輸贏不在起跑線 音樂家Harry哥哥:最緊要肯跑

育兒

廣告


在兒童界深受歡迎的Harry哥哥(原名王者匡),是大人細路的集體回憶,80年代開始,他用魔術變出孩子奇幻世界,無數的音樂表演更薰陶了不少學生哥。年逾50的他依然活躍兒童界,最新搞作是開辦兒童教育城,以多角度教育下一代。

Harry能保持童真,有賴日籍太太一丸綾子(Ayako)及5歲細仔王勇二(Yuji), Ayako是著名小提琴家,勇二在父母音樂薰陶下,亦拾起小提琴學習。勇二年紀小小已多才多藝,能操中英日三語,條起跑線已經比人前,Harry覺得起跑線前後不重要,最緊要肯跑,「小朋友仲要想跑、鍾意跑,贏輸唔重要,冇人知道未來係點,可能五年後、十年後,有新行業誕生,依家唔需要刻意跑贏人哋。」Harry正是從未停跑的最好身教。

4歲學拉小提琴
訪問當日,一家三口隨手拾起樂器,Harry吹直笛、太太拉小提琴、囝囝打鼓,沒綵排之下合奏動聽樂曲,最難得連勇二都如此合拍,非常有音樂天份。Harry表示自胎教已播放很多柔和音樂,每日講故事,囝囝一聽到音樂就會踢肚皮。真正開始音樂培育,大約是一年前,囝囝4歲開始,主要學拉小提琴,太太Ayako說:「佢3歲已經想學,因為我喺屋企會教人小提琴,但我覺得未是時候,等佢成熟啲先。」憑着教學經驗,Ayako指女生比較成熟,3歲可以學小提琴,男生的起步點是4至6歲,但男生學習快上手,到7、8歲已跟得上女生進度。

可能你會質疑,勇二的天份全靠父母遺傳,但Harry認為孩子的音樂才華,絕對能後天培育,「我每年同皇家音樂學院嘅尖子學生表演,大部分家長唔係音樂家,或從事音樂工作,甚至無學過樂器,但因為家長支持,加上培養出小朋友規律性,令佢哋恆常練習,冇一個小朋友唔練習就會叻,跳舞如是,畫畫如是,任何樂器都係。」勇二每日練小提琴,已完成三級試,將會跳級考第五級。

變魔術鍛鍊小肌肉
Harry在個人facebook專頁常分享囝囝趣事,最近勇二化身小助手,與爸爸在家合演親子魔術,「勇二好鍾意魔術,係一個好好嘅助手,好有急才。我俾啲技巧性魔術佢練習,佢最先學識變花,依家識用海綿球,小朋友手腳未完成發育,我用呢啲去鍛鍊佢小肌肉。」

Harry把魔術融入生活,隨手把玩杯碟變魔術,囝囝睇得多,自然有興趣學習,更成為父子間的另類活動。「好多人睇穿咗魔術個秘密,就以為自己識魔術,但做番出嚟又穿煲,發現無效果就放棄。魔術其實係一粒種籽,同生活解難息息相關,世上有啲嘢睇落無可能,原來可以用低B方法做到,令小朋友開始用另一角度思考,用創意解決問題。」

媽媽自製日語功課
法國詩人雨果有句名言,人的智慧掌握着三把鑰匙,開啟數字、字母和音符。勇二除了學音樂,語言亦走先一步,他自小中、英、日三語齊學,媽媽身為日本名小提琴家,傳授小提琴之餘,日語當然少不得,「從佢兩歲起,每朝早餐時間,我會俾兩張紙嘅日文功課,最初好簡單,只係連線,到依家五歲半,功課深咗、字都多咗,但一樣係兩張紙。」

Harry指小孩耐性有限,不能太長時間學習,他盛讚太太能平衡這一點,只維持早餐短時間學習,而且陪伴左右。「每朝做功課聽落好嚴重,但唔係㗎,佢覺得好玩,係我哋一家人嘅餐桌活動,呢3年佢已經好習慣。」勇二身為中日混血兒,從名字到上學,充分表現其混血風格。他就讀兩間幼稚園,上午返日本人學校「帝京香港幼稚園」K3(每年四月開學),下午讀返本地學校「嶺南幼稚園」K2,一日走兩場,大人都覺得辛苦,何況一個5歲小孩?但勇二非常享受,Harry解釋道:「一間佢覺得唔夠㖭,兩間學校佢應付到,嶺南係傳統幼稚園,唔係國際班,佢又掂喎,可能佢係超大仔啦,佢12月9日出世,我哋刻意俾佢遲一年入學,做大仔好過做細仔,等佢喺學校培養到自信心。」

讀兩間幼稚園
勇二曾入讀國際學校,但他只會說英語,反而失去自身的中日根源,寧願轉讀兩間學校,學習兩地文化。「所有小朋友都係反映父母嘅價值觀,既然爸爸係香港人,媽媽係日本人,而又互相尊重情況下,我哋當然俾個仔兩樣都試,亦可以參考邊類型中小學啱佢。」Harry指日本人學校重點不是教知識、做功課,而是訓練學生自理、獨立精神和關愛,「學校教佢綁鞋帶、洗手、換衫,勇二好細個已經識自己摺毛巾,自己揹袋、拎嘢,日本人好興拎好多個袋,鞋袋、便當、飯盒……咩都要袋,佢識得自己執拾好。」

返兩間學校之間,只有不足一小時空檔,有些小孩同樣返兩間學校,飯都沒時間食,要上車解決,但勇二卻沒此煩惱,12時先在日本人學校食飯,換好校服,12點45分等嶺南校巴接送,Harry指囝囝很享受午飯時間,「日本人好重視食飯,每人帶便當返學,一齊坐喺地下分享餸菜,間中有個PaPa Lunch,爸爸都可以去,我拎我個便當,佢又有自己便當,一齊坐低食,好開心㗎,日本人家庭觀念好強。」

暑假開辦教育城
七月暑假勇二仍要上學,日本人學校要待七月尾才放一個月暑假(冬季另有寒假),但父母已為他安排新節目。Harry年初接受蔡志明太太蔡李惠莉邀請,合辦全新大型兒童教育城Kido Town,為小朋友提供一站式學習天地,勇二都會參加當中暑期班。「其實開設一個小朋友有得玩,有得學好多嘢嘅主題公園,一直係我夢想,由idea至開幕只係好短時間,裝修亦只係兩個半月,成件事好magic。」

看着夢想接近完成,Harry一度流下男兒淚,「初初呢度黑沉沉咩都冇,只有石屎,大約一個月前,呢度仲係沙塵滾滾,但我第一次見到牆上有唔同顏色,呢一日我最大感覺,我好似小朋友入咗迪士尼樂園,我毛管戙,眼角有眼淚滴咗出嚟,一個人有夢想,原來真係有機會實現。」Kido Town將於7月14日開幕, 場內分成不同角落, 為了突出主題公園氛圍,Harry自封「鎮長」,會經常現身參與活動,另有美味小廚店長「哈哈媽咪」、糖果屋「Candy夫人」,連公關姐姐都變身「秘密調查員」!

視「巨人」哥哥英雄
要完成一個夢想,需經過重重難關,除了得到太太支持,與前妻所生的大仔至仁和二女祖兒,都給予不少意見,Harry說:「我一路有send相俾佢哋睇,大仔話好想返嚟,個女直頭上埋嚟睇!佢哋話老竇你今次發達啦!你恨咗咁耐!」26歲的至仁繼承爸爸衣缽做音樂家,主攻彈琴,剛完成英國皇家音樂學院碩士課程,將會升讀博士;而22歲的祖兒下月做律師,在英國執業。Harry很高興三子女同父異母,年齡相隔廿年,仍能和諧共處,至仁和祖兒十分疼錫這位小弟弟,「大哥成日同佢facetime傾偈,好錫佢!勇二都視哥哥為英雄,覺得佢6呎3好高,見到其他高人,佢都話哥哥先係世上最高嘅人!」勇二視哥哥為學習對象,希望將來有哥哥咁高,彈琴有佢咁叻,說不定將來與哥哥組兄弟幫Jam歌呢!

撰文:Ling
攝影:溫俊鏘(部分相片由受訪者提供)
場地:Kido Town(tel: 2382 2202)