鍾嘉欣陀B五個月仍索爆 生埋今胎夠晒數
原文：東方新地｜圖片：東方新地 | 編輯：Sunday Kiss
鍾嘉欣生埋今胎夠晒數
正懷着第二胎的藝人鍾嘉欣，呢日由加拿大返港出席活動，見到佢以白色低胸連身裙配3吋高踭鞋亮相，腹部微微隆起，不過身形依然纖瘦，明豔照人！被問到肚中BB性別，嘉欣就話雖然已經照咗，不過兩公婆叫醫生唔好講，希望保持驚喜！
嘉欣同時透露，無論今胎係仔係女都好，都會係最後一胎，兩個夠晒數！
離捨女兒眼紅紅
今次嘉欣獨自返港兩星期，被問到會否掛住女兒Kelly，嘉欣隨即眼濕濕流露不捨之情，表示自己以為接受到，但一聽到老爺奶奶話個女喺屋企搵媽咪，佢實在係忍唔住！嘉欣又稱已經一路灌輸緊「家姐」呢個俾Kelly知，所以女兒近日愈來愈黐身，似乎係感受到威脅！
雖然話每個女人都係咁貪靚，不過鍾嘉欣在活動結束後，隨即換上黑色平底皮鞋，其他工作人員都對佢照顧有加，安全要緊呀！
鍾嘉欣頻發福利照
鍾嘉欣早前宣布懷上第二胎，同時宣布會離開加盟了13年的TVB，雖然已經甚少會出席公開活動，但嘉欣不時都會喺社交網po靚相！呢日嘉欣難得返港出席活動，化咗個靚妝，緊要影幾張靚相po上網啦！
早前，嘉欣再派福利，佢上載三張靚相，身穿華麗露肩短裙，依然美豔動人，其中兩張相仲擺埋誘人甫士，大騷白滑肌膚及修長美腿，點解會有大肚婆咁索㗎？
鍾嘉欣夏威夷度假
鍾嘉欣早前喺社交網上載咗唔少同屋企人去夏威夷度假嘅靚相，相中陀B三個月嘅嘉欣依然Keep得好靚，睇落完全唔似有咗。Linda不單身形纖瘦，一啲都唔覺有懷孕媽媽味，少女感依然～幸福甜笑嘅Linda同寫有「LOVE」字樣嘅氣球合照，佢留言話：「Family trip to Kailua Beach,Hawaii.Sending lovelovelove’s to everyone:).（家庭旅行去夏威夷凱盧阿海灘。同大家分享愛）」！
鍾嘉欣著火紅比堅尼開心晒孕肚
Linda係愚人節分享咗一張同囡囡合照，冇整蠱大家反而仲大派fans福利！相中，Linda身穿紅色比堅尼，抱住囡囡Kelly，母女二人笑得十分開心。陀B三個多月的Linda已經見到小小孕肚，肚子凸凸，不過四肢同身形依然Fit，大肚著泳裝一樣咁索！
鍾嘉欣成功懷第二胎
鍾嘉欣早前透過FB親證懷第二胎的喜訊，Linda上載咗一家「四」口的合照及BB超聲波照片，仲寫咗一大段肺腑感言多謝所有人，同時遺憾地宣布將會離開加盟了13年的TVB！
擁有一個Wonderful Family
Linda與老公(Jeremy)的根源自加拿大，但相識於香港，種下不解緣。他們相識結婚不久後便誕下女兒Kelly，Linda接受訪問時形容現在自己擁有一個Wonderful Family！
投入賢妻生活
Linda婚後亦是位好媽媽好老婆，令老公有舒適的居所：「我老公話我係好好嘅太太，我好為屋企嘅，我會準備好晒啲嘢，我老公返到屋企，好舒適㗎，有飯食啦，乾淨啦，又好錫佢啦，都細聲細氣嘅，我覺得OK㗎！」
為女兒老虎都可打死幾隻
Linda當媽媽後成長了不少，從前她比較自私，不會為人設想。但有了女兒後，她變得有責任感，不再只顧自己，會為屋企人著想。「我覺得係一個快速嘅成長，因為我結完婚即刻有小朋友，所以突然成長得好快，以前廿幾歲，我比較盲舂舂唔識諗，結婚之後，唔再淨係為自己，要為屋企人諗，成熟咗好多，真真正正明白到母愛係乜嘢，以前我以為我知，同埋我演戲，以為我可以想像做媽媽係點，直至自己親身生BB、湊BB，我先明白到嗰種母愛係大到用言語係形容唔到。」
生BB沒有想像般辛苦
Linda表示生BB過程沒想像中辛苦，當初她擔心順產會唔會十級痛，但到要進入產房、陣痛的時候已經開到十度快要生，卻覺得時間過得很快：「我十幾個鐘陣痛、生個半鐘，但成個過程感覺似三個鐘，眨下眼就完咗，同埋我發覺好得意，神就係創造女人生BB，所以入到產房唔會驚，只會諗要個女健康、安全生出嚟，嗰種母愛同勇敢已經蓋過咗痛。」
閒時老公亦會幫忙照顧女兒，一家人喜歡留在家休息。「我哋兩個都好鍾意留喺屋企，冇去遊山玩水，商場都少去，我哋最多都係附近行下，好少有咩活動。」 他們更希望將來可以有多一個小朋友： 「我哋有計劃嘅，希望將來可以有多一個小朋友。唔知幾時，但希望Kelly起碼一歲半後先開始試。」
女兒超級乖
Linda表示女兒超級、超級乖，唔扭計、唔喊：「囡囡8個月大時，除咗夜晚臨瞓前會喊三、四分鐘，跟住自己就瞓，瞓八個、十個鐘就起身，同埋我覺得佢係思想型嘅，點解呢？因為佢唔介意冇人陪，我要煮飯、處理家頭細務，唔得閒下下抱住佢，我亦都唔想縱壞佢，我每朝起身，幫佢換完尿片，擺佢喺play mat，俾啲公仔佢，佢就自己玩一餐，所以我覺得佢鍾意喺自己世界、鍾意自己諗嘢。」
Linda會做個relax和casual的媽媽，不會一開始就計劃要讀什麼學校，希望女兒能夠自己玩、在自己世界create一啲嘢，不要太依賴：「依家佢太細，我想觀察佢多啲，唔想咁早要佢學嘢，我諗番我細個屋企環境唔係咁好，冇得學任何嘢，依家我覺得我哋性格、工作任何嘢都OK吖，好似我細個原來已經鍾意演戲，爸爸媽媽返工，我會摷曬我阿媽啲絲巾綁喺個頭扮女俠，又扮拍拖、分手、唱歌，所以我哋想留意佢、觀察佢，發掘佢嘅喜好，到時先慢慢俾佢學， 唔會一嚟乜都學曬，我覺得會over咗。 」
待女兒長大後，Linda亦會讓女兒看自己的劇集：「可能俾《搜神傳》佢睇，係我入行第三部劇，訊息好好，可以教佢點孝順父母同樂觀面對人生。 」
