全港十大野餐熱點

親子好去處

廣告

香港人平時返工返學都好忙,放假梗係要搵地方叉叉電啦!如果可以有個地方曬吓太陽、吹吓風,再野埋餐,咁就正啦!香港地話大唔大,話細唔細,不過要搵個地方舒展吓筋骨,悠閒寫意咁野個餐都唔太難,睇吓我哋嘅介紹啦!

九龍區

佐敦谷公園

城市綠洲 最受歡迎

東九龍區內的一個小綠洲,出名在有兩大塊佔地逾一萬平方米的大草地,鋪上地蓆紮個營,睇書、結他或野餐,hea 味在場內到處傳染!場內人士都井然有序,筆者向保安員打聽,場內草地任踩任坐任跑,甚至小朋友踢波都得,但係唔俾放風箏及踩單車。同場仲有遙控車場及兒童公園等,集多元化設施於一身,絕對足夠一家人消磨一整天時間!

佐敦谷公園
地址: 觀塘新清水灣道71號
前往方法: 由順利邨巴士總站步行約十分鐘;小巴(54、54S、12、48、60);九巴(26、26M、27、29M、23、23M、32、91、91M、92、96R、95、619)

開放時間:5am-11pm

 

啟德郵輪碼頭公園

無敵草地 夠寫意

啓德郵輪碼頭公園2013年才開放,由於新建,人流不算多,而且園內十分空曠,又可以坐在中央草坪野餐、看書,由於兩邊臨海,可飽覽維港景色和日落,一陣陣海風吹來,十分寫意舒適,唯獨位置比較隔涉!

啓德郵輪碼頭公園

地址:九龍城啟德承豐道33號啟德郵輪碼頭地下
前往方法:九龍灣港鐵站乘坐86號專線小巴 或 牛頭角/ 觀塘港鐵站乘5R巴士 (只於假日行駛)
開放時間:24小時

 

西九海濱長廊

文化藝術新蒲點

有單車徑、健身設施、小食亭及廁所,但就冇乜遮擋,一有太陽或大雨就很難找有瓦遮頭的地方。草地多而散,可以欣賞維多利亞港海景的明媚風光,而且更會不時舉辦大型音樂節和藝術節等文化活動,是十分多元化的公園,去野餐仲有埋免費娛樂,邊度搵呀!

西九海濱長廊

地址: 尖沙嘴柯士甸道西與雅翔道交界
前往方法: 港鐵九龍站B 出口步行五分鐘及西隧口
開放時間:6am-11pm

 

港島區

山頂公園

英式庭園夠靜局

這康文署轄下公共公園,其實是前港督的後花園,因觀景台之前正是舊總督別墅的位置,如今如詩畫的私人花園已對外開放,公園中央有個涼亭,四周種滿花卉,園丁打理得美輪美奐,草地面積合約有一個正規足球場大小,外望南丫島海峽,絕對心曠神怡!閒日人流不多,只有外傭放狗閒溜,想野餐也有枱櫈,不需坐地下。

山頂公園

地址: 山頂柯士甸山道山頂
前往方法: 由凌霄閣沿柯士甸山道行約15分鐘即達;巴士(15、15A、15B);專線小巴(1號);纜車
開放時間:24小時

 

添馬公園

設施新淨夠就腳

政府總部門前有一大塊斜草地向海,如天氣好時躺在這裏吹海風,加上無敵維港景色一絕!公園同時連接中環段的海濱長廊,可從中環碼頭和天星碼頭來回。公園櫈新淨,草地質素一般,雖近政要的辦公室,但閒坐或嬉戲冇問題,保安員不算煩人,三分鐘路程內有廁所,交通方便,一家大細去野餐,又唔想攞住咁多嘢舟車勞頓,呢度絕對係首選啦!

添馬公園

地址: 金鐘添馬公園
前往方法: 港鐵金鐘站A出口上行人天橋
開放時間:24小時

 

中山紀念公園

草地軟熟夠開揚

去野餐多數都要坐地下,所以一片夠綠油油,好似地氈咁軟熟嘅草地好緊要! 中山紀念公園嘅草地呈圓形,質地柔軟,赤腳行都不痛。但因為交通不便而未有太多人去。場內設施有噴水池、緩跑徑、藝術雕塑及兒童遊樂場等,一家人細hea足一日冇難度啦!

中山紀念公園

地址: 西環東邊街北
前往方法: 巴士4X、43X、90B及94X在高樂花園附近落車,行5分鐘即到。
開放時間:24小時

 

維園中央草坪

配套齊全 港島最大

港島區最大的公園,中央草坪都吸引唔少外傭周日聚集,而亦有一家大細到草地玩,配套還可享用公園的餐廳、快餐亭、模型船池、 足球場、籃球場、健身站及緩跑徑及兒童遊樂場。不過,一年四季都有白鴿聚集,喺度開餐就要小心中頭獎喇!

維園中央草坪

地址:銅鑼灣興發街一號
前往方法:港鐵銅鑼灣站E出口
開放時間:24小時

新界區

彭福公園

小孩與狗 任意奔走

彭福公園係新界區歷史悠久嘅野餐聖地,位處馬場中央,周圍有山有水,有迷宮又有遊樂場,環境一流,唔單止適合一家大細,有養寵物仲可以帶埋去放吓草,四圍走,壓力? bye bye啦!園內不設食肆,所以記得入齊貨先好出發呀!

彭福公園

地址: 沙田馬場
前往方法: 港鐵東鐵線火炭站C出口經,銀禧花園行人通道,橫過行人天橋到達位於沙田馬場之公園入口
開放時間:9am至6pm(夜馬則開放至4pm),逢日馬賽馬日及星期一關閉,如星期一為公眾假期,公園會於當日開放,翌日則會關閉。

 

大埔海濱公園

花海靚景 老少咸宜

野餐怕迫怕人多嘅,嚟呢度就啱喇!呢個係全港面積最大嘅公園,園內設施應有盡有,包括西式花園、兒童遊樂場、海濱長廊、門球場、昆蟲屋、模型船水池、石春路等等。最正係花海全年綻放,夠晒繽紛,心情包靚呀!

大埔海濱公園

地址: 大埔大發街大埔海濱公園
前往方法:到大埔墟港鐵站,乘坐71K 號巴士或步行 30 分鐘
開放時間:24小時

 

迪欣湖

遠離塵囂 有山有水

如果要數港人最愛野餐嘅熱點,迪欣湖定必榜上有名,遠離市區,夠靚夠靜,有全港最大嘅人工湖,旁邊仲有歐陸式小屋,絕對有外國feel!除咗野餐,仲可以租船仔、單車等,輕輕鬆鬆消磨一日。

迪欣湖

地址: 大嶼山竹篙灣迪士尼樂園旁
前往方法: 港鐵迪士尼站步行前往約十五分鐘(迪欣湖);港鐵站旁的公共交通交匯處有穿梭巴士來往樂園及酒店(迪士尼酒店)
開放時間:9am-7pm