣賞另一位家人嘅野加上去佢嘅雕塑到,都係有約10分鐘時間去添加。最後,就係回到本來嘅座位!

之後 Miss May May 就派左一疊情緒卡,爸爸可以睇住啲情緒卡,一路睇,搵下剛剛觀察小朋友製作個時有嘅情緒,好嘅當然讚佢,唔好嘅就梗係唔好鬧佢啦!拎住張情緒卡,去話比小朋友聽,你剛剛有咁樣喎,咁不如下次我地試下咁樣啦!希望可以話比小朋友知佢地製作時有壞情緒出現,下次可以點做!咁嘅方法好特別,因為可以同小朋友一齊反思,係教導小朋友嘅過程中,爸媽都可以反思一下自己,到底自己係咪都係咁呢?最後 Miss May May 希望各家庭同其他人家庭分享一下,大啲嘅小朋友都可以自己分享一下,製作個時有冇啲咩好或唔好嘅情緒呢?

嶠媽我覺得情緒智商係好重要,因為小朋友係跟住爸媽來學,爸媽係點,佢就會係點!所以當遇到佢地鬧情緒個時,冷靜好重要,唔好成日同佢地講唔可以,嘗試同佢地講不如咁試。同樣係叫佢唔好做,但後者聽落舒服好多,而且多鼓勵小朋友,咁樣先會可以同情緒 say goodbye 架!我好慶幸有機會參加今次嘅工作坊,得著好大,同時亦係一個可以增進親子感情嘅好機會。希望來緊 BABiBOO 會再有機會和同行教育舉辦多些工作坊,今次參加唔到唔緊要架,大家記住密切留意 BABiBOO Facebook 啦!

===================================

BABiBOO

Facebook:https://www.facebook.com/babiboo.hk

店舖地址:D2 Place TWO 1 樓 101 號舖

聯絡電話:3594 6089

Whatsapp:5348 2495

下一頁:親子好去處 新幹線主題餐廳