趙頌茹

走出鬼門關愛要及時 趙頌茹 邊學邊做好媽媽

育兒

廣告

在炎炎夏日之下, 趙頌茹 (阿Yu)剪去留了多年的長髮,換上一頭清爽短髮,令人眼前一亮,正如她的人生重新出發。母兼父職的阿Yu為照顧兩個女信希和愛希,幾乎投放所有時間在女兒身上,她坦言自己非萬能,只是邊學邊做一個好媽媽。隨着信希升讀小學,阿Yu終有時間開拓自己的時裝網店生意,一圓做老闆的心願,三母女的生活已在軌道上順利行走。

今年初在台灣一次交通意外,令阿Yu對人生有所啟發,當時阿Yu被一輛電單車撞倒,幸好只受皮外傷,如果她行出一點,就會撞到應。返港後她回想當時的情景,才驚醒自己險進鬼門關,如果自己死去,誰可以照顧女兒呢?阿Yu有感而發愛要及時,包括女兒、父母和好朋友,「返到屋企見到佢個女瞓覺個樣⋯⋯好慶幸自己仲有得望。你想表達愛意就要快,想做就做,想錫個女要即刻錫,即使過去人生有唔如意,有唔鍾意嘅人,都要學識放低。」

撰文:Ling
攝影:Jacy Yip(部分相片由受訪者提供)
化妝及髮型:MoMo Chow & Venus@嫁妝Ms. Workshop

服裝:Rococo
場地:V City

習慣「三個女人一個墟」

「三個女人一個墟」的生活,阿Yu和女兒早已習慣,「依家叫我唔湊佢哋我仲唔慣,雖然湊兩個係辛苦,但因為有佢哋兩個我好開心。」要獨力照顧兩個女,阿Yu明言最大困難是力有不繼,尤其4歲半的細女愛希比較活躍,喜歡跑來跑去,需要好多體力去「捉馬騮」;而快將7歲的信希,暑假後將升讀津貼小學二年級,功課愈來愈忙碌,阿Yu要幫手睇功課和溫書。她不敢形容自己是萬能媽媽,她只是邊做邊學,自己從孩子身上也獲益良多,「小朋友每年長一歲都有好多經歷,我都係不斷學習。」

信希已是一名小學生,阿Yu開始讓她自立,先由睡覺着手,因為多年來三母女習慣一起睡覺,最近她讓信希獨立一間房,「但有時夜晚3、4點,佢會走入嚟攬住我瞓,好窩心。」至於愛希比較「反瞓」,阿Yu怕她碌落床,一起睡覺仍較安心。

女兒向同學坦白父母離異
信希的性格比較早熟、文靜、愛思考,會收埋自己不易吐出心聲;相反愛希喜歡表達自己,不論喜怒哀樂都會高呼出來。隨着女兒長大,表達能力提高,阿Yu指信希已慢慢開放自己,「我一直有引導佢多啲同我分享,依家佢大個咗識表達自己,願意主動同我傾多啲。」

雖然信希比較內斂,但在媽咪的輔導和愛護下,她對家庭環境看得開,認為自己與其他小朋友無異,更向同學仔坦承父母已離婚,阿Yu說:「我都好驚訝,佢竟然好坦白同人講爸爸媽媽離咗婚,佢真係無嘢,唔覺得自己有咩唔同,只係父母唔係一齊住。」

阿Yu努力母兼父職,希望離婚沒有影響女兒成長,所以當聽到信希的說話後,阿Yu頓然覺得女兒好懂事,放下心頭大石。「做父母最怕係要小朋友背負不必要嘅情感包袱,依家聽到個女咁講,我就可以簡單直接同佢傾,了解佢依家嘅狀況,包括讀書、朋友、情緒等等,最重要畀佢知道佢同其他人一樣,得到嘅愛亦都係一樣。」

在輕鬆環境下輔導

阿Yu一直以來的輔導方法好簡單,把話題融入日常談話中,令氣氛輕鬆自然一點,絕非像開家庭會議般交談。「我會趁佢畫畫、同佢沖涼洗頭嗰陣問吓佢,我唔想氣氛太嚴肅。」

當單親媽媽其中一個困難是欠缺另一半商量,孩子每踏出新一步,媽媽都要比人想得更周詳,並多向身邊人尋求意見,阿Yu也不例外。「最緊要佢哋心理、成長健康,佢哋每做一樣嘢,即使幾細微,我都要諗對佢哋影響有幾大,好似讀書、上興趣班,我都會考慮好多嘢。」每個媽咪也盡力為孩子做最好的決定,不過阿Yu知道,大前提仍要看孩子意願,三母女必須緊密溝通與摸索。

阿Yu去年度過了一個重要關口,為信希選小學,她選校重視口碑、品德教育,以及小朋友能受壓的程度,最終信希入讀九龍區一間津貼小學,她表示返學好開心,亦追得上進度,阿Yu說:「小學嘅功課唔輕鬆,佢都唔係好高分,但可以如期完成已經OK。出嚟社會要面對好多困難,最重要係學習過程中點刻服困難。」

姊妹情好幸福
阿Yu不期望女兒成績卓越,名成利就,能夠健康成長才是首重。早前細女愛希生病一星期,變得沒精打釆,阿Yu也悶悶不樂,寧願女兒頑皮搗蛋。「之前細女病咗一星期,突然成個人唔講嘢、 唔食嘢,成日要瞓覺,所以佢哋活躍我仲放心啲,活躍即代表健康。」

雖然兩個女有時好頑皮,經常爭玩具嘈嘈閉,令阿Yu非常激氣,但她看着女兒猶如看到自己與妹妹的童年,雖然妹妹比她小五歲,性格一動一靜,卻培養出難能可貴的姊妹情。「兄弟姊妹一定會鬧交、打交,但好快又變番糖黐豆,我兩個女一樣有嘈嘅時候、 曳嘅時候、乖嘅時候。」

阿Yu坦言能有好姊妹十分幸福,自己直到十多歲才明白手足之情,可以一齊行街、睇戲、交換衣服穿等等,她希望兩個女也好好珍惜這份情誼。「我希望佢哋可以快啲進入好friend、糖黐豆嘅階段。」不過,愛希似乎不想媽咪與阿姨糖黐豆,經常對阿姨呷醋,尤其不准她們「攬頭攬頸」,「佢話我淨係可以攬佢同家姐,唔可以攬其他人!」愛希聞言也笑笑口:「係呀!」

創辦時裝網店自強
女人要自強,母兼父職的阿Yu為養家要努力賺錢,除了娛樂圈的工作外,她最近亦開設了時裝網店,學做生意之餘,又可發揮自己 Styling 的強項,由入貨、設計、客戶服務一腳踢,更與妹妹拍住上做model宣傳。由於是網站生意,她可以在家工作,方便照顧女兒。

為小朋友打扮方面,阿Yu都有不少心得。由於小朋友愛跑跑跳跳,款式一定要舒適、乾淨利落,令小朋友不會絆倒,同時要平衡小朋友的喜好。「大女依家對着衫有主見,明白事理,知道今日踩單車就唔會着裙,顏色就鍾意簡單黑白、粉紅純色系;細女就鍾意mix and match、比較誇張嘅配搭,揀對襪去襯鞋會有大膽嘗試。我會按佢哋喜歡嘅顏色揀兩件衫,再畀個女揀。」

阿Yu自己亦趁夏日轉換新形象,剪去一把留了多年的長髮,感覺很清新,「我都覺得OK喎,以前覺得留長頭髮比較有女人味,剪咗頭髮之後配搭一啲耳環首飾,原來短頭髮唔代表冇女人味,,夏天又容易啲keep個髮型。」

暑假玩樂重環保
暑假期間,阿Yu安排囡囡多休息和玩樂,沒有補習班,但要做好平衡,希望她們從玩樂中有所得着。今年阿Yu想女兒提高環保意識,愛護大自然,所以最近安排了她們參加保育海洋的生態營和環保工作坊,其中一個工作坊是把被視為垃圾的海玻璃,循環再造製成夏日飾物,啱晒貪靚的囡囡;阿Yu亦有自製肥皂給囡囡洗澡,減少沖涼液的膠樽之餘,對囡囡的皮膚更有益。

阿Yu解釋自有小朋友後,對環保意識愈來愈看重,帶她們出走大自然及海灘時,更感到隨處垃圾,現在兩個女兒開始懂事,可以灌輸她們更多環保意識,例如發揮創意把廢物變玩具、慳水慳電等。「細個成日都聽到地球伯伯病咗,但生咗小朋友之後先真係明白環保嘅需要,好似今個夏天好熱,五六月氣溫已經升咗好多,好似冇四季咁,得番冷熱冇中間,地球真係病咗,好需要一代接一代去保護。」