親子好去處 九號水產加插親子活動
其實「九號水產」上年6月已經開幕，不過到最近才加插了些親子活動，成日俾洗牌，所以今日都要到現場玩番轉，睇吓究竟有幾好玩。
攪笑呀芊又主動要求我同佢影遊客相，扮出一副「吃貨」姿勢要食咗招牌上條魚。
其實「九號水產」係一個海產巿場，集特式食肆、食材零售、海鮮大街及私廚教室於一身。
名副其實，如果大家想食到新鮮日本空運到港海產，「九號水產」一定滿足你嘅願望。
不過先唔介紹啲海產有幾新鮮，因為知道最近多咗個遊戲「小小車手大任務GoGoGo」，俾小朋友飛車穿越各商店完成任務，所以一同完條大魚打卡後就要即刻入場體驗下。
小小車手大任務GoGoGo
開放時間：每日下午2時至6時
費用：$40 / 10分鐘 限時內完成任務，集齊印仔可獲贈精美玩具。
高度要求：80cm – 120cm
其實玩法就好似以前TBB有個外購節目叫「BB也Shopping」，俾少少錢小朋友，呀媽扮病叫呀仔出街幫佢買餸，途中遇上各種考驗，最後買啲唔買啲完成任務番嚟俾呀媽攬住錫。
我一直都好想同細路玩呢個Game，但係你知香港地好難玩啦，一陣俾佢哋出街，任務未完成，一係唔見咗錢，一係連自己都唔見埋就大鑊。
但係喺「九號水產」呢度玩，就包保安全，因為全部任務就在「九號水產」內進行，呀哥同呀芊就揀咗架車開始去派發任務的地方。
駕車去買菜
呀哥知道戴頭盔會阻住哂，所以唔肯戴！見到要孭住呢個背囊，仲話係女裝唔想孭。（後尾俾媽咪說服話係藍色所以先肯孭）
呀妹就好攪笑，點解係坐上鏟泥車去做任務，唔係去買餸咩?
職員哥哥超細心講解要完成的任務俾小朋友知，任務分咗難易兩種程度。
終於到呀妹，佢揀咗個簡單任務去完成，只係去買蛋同埋拎去俾食店，煮個便當出嚟就攪掂。
任務買食材
因為佢聽到要10分鐘內完成，所以就雞咁腳飛車去下一個Check Point。
去到「海鮮大街」，哥哥一味望住我，佢見我唔理佢，佢終於要自己大大聲問「有冇人呀? 我要買魚呀!」
海鮮大街
人哋問佢拎幾多錢就俾幾多錢人…都唔識望下自己要買幾多錢海鮮。
俾完錢拎咗隻蟹又就咁走咗去，去到呢度終於忍唔住提一提佢要拎張任務咭俾人蓋!
轉個頭呀妹已經完成任務，拎住盒(假)便當番去交差。
其實好多唔同任務，例如到場內為食肆運送新鮮食材、到場內選購食材製作大餐，或到甜品美食店及串燒店購買小食給媽媽等等。
全靠呢個得力助手(媽咪)，先可以完成到任務，呀妹還係要加把勁再主動D先得
買食材送給居酒屋
呀哥終於嚟到最後一站，將買到的食材都送給居酒屋，然後同樣拎到便當就番去交差。
超細心的職員哥哥，慢慢引導小朋友分享剛才的一切經歷。
呀哥由一開始不停迷路中去學習去問路、勇敢主動購買食材、自我管理金錢及事務安排。
整個過程佢非常享受，仲話好好玩好想玩多次。
呀妹雖然唔係好知做咩，不過媽咪從旁協助完成任務，佢都非常有滿足感，同埋自我信心都增強咗。
換迪迪尼手巾仔
蓋滿印仔的任務咭，可以換到精美的迪迪尼手巾仔。
室內電動車
開放時間： 星期一至星期五下午2時至晚上9時 ；星期六、日及公眾假期上午11時至晚上9時
費用：$40 / 10分鐘。
高度要求：80cm-140cm
最攪笑係呢D電動車係有搖控手掣，如果有太細嘅小朋友玩，家長可以用搖控器控制架車。
而且負責人都好有心，正值流感高峰期，所以都聲明要小朋友遊戲前玩都要洗手。
充氣彈床區
附有其他小型遊樂設施及美國品牌玩具
開放時間： 星期一至星期五下午2時至晚上9時；星期六、日及公眾假期上午11時至晚上9時
費用：$40 / 10分鐘。
高度要求：80cm-140cm(少於80cm 需由家長陪同)
呢度真係一次過滿足哂兩個細路，因為哥哥鍾意玩車，芊芊就好鍾意跳彈床。
一直有通風系統在運作，所以唔駛驚在裡面跳會焗親小朋友。
記住兩個遊戲都係身高限於140cm之下及3-10歲小朋友。
cooking教室 學整卡通便當
商場內仲有個「私廚教室」，不定期會有不同的親子烹飪班，可以跟小朋友一齊做愛心得意卡通便當。
迷你歷史博物館
行到店的另一段出口附近，仲有個「漁港探知館」，就好似個迷你歷史博物館，俾大家打吓卡之餘，認識一下昔日漁村文化情懷。
特式食肆
至於食肆總共有7間，當中有4間有提供兒童餐
「翔太壽司」(獲米芝蓮推薦)
電話：2834 3031
營業時間：12nn-2:30pm，6pm-11pm
備註：Omakase 須提早一天訂位，收加一
饒之味居酒屋
電話：2527 1916
營業時間：11:30am-3pm，6pm-10pm
備註：收加一，可外賣
蟹筵
電話：2122 6788
營業時間：星期一至五12nn-3pm，6pm-11pm；星期六、日及公眾假期12nn-11pm
備註：須先以電話訂座，另收加一，不設外賣
而我哋今晚要食的就係這家「頣之味」
頣之味
電話：2759 5526
營業時間：11:30am-10pm（壽司吧吧枱），11:30am-9:30pm（自助外賣區）
備註：吧枱區設加一服務費，外賣區消費 $12 起
野菜沙律
沙律裡面有呢條好得意食落好爽口嘅物體…問過經理原來係日本另一種海藻類，之後見我咁鍾意，再上多一碟仔俾我嘆，多謝經理呀!!!
然後到呢一個頭盤，件拖羅根腩一放咗入口，我好自然就合上眼，因為我估我自己想細細品嚐佢。
跟住媽咪就見到我面上露出微笑，我諗呢個微笑就代表咗一切，唔駛講嘢啦!
吞拿魚沙律玉子燒
當我食完之後經理走過嚟問我「食物質素如何?」
我就答佢「無得頂，大滿足!!」
跟住佢話原來店名「頣之味」仲有個英文名叫「Daimanzoku」日文就係「大滿足」嘅意思。
碗碎葱吞拿魚腩迷你丼同鹽燒吞拿魚麵豉湯
最後食埋碗碎葱吞拿魚腩迷你丼同鹽燒吞拿魚麵豉湯。真係超級大滿足!
等我開估價錢係幾多….只係$288，真係超值呀!
海底油樂園
節目真係一個接一個，在服務台對出仲有個「海底油樂園」的小遊戲，只要於「九號水產」任何消費滿$200就可以叫小朋友可以向服務台取一張印有龜或魚圖案的紙，然後創作出屬於自己的小魚小龜就可以了。
跟住再到服務台Scan入TVwall 搵番自己的小動物。
芊芊一坐好就已經點好想食D咩，果然女仔食甜品係用另一個胃。
牛奶雪糕無得頂，勁番牛奶味，另外小丸子係店主自家製，超煙韌唔黐牙!
同頭先一樣，班戟係店內自家製，配上焦糖布甸真係甜度啱啱好，即使加上士多啤梨醬後都唔會甜到漏。
日本草莓班戟 $88
優質食材專賣店
最後要介紹這個「優質食材專賣店」，接近7,000呎，七成貨品從日本產地直送。
真係好似行緊大百貨公司咁，唔駛同人逼嚟逼去，仲有勁多選擇。
小貼士：「九號水產」有提供消費金額換遊戲劵, 記住去到問服務台職員!
Photo byCANON 5D Mark IV,Len|EF 16-35mm f/2.8L USM
想跟我去體驗其他活動，快D報名親子團，同埋留意專頁公佈詳情啦！
http://goo.gl/forms/CNZMEPoMIWkouK8o2
呀劍評分:10分
呀劍評語:如果唔係親身入嚟，聽個名一直只知道係一個魚巿場，一向食開住家菜嘅我，又點會行入嚟。但係自此以後，各位爸媽又多個親子好去處，就算唔係嚟買食材，都可以嚟玩餐飽。
九號水產簡介
九號水產是個別開生面的水產概念場，佔地五萬呎，一站式提供食肆、水產及食材零售、私廚教室、漁港探知館及兒童互動樂園等。九號水產藉著向香港昔日的漁港歷史致敬，以實惠價格推廣高質量水產和食材，宣揚健康飲食的理念，並由新華日本食品掌舵人蔡紹霞May姐坐鎮，深入食材源產地嚴選採購上乘食材，直送到港。能將口福、資訊、娛樂、消費共治一爐，九號水產勢必成為香港飲食娛樂的新地標。
地點
九龍紅磡德豐街8號黃埔新天地第九期地下
開放時間
10:00 AM – 10:00 PM
網址
http://www.heritagemuseum.gov.hk
Facebook
https://www.facebook.com/nineseafoodplace
查詢
2121 0606
(以上資料更新至文章當日)
