蔣怡哭別愛女尋學廚夢

育兒

廣告


對飲食一向有心得的蔣怡,婚前已在中港兩地參演多個飲食節目,食極唔肥的天賦,可以盡情品嘗天下美食。自誕下女兒嗡嗡後,Coco減少幕前演出,專心在家湊女,空餘時間更鑽研烹飪,為家人炮製美食,令她再燃起學廚的心。「我一向好鍾意煮嘢食,兩三年前已有打算,當我想報學校嘅時候就發現大肚,要暫時放棄,我心諗唔知仲有冇機會讀呢,可能要等BB大個先得。呢一年我擺好多時間照顧BB同老公,成日喺屋企煮飯,開始pick up番烹飪,我發覺自己真係好鍾意,煮飯真係好開心,好想去讀番呢樣嘢。」

Coco為此事與老公商討,Dickson竟鼓勵愛妻馬上起行,Coco說:「佢話如果你想去,依家就要去,你讀完BB啱啱兩歲,如果再遲啲,佢開始懂性你好難行得開,可能要等佢讀大學先有自己時間,我諗諗吓又係喎,依家唔走就冇機會。」這個決定來得果斷,僅考慮了兩日就決定報名,九月開學。

即將與女兒嗡嗡分開九個月,Coco雖有不捨,但她不擔心女兒乏人照顧,「身邊有太多人錫佢,我爹哋媽咪、老公、工人姐姐等等,個個都錫到佢燶。但有啲需要小朋友一兩歲學嘅習慣、規矩,我擔心冇人教佢,我好難遠距離理到咁多,好似唔好俾佢瞓覺前飲奶,屋企人未必控制到。呢一年BB性格可能會變,被縱壞咗啲,但我番嚟佢都係兩歲,我仲可以改番。」能追求夢想是一件開心事,但Coco預料將有極不開心的時候,故沒要求自己堅強,「我知我一定會好掛住BB,我一定會喊,但我可以接受。」