鄭則仕與太太林燕明相愛27年：我一生最多謝嘅女人！

原文：東方新地｜圖片：東方新地、劇照

現時67歲嘅鄭則仕於演藝圈拍劇多年，現已成為人人口中嘅老戲骨。然而，鄭則仕出身自貧困家庭，於天台木屋長大，自小熱愛戲劇，因參加TVB舉辦嘅《聲寶片場》演技比賽，成功奪得總冠軍，而加入TVB踏上演藝路！

入行幾年，鄭則仕已兼任演員、導演、監製，1985年自編自導自演嘅《何必有我》，憑飾演弱智少年「肥貓」首奪影帝，期間片約不斷，一度成為香港片酬最高嘅喜劇演員之一，不但住千呎豪宅，仲請2個工人服侍，出入揸平治！

36歲時，鄭則仕遇上生命中唯一一位最愛，就是比鄭則仕細14年嘅林燕明。拍拖2年後，二人1991年拉埋天窗，大擺69圍請嚟唔少明星好友。婚後嘅林燕明為老公鄭則仕生咗一仔一女，自始專心相夫教子。

可惜好景不常，鄭則仕因與友人合資開電影公司經營不善欠債高達1700萬，鄭則仕最後賣車、賣樓兼搬去幾百呎單位，用自己以往賺落嘅片酬，以求自己還清債項！幸然，喺鄭則仕人生低潮時，好老婆一直不離不棄，支持及安撫老公，唔介意一家人慢慢捱。

鄭則仕曾指老婆生活慳儉，拒用名牌，仔女11歲前都係喺出口店買平衫著，並慶幸一家人都毫無怨言，齊齊為頭家努力。雖然要計住生活支出，但林燕明依然好愛鄭則仕，認為跟住老公一啲都唔辛苦，仲反而好幸福！

1997年，鄭則仕事業開始有起色，憑電影《三個受傷的警察》再度拿下影帝。其後為生活，鄭則仕返大陸拍劇。據了解，劇接劇嘅鄭則仕每日只瞓6個鐘，最終靠自己成功將所有債務還清，把自己所賺的錢交給老婆管理。

原來林燕明投資都有一手，之後幫鄭則仕投資4間物業全部合共賺1300多萬！雖然一家人苦盡甘來，但依然保持慳家生活方式，據知每次一家人外出吃飯絕唔超過$200，而自己買餸煮飯更會同檔主講價！

鄭則仕憑4幕演技大爆發

依家67歲嘅鄭則仕多年拍劇無數，曾獲第5及16屆香港電影金像獎最佳男主角，以及第2屆香港電影金紫荊獎最佳男主角，演技被受肯定！

相信唔少人對鄭則仕曾扮演嘅智障人士「肥貓」都有好深刻嘅印象，不過Kent哥並冇因此而被定型，反而多年嚟不斷試唔同嘅戲路，當中有嚴肅嘅正劇、喜劇、鬧劇等，演技不斷提升到更高層次！

近日鄭則仕喺《荷》嘅頭兩集已經演技大爆發，完美示範出點樣演飾多個「痛」樣，每個痛樣都足以令觀眾隔住個mon都知有幾痛，同痛又有分幾多種！

完美演釋不同的痛

《荷》第一集，鄭則仕因大師兄龐峰（秦沛飾）出賣而被擒，龐峰更為弟弟報仇與鄭則仕玩一局定輸贏，決定要千門事千門了！點知輸咗嘅鄭則仕仲要俾華探長文雄（湯鎮業飾）用煙灰缸打斷手，睇到咁大個玻璃煙灰缸打落去都唔好話唔驚兼唔痛！

然而，鄭則仕喺戲中為咗唔喺咁多人面前知到佢有幾痛，每下被煙灰缸打落去都死忍，唔會痛到嗌出聲，而鄭則仕痛苦表情亦相當到位，睇到人心都痛埋一份！