Dino

Dino @Soler 洋人學中文有法

育兒

廣告

二人樂隊Soler的細孖 Dino Acconci(夏天龍),與太太黃麗施(Nancy)去年9月再誕一子Orlando(夏恩澤),聯同三歲大仔Damiano(夏恩智、DaDa),結婚六年組成了幸福四口之家,問 Dino 想追多個女嗎?他笑說兩個夠晒數,「有老婆一個女人就夠。」

擁有意大利和緬甸血統的 Dino ,與孖生哥哥Julio在澳門出生長大,17歲到意大利讀書生活,其後回流返澳門及到香港發展音樂,而 Dino 更決定在港落地生根,讓孩子在香港讀書。在現今社會環境下,有得揀竟然揀香港讀? Dino 相信兩子可以在此學好中文,而且小朋友讀書開心與否,好視乎家長的價值觀,在港讀書一樣可以好開心。

讀本地幼稚園學中文

溝通能建立人際關係, Dino 認為必須學習成長環境中最多人說的語言,在港生活,就必須學中文和廣東話,所以他們把DaDa送往本地幼稚園,學好中文。雖然 Dino和Nancy能講流利廣東話,其實兩人只是識講不識字,Nancy也是從加拿大回流,所以日常生活一家人主要講英文,自DaDa升上K1後,三人就齊齊學中文,Nancy說:「因為DaDa要做book report,又有畫畫、貼紙功課,我哋每日一齊用Google translate翻譯中文做,連我哋都識多咗中文。」
不過,由於DaDa的中文程度稍遜,與同學間的溝通出現問題,偶爾感到不開心, Dino 相信這是孩子的必經階段。「每個家庭都有自己文化,小朋友去到一個多人嘅地方,點都要適應,我個仔要適應就係語言,本身佢好開朗,一見到其他小朋友就想走埋去玩,欠缺嘅只係溝通,依家見到個仔唔開心,有少少唔知點套入一個環境,我哋都有啲傷心,但我哋知道要有耐性、時間同信任,千祈唔好俾壓力佢,我哋從來唔會講『你做乜唔講嘢呀?』絕對冇,我哋喺屋企會加強愛與關懷,透過玩玩具去攝啲中文入去,佢反應都幾好。」

多聆聽同學說話

現時 Dino 主要多講中文,太太Nancy講英文,暫時是實驗性質,不追求快速見效,「佢只係一個三歲小朋友,我哋只係想俾個環境佢,睇吓能唔能夠加快佢嘅學習速度,成唔成功要睇佢,唔可以勉強。」
懂得廣東話、普通話、意大利文、法文等多國語言的 Dino ,分享學習語言之道,他自小家中講英文,但在澳門讀書的小朋友都講廣東話為主,所以 Dino 利用小息時間與同學溝通,自學中文。「我細個讀嗰間學校用英文教,但同學間就講中文,三歲前我好少同人傾偈,去到四歲我先開始多講中文,小息時我會聽同學傾偈,放學就睇吓卡通片吸收,所以依家我都俾囝囝睇卡通片學中文。」

鬼佬拒絕中英夾雜

鬼佬學中文,甚至港人都喜歡中英夾雜,但Dino絕不容許自己這樣,遇到不明白的中文生字,也不會用英文解釋,「我唔會講『我都好鍾意玩Jazz』,我會講『爵士』,我媽咪都唔俾我中英夾雜,驚我講唔到完整中英文。我返到學校見到唔識嘅字就問同學,例如有盒彩色筆,我唔會問『你可唔可以借支colour pencil?』我會問『你可唔可以借呢個叫咩名?』佢答彩色筆,我就再問『你可唔可以借支彩色筆俾我?』係我媽咪培養我用呢個方式去學習,唔一定要有個人教中文,最叻嘅老師係教到人自學。」
常言道,小朋友六歲前是學語言黃金期,腦部就像海綿吸收得好快,應趁機學多國語言打底,有助入讀名校及將來海外升學,Dino認為語言絕不需要太早學習,他16歲才自學意大利文、法文及德文,但德文少講已忘掉;普通話則是入行後,30多歲才學習,助自己到兩岸發展,「好多人廿幾三十歲先學普通話,兩年內已經精到呢種語言,係睇語言天分同生命嗰一刻,個腦部對學語言嘅信心。」

寂寞小孩:兩歲半識十種語言

語文有興趣才會學得好,Dino與Nancy曾在公園見過一個極端例子,「DaDa兩歲半時,有次帶佢去公園玩,見到一個來自富有家族嘅同齡小朋友,已經識講十種語言,包括泰文、越南話、菲律賓話、法文、英文、德文、西班牙文、中文等等。佢點學呢,每種語言請一個人同佢玩,幾個老師同佢出街玩,泰文老師走埋嚟,佢就講泰文,到越南老師走埋去,就用越南話問佢使唔使飲水、去唔去廁所,佢係識好多語言,但我哋見到係一個好寂寞嘅小朋友,唔識踢波、唔識得同我個仔玩,每日淨係同大人講唔同語言。」
家長應該思考一下,想子女多學語言,是為自己威風還是為孩子好?Dino提醒家長別忘記孩子的內心世界,縱使香港教育比較辛苦,家長仍可以令孩子學得開心。他覺得現時教育制度比較極端,有些傳統學校一日讀10個鐘,有些國際學校寬鬆到只有玩,數目字都未教好,「誰對誰錯唔知,係睇個家庭有咩方向,有咩能力去幫小朋友,如果家長緊張小朋友學得多唔多、好唔好,最大投資應該係幫佢發掘興趣。」

白日夢發掘創意

Dino指自己學結他,都是先發掘了興趣主動學習,「13歲我同阿哥突然撻着咗想學,一年內我哋已經彈到歌曲,仲可以參加民歌比賽仲贏埋!因為我有興趣,所以好快學好!」發掘興趣之餘,還要發掘創意,需要有空間思考,發個白日夢可能成就將來,Dino說:「發吽逗好重要㗎,唔係五分鐘,可能係幾個鐘,專家都話嗰一刻好重要,小朋友利用緊腦部幻想。」
大仔DaDa沒有讀N班,今學期直入K1,幸好沒有太大適應問題,做Graphic design的Nancy大多在家工作,可以貼身照顧DaDa,N班教到的東西,她也教得到,加上有定期上playgroup,適應返學生活不成問題。

想「逃學」多見弟弟

不過,開學頭一個月DaDa都不願上學,但並非因為不喜歡學校,而是太掛念九月初生的弟弟,每朝找藉口「逃學」,Nancy笑說:「佢用過肚痛、好眼瞓、連食得太飽都有,老師教我一定要say no,唔可以心軟,佢頭一個月都係喊住咁返學。」
哥哥錫弟弟錫到唔想返學,真的好少見!Nancy解釋可能懷孕期間用了一些小方法,令兩兄弟至今仍相親相愛,「我代細佬買咗個足球,話係弟弟送俾你㗎,佢到依家仲相信,好珍惜個足球。細佬出世後,好多朋友上嚟探我哋,我叫朋友買禮物一定要買兩份,所以嗰段時間DaDa都好開心。」Dino與Nancy不介意大家多送玩具作禮物,因為玩具是與孩子溝通的橋樑之一,他們覺得作為家長,應該要用心接觸孩子的世界,而非孩子接觸大人的世界,多以玩具溝通進入小朋友的境界,一家人打成一片,孩子就自然活得快樂。

音樂培育
Dino作為音樂人,平日都喜歡自由創作氹孩子瞓覺,年前大仔仍是BB時期,他因為聲帶受傷多彈結他,到現在細仔他就唱歌為主,片段中他也大開金口氹仔開心,囝囝非常受落,去片聽聽靚仔有型的Dino唱歌啦!

●撰文:Ling
●攝影:黃大立 (部分相片由受訪者提供)

●場地:MioXpace (9711 9533)

 

※如欲率先接收資訊,請讚好我們的FB專頁並於「已讚好/Liked」選單設定「搶先看/See First」,多謝支持。